൧-൭. പടിച്ചവാരാദി

പച്ചയചതുക്കം

ഹേതുപച്ചയോ

൩൦. കുസലം ലോകിയം ധമ്മം പടിച്ച കുസലോ ലോകിയോ ധമ്മോ ഉപ്പജ്ജതി ഹേതുപച്ചയാ. കുസലം ലോകിയം ധമ്മം പടിച്ച അബ്യാകതോ ലോകിയോ ധമ്മോ ഉപ്പജ്ജതി ഹേതുപച്ചയാ. കുസലം ലോകിയം ധമ്മം പടിച്ച കുസലോ ലോകിയോ ച അബ്യാകതോ ലോകിയോ ച ധമ്മാ ഉപ്പജ്ജന്തി ഹേതുപച്ചയാ. (൩)

അകുസലം ലോകിയം ധമ്മം പടിച്ച അകുസലോ ലോകിയോ ധമ്മോ ഉപ്പജ്ജതി ഹേതുപച്ചയാ… തീണി.

അബ്യാകതം ലോകിയം ധമ്മം പടിച്ച അബ്യാകതോ ലോകിയോ ധമ്മോ ഉപ്പജ്ജതി ഹേതുപച്ചയാ. (൧)

കുസലം ലോകിയഞ്ച അബ്യാകതം ലോകിയഞ്ച ധമ്മം പടിച്ച അബ്യാകതോ ലോകിയോ ധമ്മോ ഉപ്പജ്ജതി ഹേതുപച്ചയാ. (൧)

അകുസലം ലോകിയഞ്ച അബ്യാകതം ലോകിയഞ്ച ധമ്മം പടിച്ച അബ്യാകതോ ലോകിയോ ധമ്മോ ഉപ്പജ്ജതി ഹേതുപച്ചയാ (൧) (സംഖിത്തം.)

൩൧. ഹേതുയാ നവ, ആരമ്മണേ തീണി…പേ… അവിഗതേ നവ (സംഖിത്തം).

പച്ചനീയം

നഹേതുപച്ചയോ

൩൨. അകുസലം ലോകിയം ധമ്മം പടിച്ച അകുസലോ ലോകിയോ ധമ്മോ ഉപ്പജ്ജതി നഹേതുപച്ചയാ. (൧)

അബ്യാകതം ലോകിയം ധമ്മം പടിച്ച അബ്യാകതോ ലോകിയോ ധമ്മോ ഉപ്പജ്ജതി നഹേതുപച്ചയാ. (൧) (സംഖിത്തം.)

൩൩. നഹേതുയാ ദ്വേ, നആരമ്മണേ പഞ്ച, നഅധിപതിയാ നവ…പേ… നോവിഗതേ പഞ്ച (സംഖിത്തം. സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം).

ഹേതു-ആരമ്മണപച്ചയാ

൩൪. കുസലോ ലോകിയോ ധമ്മോ കുസലസ്സ ലോകിയസ്സ ധമ്മസ്സ ഹേതുപച്ചയേന പച്ചയോ… തീണി.

അകുസലോ ലോകിയോ ധമ്മോ അകുസലസ്സ ലോകിയസ്സ ധമ്മസ്സ ഹേതുപച്ചയേന പച്ചയോ… തീണി.

അബ്യാകതോ ലോകിയോ ധമ്മോ അബ്യാകതസ്സ ലോകിയസ്സ ധമ്മസ്സ ഹേതുപച്ചയേന പച്ചയോ. (൧)

൩൫. കുസലോ ലോകിയോ ധമ്മോ കുസലസ്സ ലോകിയസ്സ ധമ്മസ്സ ആരമ്മണപച്ചയേന പച്ചയോ… തീണി.

അകുസലോ ലോകിയോ ധമ്മോ അകുസലസ്സ ലോകിയസ്സ ധമ്മസ്സ ആരമ്മണപച്ചയേന പച്ചയോ… തീണി.

അബ്യാകതോ ലോകിയോ ധമ്മോ അബ്യാകതസ്സ ലോകിയസ്സ ധമ്മസ്സ ആരമ്മണപച്ചയേന പച്ചയോ… തീണി (സംഖിത്തം).

൩൬. ഹേതുയാ സത്ത, ആരമ്മണേ നവ, അധിപതിയാ നവ…പേ… അവിഗതേ തേരസ (സംഖിത്തം. യഥാ കുസലത്തികേ പഞ്ഹാവാരം, ഏവം വിത്ഥാരേതബ്ബം).