൧-൬. പടിച്ചവാരാദി

പച്ചയചതുക്കം

ഹേതുപച്ചയോ

൧. ഹേതും കുസലം ധമ്മം പടിച്ച ഹേതു കുസലോ ധമ്മോ ഉപ്പജ്ജതി ഹേതുപച്ചയാ. ഹേതും കുസലം ധമ്മം പടിച്ച നഹേതു കുസലോ ധമ്മോ ഉപ്പജ്ജതി ഹേതുപച്ചയാ. ഹേതും കുസലം ധമ്മം പടിച്ച ഹേതു കുസലോ ച നഹേതു കുസലോ ച ധമ്മാ ഉപ്പജ്ജന്തി ഹേതുപച്ചയാ. (൩)

൨. നഹേതും കുസലം ധമ്മം പടിച്ച നഹേതു കുസലോ ധമ്മോ ഉപ്പജ്ജതി ഹേതുപച്ചയാ. നഹേതും കുസലം ധമ്മം പടിച്ച ഹേതു കുസലോ ധമ്മോ ഉപ്പജ്ജതി ഹേതുപച്ചയാ. നഹേതും കുസലം ധമ്മം പടിച്ച ഹേതു കുസലോ ച നഹേതു കുസലോ ച ധമ്മാ ഉപ്പജ്ജന്തി ഹേതുപച്ചയാ. (൩)

൩. ഹേതും കുസലഞ്ച നഹേതും കുസലഞ്ച ധമ്മം പടിച്ച ഹേതു കുസലോ ധമ്മോ ഉപ്പജ്ജതി ഹേതുപച്ചയാ. ഹേതും കുസലഞ്ച നഹേതും കുസലഞ്ച ധമ്മം പടിച്ച നഹേതു കുസലോ ധമ്മോ ഉപ്പജ്ജതി ഹേതുപച്ചയാ. ഹേതും കുസലഞ്ച നഹേതും കുസലഞ്ച ധമ്മം പടിച്ച ഹേതു കുസലോ ച നഹേതു കുസലോ ച ധമ്മാ ഉപ്പജ്ജന്തി ഹേതുപച്ചയാ. (൩)

ആരമ്മണപച്ചയോ

൪. ഹേതും കുസലം ധമ്മം പടിച്ച ഹേതു കുസലോ ധമ്മോ ഉപ്പജ്ജതി ആരമ്മണപച്ചയാ (സംഖിത്തം).

൫. ഹേതുയാ നവ, ആരമ്മണേ നവ, അധിപതിയാ നവ, അനന്തരേ നവ, സമനന്തരേ നവ, സഹജാതേ നവ, അഞ്ഞമഞ്ഞേ നവ, നിസ്സയേ നവ, ഉപനിസ്സയേ നവ, പുരേജാതേ നവ, ആസേവനേ നവ, കമ്മേ നവ, ആഹാരേ നവ, ഇന്ദ്രിയേ നവ, ഝാനേ നവ, മഗ്ഗേ നവ, സമ്പയുത്തേ നവ, വിപ്പയുത്തേ നവ, അത്ഥിയാ നവ, നത്ഥിയാ നവ, വിഗതേ നവ, അവിഗതേ നവ (അനുലോമം).

നഅധിപതിപച്ചയോ

൬. ഹേതും കുസലം ധമ്മം പടിച്ച ഹേതു കുസലോ ധമ്മോ ഉപ്പജ്ജതി നഅധിപതിപച്ചയാ. ഹേതും കുസലം ധമ്മം പടിച്ച നഹേതു കുസലോ ധമ്മോ ഉപ്പജ്ജതി നഅധിപതിപച്ചയാ. ഹേതും കുസലം ധമ്മം പടിച്ച ഹേതു കുസലോ ച നഹേതു കുസലോ ച ധമ്മാ ഉപ്പജ്ജന്തി നഅധിപതിപച്ചയാ. (൩)

൭. നഹേതും കുസലം ധമ്മം പടിച്ച നഹേതു കുസലോ ധമ്മോ ഉപ്പജ്ജതി നഅധിപതിപച്ചയാ… തീണി.

ഹേതും കുസലഞ്ച നഹേതും കുസലഞ്ച ധമ്മം പടിച്ച ഹേതു കുസലോ ധമ്മോ ഉപ്പജ്ജതി നഅധിപതിപച്ചയാ… തീണി.

നപുരേജാതപച്ചയാദി

൮. ഹേതും കുസലം ധമ്മം പടിച്ച ഹേതു കുസലോ ധമ്മോ ഉപ്പജ്ജതി നപുരേജാതപച്ചയാ… നവ… നപച്ഛാജാതപച്ചയാ… നവ… നആസേവനപച്ചയാ … നവ.

നകമ്മപച്ചയോ

൯. ഹേതും കുസലം ധമ്മം പടിച്ച നഹേതു കുസലോ ധമ്മോ ഉപ്പജ്ജതി നകമ്മപച്ചയാ. (൧)

നഹേതും കുസലം ധമ്മം പടിച്ച നഹേതു കുസലോ ധമ്മോ ഉപ്പജ്ജതി നകമ്മപച്ചയാ. (൧)

ഹേതും കുസലഞ്ച നഹേതും കുസലഞ്ച ധമ്മം പടിച്ച നഹേതു കുസലോ ധമ്മോ ഉപ്പജ്ജതി നകമ്മപച്ചയാ. (൧)

നവിപാകപച്ചയാദി

൧൦. ഹേതും കുസലം ധമ്മം പടിച്ച ഹേതു കുസലോ ധമ്മോ ഉപ്പജ്ജതി നവിപാകപച്ചയാ… നവ…പേ… നവിപ്പയുത്തപച്ചയാ… നവ.

൧൧. നഅധിപതിയാ നവ, നപുരേജാതേ നവ, നപച്ഛാജാതേ നവ, നആസേവനേ നവ, നകമ്മേ തീണി, നവിപാകേ നവ, നവിപ്പയുത്തേ നവ (പച്ചനീയം).

ഹേതുപച്ചയാ നഅധിപതിയാ നവ (സംഖിത്തം, അനുലോമ പച്ചനീയം).

നഅധിപതിപച്ചയാ ഹേതുയാ നവ, ആരമ്മണേ നവ (സംഖിത്തം, പച്ചനീയാനുലോമം).

(സഹജാതവാരമ്പി പച്ചയവാരമ്പി നിസ്സയവാരമ്പി സംസട്ഠവാരമ്പി സമ്പയുത്തവാരമ്പി പടിച്ചവാരസദിസാ വിത്ഥാരേതബ്ബാ.)