൧-൭. പടിച്ചവാരാദി

പച്ചയചതുക്കം

ഹേതുപച്ചയോ

൨൫൩. കുസലം ഹേതുസമ്പയുത്തം ധമ്മം പടിച്ച കുസലോ ഹേതുസമ്പയുത്തോ ധമ്മോ ഉപ്പജ്ജതി ഹേതുപച്ചയാ. (൧)

അകുസലം ഹേതുസമ്പയുത്തം ധമ്മം പടിച്ച അകുസലോ ഹേതുസമ്പയുത്തോ ധമ്മോ ഉപ്പജ്ജതി ഹേതുപച്ചയാ. (൧)

അബ്യാകതം ഹേതുസമ്പയുത്തം ധമ്മം പടിച്ച അബ്യാകതോ ഹേതുസമ്പയുത്തോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൨൫൪. ഹേതുയാ തീണി, ആരമ്മണേ തീണി…പേ… അവിഗതേ തീണി (സംഖിത്തം).

നഅധിപതിയാ തീണി…പേ… നവിപ്പയുത്തേ തീണി (സംഖിത്തം).

(സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം.)

ഹേതു-ആരമ്മണപച്ചയാ

൨൫൫. കുസലോ ഹേതുസമ്പയുത്തോ ധമ്മോ കുസലസ്സ ഹേതുസമ്പയുത്തസ്സ ധമ്മസ്സ ഹേതുപച്ചയേന പച്ചയോ. (൧)

അകുസലോ ഹേതുസമ്പയുത്തോ ധമ്മോ അകുസലസ്സ ഹേതുസമ്പയുത്തസ്സ ധമ്മസ്സ ഹേതുപച്ചയേന പച്ചയോ. (൧)

അബ്യാകതോ ഹേതുസമ്പയുത്തോ ധമ്മോ അബ്യാകതസ്സ ഹേതുസമ്പയുത്തസ്സ ധമ്മസ്സ ഹേതുപച്ചയേന പച്ചയോ. (൧)

കുസലോ ഹേതുസമ്പയുത്തോ ധമ്മോ കുസലസ്സ ഹേതുസമ്പയുത്തസ്സ ധമ്മസ്സ ആരമ്മണപച്ചയേന പച്ചയോ… തീണി.

അകുസലോ ഹേതുസമ്പയുത്തോ ധമ്മോ അകുസലസ്സ ഹേതുസമ്പയുത്തസ്സ ധമ്മസ്സ ആരമ്മണപച്ചയേന പച്ചയോ… തീണി.

അബ്യാകതോ ഹേതുസമ്പയുത്തോ ധമ്മോ അബ്യാകതസ്സ ഹേതുസമ്പയുത്തസ്സ ധമ്മസ്സ ആരമ്മണപച്ചയേന പച്ചയോ… തീണി (സംഖിത്തം).

൨൫൬. ഹേതുയാ തീണി, ആരമ്മണേ നവ, അധിപതിയാ സത്ത, അനന്തരേ പഞ്ച, സമനന്തരേ പഞ്ച, സഹജാതേ തീണി, ഉപനിസ്സയേ നവ…പേ… അവിഗതേ തീണി (സംഖിത്തം).

നഹേതുയാ നവ, നആരമ്മണേ നവ (സംഖിത്തം).

ഹേതുപച്ചയാ നആരമ്മണേ തീണി (സംഖിത്തം).

നഹേതുപച്ചയാ ആരമ്മണേ നവ (സംഖിത്തം).

(യഥാ കുസലത്തികേ പഞ്ഹാവാരം, ഏവം വിത്ഥാരേതബ്ബം.)

ഹേതുവിപ്പയുത്തപദം