൧-൭-൧൩. കുസലത്തിക-ചൂളന്തരദുകാനി

൧൦. നകുസലോ നസപ്പച്ചയോ ധമ്മോ കുസലസ്സ സപ്പച്ചയസ്സ ധമ്മസ്സ ആരമ്മണപച്ചയേന പച്ചയോ… ആരമ്മണേ ഛ. (സങ്ഖതം സപ്പച്ചയസദിസം.)

൧൧. നകുസലം നസനിദസ്സനം ധമ്മം പടിച്ച അബ്യാകതോ സനിദസ്സനോ ധമ്മോ ഉപ്പജ്ജതി ഹേതുപച്ചയാ… ഹേതുയാ ഛ.

നകുസലോ നഅനിദസ്സനോ ധമ്മോ കുസലസ്സ അനിദസ്സനസ്സ ധമ്മസ്സ ആരമ്മണപച്ചയേന പച്ചയോ. (നവ പഞ്ഹാ കാതബ്ബാ).

൧൨. നകുസലം നസപ്പടിഘം ധമ്മം പടിച്ച അബ്യാകതോ സപ്പടിഘോ ധമ്മോ ഉപ്പജ്ജതി ഹേതുപച്ചയാ… ഹേതുയാ ഛ.

നകുസലം നഅപ്പടിഘം ധമ്മം പടിച്ച അബ്യാകതോ അപ്പടിഘോ ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.

൧൩. നകുസലം നരൂപിം ധമ്മം പടിച്ച അബ്യാകതോ രൂപീ ധമ്മോ ഉപ്പജ്ജതി ഹേതുപച്ചയാ… ഹേതുയാ ഛ.

നകുസലം നഅരൂപിം ധമ്മം പടിച്ച അബ്യാകതോ അരൂപീ ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.

൧൪. നകുസലം നലോകിയം ധമ്മം പടിച്ച അബ്യാകതോ ലോകിയോ ധമ്മോ ഉപ്പജ്ജതി ഹേതുപച്ചയാ… ഹേതുയാ പഞ്ച.

നകുസലം നലോകുത്തരം ധമ്മം പച്ചയാ കുസലോ ലോകുത്തരോ ധമ്മോ ഉപ്പജ്ജതി ഹേതുപച്ചയാ. നകുസലം നലോകുത്തരം ധമ്മം പച്ചയാ അബ്യാകതോ ലോകുത്തരോ ധമ്മോ ഉപ്പജ്ജതി ഹേതുപച്ചയാ. (ഛ പഞ്ഹാ കാതബ്ബാ.)

൧൫. നകുസലം നകേനചി വിഞ്ഞേയ്യം ധമ്മം പടിച്ച അകുസലോ കേനചി വിഞ്ഞേയ്യോ ധമ്മോ ഉപ്പജ്ജതി ഹേതുപച്ചയാ… ഹേതുയാ അട്ഠാരസ.

നകുസലം നകേനചി നവിഞ്ഞേയ്യം ധമ്മം പടിച്ച അകുസലോ കേനചി വിഞ്ഞേയ്യോ ധമ്മോ ഉപ്പജ്ജതി ഹേതുപച്ചയാ… ഹേതുയാ അട്ഠാരസ.