൭. സത്തകപുഗ്ഗലപഞ്ഞത്തി

൨൦൩. കഥഞ്ച പുഗ്ഗലോ സകിം നിമുഗ്ഗോ നിമുഗ്ഗോവ ഹോതി? ഇധേകച്ചോ പുഗ്ഗലോ സമന്നാഗതോ ഹോതി ഏകന്തകാളകേഹി അകുസലേഹി ധമ്മേഹി. ഏവം പുഗ്ഗലോ സകിം നിമുഗ്ഗോ നിമുഗ്ഗോവ ഹോതി.

കഥഞ്ച പുഗ്ഗലോ ഉമ്മുജ്ജിത്വാ നിമുജ്ജതി? ഇധേകച്ചോ പുഗ്ഗലോ ഉമ്മുജ്ജതി ‘‘സാഹു സദ്ധാ കുസലേസു ധമ്മേസു, സാധു [സാഹു (സീ. സ്യാ.) ഏവം തീസു ഠാനേസുപി] ഹിരീ കുസലേസു ധമ്മേസു, സാധു ഓത്തപ്പം കുസലേസു ധമ്മേസു, സാധു വീരിയം [വിരിയം (സീ. സ്യാ.)] കുസലേസു ധമ്മേസു, സാധു പഞ്ഞാ കുസലേസു ധമ്മേസൂ’’തി. തസ്സ സാ സദ്ധാ നേവ തിട്ഠതി നോ വഡ്ഢതി ഹായതിയേവ, തസ്സ സാ ഹിരീ നേവ തിട്ഠതി നോ വഡ്ഢതി ഹായതിയേവ, തസ്സ തം ഓത്തപ്പം നേവ തിട്ഠതി നോ വഡ്ഢതി ഹായതിയേവ, തസ്സ തം വീരിയം നേവ തിട്ഠതി നോ വഡ്ഢതി ഹായതിയേവ, തസ്സ സാ പഞ്ഞാ നേവ തിട്ഠതി നോ വഡ്ഢതി ഹായതിയേവ. ഏവം പുഗ്ഗലോ ഉമ്മുജ്ജിത്വാ നിമുജ്ജതി.

കഥഞ്ച പുഗ്ഗലോ ഉമ്മുജ്ജിത്വാ ഠിതോ ഹോതി? ഇധേകച്ചോ പുഗ്ഗലോ ഉമ്മുജ്ജതി ‘‘സാഹു സദ്ധാ കുസലേസു ധമ്മേസു, സാധു ഹിരീ കുസലേസു ധമ്മേസു, സാധു ഓത്തപ്പം കുസലേസു ധമ്മേസു, സാധു വീരിയം കുസലേസു ധമ്മേസു, സാധു പഞ്ഞാ കുസലേസു ധമ്മേസൂ’’തി. തസ്സ സാ സദ്ധാ നേവ ഹായതി നോ വഡ്ഢതി ഠിതാ ഹോതി, തസ്സ സാ ഹിരീ നേവ ഹായതി നോ വഡ്ഢതി ഠിതാ ഹോതി, തസ്സ തം ഓത്തപ്പം നേവ ഹായതി നോ വഡ്ഢതി ഠിതം ഹോതി, തസ്സ തം വീരിയം നേവ ഹായതി നോ വഡ്ഢതി ഠിതം ഹോതി, തസ്സ സാ പഞ്ഞാ നേവ ഹായതി നോ വഡ്ഢതി ഠിതാ ഹോതി. ഏവം പുഗ്ഗലോ ഉമ്മുജ്ജിത്വാ ഠിതോ ഹോതി.

കഥഞ്ച പുഗ്ഗലോ ഉമ്മുജ്ജിത്വാ വിപസ്സതി വിലോകേതി? ഇധേകച്ചോ പുഗ്ഗലോ ഉമ്മുജ്ജതി ‘‘സാഹു സദ്ധാ കുസലേസു ധമ്മേസു, സാധു ഹിരീ കുസലേസു ധമ്മേസു, സാധു ഓത്തപ്പം കുസലേസു ധമ്മേസു, സാധു വീരിയം കുസലേസു ധമ്മേസു, സാധു പഞ്ഞാ കുസലേസു ധമ്മേസൂ’’തി. സോ തിണ്ണം സംയോജനാനം പരിക്ഖയാ സോതാപന്നോ ഹോതി അവിനിപാതധമ്മോ നിയതോ സമ്ബോധിപരായനോ. ഏവം പുഗ്ഗലോ ഉമ്മുജ്ജിത്വാ വിപസ്സതി വിലോകേതി.

കഥഞ്ച പുഗ്ഗലോ ഉമ്മുജ്ജിത്വാ പതരതി? ഇധേകച്ചോ പുഗ്ഗലോ ഉമ്മുജ്ജതി ‘‘സാഹു സദ്ധാ കുസലേസു ധമ്മേസു, സാധു ഹിരീ കുസലേസു ധമ്മേസു, സാധു ഓത്തപ്പം കുസലേസു ധമ്മേസു, സാധു വീരിയം കുസലേസു ധമ്മേസു, സാധു പഞ്ഞാ കുസലേസു ധമ്മേസൂ’’തി. സോ തിണ്ണം സംയോജനാനം പരിക്ഖയാ രാഗദോസമോഹാനം തനുത്താ സകദാഗാമീ ഹോതി സകിദേവ ഇമം ലോകം ആഗന്ത്വാ ദുക്ഖസ്സന്തകരോ ഹോതി. ഏവം പുഗ്ഗലോ ഉമ്മുജ്ജിത്വാ പതരതി.

കഥഞ്ച പുഗ്ഗലോ ഉമ്മുജ്ജിത്വാ പതിഗാധപ്പത്തോ ഹോതി? ഇധേകച്ചോ പുഗ്ഗലോ ഉമ്മുജ്ജതി ‘‘സാഹു സദ്ധാ കുസലേസു ധമ്മേസു, സാധു ഹിരീ കുസലേസു ധമ്മേസു, സാധു ഓത്തപ്പം കുസലേസു ധമ്മേസു, സാധു വീരിയം കുസലേസു ധമ്മേസു, സാധു പഞ്ഞാ കുസലേസു ധമ്മേസൂ’’തി. സോ പഞ്ചന്നം ഓരമ്ഭാഗിയാനം സംയോജനാനം പരിക്ഖയാ ഓപപാതികോ ഹോതി തത്ഥ പരിനിബ്ബായീ അനാവത്തിധമ്മോ തസ്മാ ലോകാ. ഏവം പുഗ്ഗലോ ഉമ്മുജ്ജിത്വാ പതിഗാധപ്പത്തോ ഹോതി.

കഥഞ്ച പുഗ്ഗലോ ഉമ്മുജ്ജിത്വാ തിണ്ണോ ഹോതി പാരങ്ഗതോ ഥലേ തിട്ഠതി ബ്രാഹ്മണോ? ഇധേകച്ചോ പുഗ്ഗലോ ഉമ്മുജ്ജതി ‘‘സാഹു സദ്ധാ കുസലേസു ധമ്മേസു, സാധു ഹിരീ കുസലേസു ധമ്മേസു, സാധു ഓത്തപ്പം കുസലേസു ധമ്മേസു, സാധു വീരിയം കുസലേസു ധമ്മേസു, സാധു പഞ്ഞാ കുസലേസു ധമ്മേസൂ’’തി. സോ ആസവാനം ഖയാ അനാസവം ചേതോവിമുത്തിം പഞ്ഞാവിമുത്തിം ദിട്ഠേവ ധമ്മേ സയം അഭിഞ്ഞാ സച്ഛികത്വാ ഉപസമ്പജ്ജ വിഹരതി. ഏവം പുഗ്ഗലോ ഉമ്മുജ്ജിത്വാ തിണ്ണോ ഹോതി പാരങ്ഗതോ ഥലേ തിട്ഠതി ബ്രാഹ്മണോ.

൨൦൪. കതമോ ച പുഗ്ഗലോ ഉഭതോഭാഗവിമുത്തോ? ഇധേകച്ചോ പുഗ്ഗലോ അട്ഠ വിമോക്ഖേ കായേന ഫുസിത്വാ വിഹരതി പഞ്ഞായ ചസ്സ ദിസ്വാ ആസവാ പരിക്ഖീണാ ഹോന്തി. അയം വുച്ചതി പുഗ്ഗലോ ഉഭതോഭാഗവിമുത്തോ.

൨൦൫. കതമോ ച പുഗ്ഗലോ പഞ്ഞാവിമുത്തോ…പേ… കായസക്ഖീ… ദിട്ഠിപ്പത്തോ… സദ്ധാവിമുത്തോ… ധമ്മാനുസാരീ ….

൨൦൬. കതമോ ച പുഗ്ഗലോ സദ്ധാനുസാരീ? യസ്സ പുഗ്ഗലസ്സ സോതാപത്തിഫലസച്ഛികിരിയായ പടിപന്നസ്സ സദ്ധിന്ദ്രിയം അധിമത്തം ഹോതി, സദ്ധാവാഹിം സദ്ധാപുബ്ബങ്ഗമം അരിയമഗ്ഗം ഭാവേതി. അയം വുച്ചതി പുഗ്ഗലോ സദ്ധാനുസാരീ. സോതാപത്തിഫലസച്ഛികിരിയായ പടിപന്നോ പുഗ്ഗലോ സദ്ധാനുസാരീ, ഫലേ ഠിതോ സദ്ധാവിമുത്തോതി.

സത്തകനിദ്ദേസോ.