൧-൬. പടിച്ചവാരാദി

പച്ചയചതുക്കം

ഹേതുപച്ചയോ

൯൭. നഹേതും സഹേതുകം അബ്യാകതം ധമ്മം പടിച്ച നഹേതു സഹേതുകോ അബ്യാകതോ ധമ്മോ ഉപ്പജ്ജതി ഹേതുപച്ചയാ. നഹേതും സഹേതുകം അബ്യാകതം ധമ്മം പടിച്ച നഹേതു അഹേതുകോ അബ്യാകതോ ധമ്മോ ഉപ്പജ്ജതി ഹേതുപച്ചയാ. നഹേതും സഹേതുകം അബ്യാകതം ധമ്മം പടിച്ച നഹേതു സഹേതുകോ അബ്യാകതോ ച നഹേതു അഹേതുകോ അബ്യാകതോ ച ധമ്മാ ഉപ്പജ്ജന്തി ഹേതുപച്ചയാ. (൩)

നഹേതും അഹേതുകം അബ്യാകതം ധമ്മം പടിച്ച നഹേതു അഹേതുകോ അബ്യാകതോ ധമ്മോ ഉപ്പജ്ജതി ഹേതുപച്ചയാ… തീണി.

നഹേതും സഹേതുകം അബ്യാകതഞ്ച നഹേതും അഹേതുകം അബ്യാകതഞ്ച ധമ്മം പടിച്ച നഹേതു സഹേതുകോ അബ്യാകതോ ധമ്മോ ഉപ്പജ്ജതി ഹേതുപച്ചയാ… തീണി (സംഖിത്തം).

൯൮. ഹേതുയാ നവ, ആരമ്മണേ ചത്താരി, അധിപതിയാ പഞ്ച…പേ… പുരേജാതേ ആസേവനേ ദ്വേ, കമ്മേ നവ, വിപാകേ നവ…പേ… അവിഗതേ നവ (സംഖിത്തം).

നഹേതുപച്ചയോ

൯൯. നഹേതും അഹേതുകം അബ്യാകതം ധമ്മം പടിച്ച നഹേതു അഹേതുകോ അബ്യാകതോ ധമ്മോ ഉപ്പജ്ജതി നഹേതുപച്ചയാ (സംഖിത്തം).

൧൦൦. നഹേതുയാ ഏകം, നആരമ്മണേ തീണി, നഅധിപതിയാ നവ, നഅനന്തരേ തീണി, നസമനന്തരേ തീണി, നഅഞ്ഞമഞ്ഞേ തീണി, നഉപനിസ്സയേ തീണി, നപുരേജാതേ നവ, നപച്ഛാജാതേ നവ, നആസേവനേ നവ, നകമ്മേ ദ്വേ, നവിപാകേ പഞ്ച, നആഹാരേ ഏകം, നഇന്ദ്രിയേ ഏകം, നഝാനേ ഏകം, നമഗ്ഗേ ഏകം, നസമ്പയുത്തേ തീണി, നവിപ്പയുത്തേ ദ്വേ, നോനത്ഥിയാ തീണി, നോവിഗതേ തീണി (സംഖിത്തം).

ഹേതുപച്ചയാ നആരമ്മണേ തീണി (സംഖിത്തം).

നഹേതുപച്ചയാ ആരമ്മണേ ഏകം (സംഖിത്തം).

(സഹജാതവാരോപി പച്ചയവാരോപി നിസ്സയവാരോപി സംസട്ഠവാരോപി സമ്പയുത്തവാരോപി പടിച്ചവാരസദിസാ വിത്ഥാരേതബ്ബാ.)