൬. ഛക്കപുഗ്ഗലപഞ്ഞത്തി

൨൦൨. തത്ര യ്വായം പുഗ്ഗലോ പുബ്ബേ അനനുസ്സുതേസു ധമ്മേസു സാമം സച്ചാനി അഭിസമ്ബുജ്ഝതി, തത്ഥ ച സബ്ബഞ്ഞുതം പാപുണാതി ബലേസു ച വസീഭാവം, സമ്മാസമ്ബുദ്ധോ തേന ദട്ഠബ്ബോ.

തത്ര യ്വായം പുഗ്ഗലോ പുബ്ബേ അനനുസ്സുതേസു ധമ്മേസു സാമം സച്ചാനി അഭിസമ്ബുജ്ഝതി, ന ച തത്ഥ സബ്ബഞ്ഞുതം പാപുണാതി ന ച ബലേസു വസീഭാവം, പച്ചേകസമ്ബുദ്ധോ തേന ദട്ഠബ്ബോ.

തത്ര യ്വായം പുഗ്ഗലോ പുബ്ബേ അനനുസ്സുതേസു ധമ്മേസു സാമം സച്ചാനി അനഭിസമ്ബുജ്ഝതി, ദിട്ഠേവ ധമ്മേ ദുക്ഖസ്സന്തകരോ ഹോതി [ദുക്ഖസ്സന്തം കരോതി (സീ.) ഏവമുപരിപി], സാവകപാരമിഞ്ച പാപുണാതി, സാരിപുത്തമോഗ്ഗല്ലാനാ തേന ദട്ഠബ്ബാ.

തത്ര യ്വായം പുഗ്ഗലോ പുബ്ബേ അനനുസ്സുതേസു ധമ്മേസു സാമം സച്ചാനി അനഭിസമ്ബുജ്ഝതി, ദിട്ഠേവ ധമ്മേ ദുക്ഖസ്സന്തകരോ ഹോതി, ന ച സാവകപാരമിം പാപുണാതി, അവസേസാ അരഹന്താ തേന ദട്ഠബ്ബാ.

തത്ര യ്വായം പുഗ്ഗലോ പുബ്ബേ അനനുസ്സുതേസു ധമ്മേസു സാമം സച്ചാനി അനഭിസമ്ബുജ്ഝതി, ന ച ദിട്ഠേവ ധമ്മേ ദുക്ഖസ്സന്തകരോ ഹോതി, അനാഗാമീ ഹോതി അനാഗന്താ ഇത്ഥത്തം, അനാഗാമീ തേന ദട്ഠബ്ബോ.

തത്ര യ്വായം പുഗ്ഗലോ പുബ്ബേ അനനുസ്സുതേസു ധമ്മേസു സാമം സച്ചാനി അനഭിസമ്ബുജ്ഝതി, ന ച ദിട്ഠേവ ധമ്മേ ദുക്ഖസ്സന്തകരോ ഹോതി, ആഗന്താ ഇത്ഥത്തം, സോതാപന്നസകദാഗാമിനോ തേന ദട്ഠബ്ബാ.

ഛക്കനിദ്ദേസോ.