൧. വിഭങ്ഗവാരോ

ഹേതുപച്ചയോ

൧൦൦. നീവരണോ ചേവ നീവരണസമ്പയുത്തോ ച ധമ്മോ നീവരണസ്സ ചേവ നീവരണസമ്പയുത്തസ്സ ച ധമ്മസ്സ ഹേതുപച്ചയേന പച്ചയോ – നീവരണാ ചേവ നീവരണസമ്പയുത്താ ച ഹേതൂ സമ്പയുത്തകാനം നീവരണാനം ഹേതുപച്ചയേന പച്ചയോ. (൧)

നീവരണോ ചേവ നീവരണസമ്പയുത്തോ ച ധമ്മോ നീവരണസമ്പയുത്തസ്സ ചേവ നോ ച നീവരണസ്സ ധമ്മസ്സ ഹേതുപച്ചയേന പച്ചയോ – നീവരണാ ചേവ നീവരണസമ്പയുത്താ ച ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൨)

നീവരണോ ചേവ നീവരണസമ്പയുത്തോ ച ധമ്മോ നീവരണസ്സ ചേവ നീവരണസമ്പയുത്തസ്സ ച നീവരണസമ്പയുത്തസ്സ ചേവ നോ ച നീവരണസ്സ ച ധമ്മസ്സ ഹേതുപച്ചയേന പച്ചയോ – നീവരണാ ചേവ നീവരണസമ്പയുത്താ ച ഹേതൂ സമ്പയുത്തകാനം ഖന്ധാനം നീവരണാനഞ്ച ഹേതുപച്ചയേന പച്ചയോ. (൩)

ആരമ്മണപച്ചയോ

൧൦൧. നീവരണോ ചേവ നീവരണസമ്പയുത്തോ ച ധമ്മോ നീവരണസ്സ ചേവ നീവരണസമ്പയുത്തസ്സ ച ധമ്മസ്സ ആരമ്മണപച്ചയേന പച്ചയോ – നീവരണേ ആരബ്ഭ നീവരണാ ഉപ്പജ്ജന്തി. (മൂലം കാതബ്ബം) നീവരണേ ആരബ്ഭ നീവരണസമ്പയുത്താ ചേവ നോ ച നീവരണാ ഖന്ധാ ഉപ്പജ്ജന്തി. (മൂലം കാതബ്ബം) നീവരണേ ആരബ്ഭ നീവരണാ ച സമ്പയുത്തകാ ച ഖന്ധാ ഉപ്പജ്ജന്തി. (൩)

നീവരണസമ്പയുത്തോ ചേവ നോ ച നീവരണോ ധമ്മോ നീവരണസമ്പയുത്തസ്സ ചേവ നോ ച നീവരണസ്സ ധമ്മസ്സ ആരമ്മണപച്ചയേന പച്ചയോ – നീവരണസമ്പയുത്തേ ചേവ നോ ച നീവരണേ ഖന്ധേ ആരബ്ഭ നീവരണസമ്പയുത്താ ചേവ നോ ച നീവരണാ ഖന്ധാ ഉപ്പജ്ജന്തി. (മൂലം പുച്ഛിതബ്ബം) നീവരണസമ്പയുത്തേ ചേവ നോ ച നീവരണേ ഖന്ധേ ആരബ്ഭ നീവരണാ ഉപ്പജ്ജന്തി. (മൂലം പുച്ഛിതബ്ബം) നീവരണസമ്പയുത്തേ ചേവ നോ ച നീവരണേ ഖന്ധേ ആരബ്ഭ നീവരണാ ച സമ്പയുത്തകാ ച ഖന്ധാ ഉപ്പജ്ജന്തി. (൩)

നീവരണോ ചേവ നീവരണസമ്പയുത്തോ ച നീവരണസമ്പയുത്തോ ചേവ നോ ച നീവരണോ ച ധമ്മാ നീവരണസ്സ ചേവ നീവരണസമ്പയുത്തസ്സ ച ധമ്മസ്സ ആരമ്മണപച്ചയേന പച്ചയോ… തീണി. (൩)

അധിപതിപച്ചയാദി

൧൦൨. നീവരണോ ചേവ നീവരണസമ്പയുത്തോ ച ധമ്മോ നീവരണസ്സ ചേവ നീവരണസമ്പയുത്തസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി… തീണി (ഗരുകാരമ്മണായേവ).

നീവരണസമ്പയുത്തോ ചേവ നോ ച നീവരണോ ധമ്മോ നീവരണസമ്പയുത്തസ്സ ചേവ നോ ച നീവരണസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി നീവരണസമ്പയുത്തേ ചേവ നോ ച നീവരണേ ഖന്ധേ ഗരും കത്വാ നീവരണസമ്പയുത്താ ചേവ നോ ച നീവരണാ ഖന്ധാ ഉപ്പജ്ജന്തി. സഹജാതാധിപതി – നീവരണസമ്പയുത്താ ചേവ നോ ച നീവരണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (മൂലം കാതബ്ബം) ആരമ്മണാധിപതി – നീവരണസമ്പയുത്തേ ചേവ നോ ച നീവരണേ ഖന്ധേ ഗരും കത്വാ നീവരണാ ഉപ്പജ്ജന്തി. സഹജാതാധിപതി – നീവരണസമ്പയുത്താ ചേവ നോ ച നീവരണാധിപതി സമ്പയുത്തകാനം നീവരണാനം അധിപതിപച്ചയേന പച്ചയോ. (മൂലം കാതബ്ബം) ആരമ്മണാധിപതി – നീവരണസമ്പയുത്തേ ചേവ നോ ച നീവരണേ ഖന്ധേ ഗരും കത്വാ നീവരണാ ച സമ്പയുത്തകാ ച ഖന്ധാ ഉപ്പജ്ജന്തി. സഹജാതാധിപതി – നീവരണസമ്പയുത്താ ചേവ നോ ച നീവരണാധിപതി സമ്പയുത്തകാനം ഖന്ധാനം നീവരണാനഞ്ച അധിപതിപച്ചയേന പച്ചയോ. (൩)

൧൦൩. നീവരണോ ചേവ നീവരണസമ്പയുത്തോ ച നീവരണസമ്പയുത്തോ ചേവ നോ ച നീവരണോ ച ധമ്മാ നീവരണസ്സ ചേവ നീവരണസമ്പയുത്തസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി… തീണി. (൩)

അനന്തരപച്ചയേന പച്ചയോ (ആവജ്ജനാപി വുട്ഠാനമ്പി നത്ഥി, സബ്ബത്ഥ പുരിമാ പുരിമാ കാതബ്ബാ)… സമനന്തരപച്ചയേന പച്ചയോ… നവ… സഹജാതപച്ചയേന പച്ചയോ… നവ… അഞ്ഞമഞ്ഞപച്ചയേന പച്ചയോ… നവ… നിസ്സയപച്ചയേന പച്ചയോ… നവ… ഉപനിസ്സയപച്ചയേന പച്ചയോ… നവ (ആരമ്മണസദിസം, വിപാകോ നത്ഥി)… ആസേവനപച്ചയേന പച്ചയോ… പഞ്ച.

കമ്മപച്ചയോ

൧൦൪. നീവരണസമ്പയുത്തോ ചേവ നോ ച നീവരണോ ധമ്മോ നീവരണസമ്പയുത്തസ്സ ചേവ നോ ച നീവരണസ്സ ധമ്മസ്സ കമ്മപച്ചയേന പച്ചയോ – നീവരണസമ്പയുത്താ ചേവ നോ ച നീവരണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. (മൂലം കാതബ്ബം) നീവരണസമ്പയുത്താ ചേവ നോ ച നീവരണാ ചേതനാ സമ്പയുത്തകാനം നീവരണാനം കമ്മപച്ചയേന പച്ചയോ. (മൂലം കാതബ്ബം) നീവരണസമ്പയുത്താ ചേവ നോ ച നീവരണാ ചേതനാ സമ്പയുത്തകാനം ഖന്ധാനം നീവരണാനഞ്ച കമ്മപച്ചയേന പച്ചയോ. (൩)

ആഹാരപച്ചയാദി

൧൦൫. നീവരണസമ്പയുത്തോ ചേവ നോ ച നീവരണോ ധമ്മോ നീവരണസമ്പയുത്തസ്സ ചേവ നോ ച നീവരണസ്സ ധമ്മസ്സ ആഹാരപച്ചയേന പച്ചയോ… തീണി… ഇന്ദ്രിയപച്ചയേന പച്ചയോ… തീണി… ഝാനപച്ചയേന പച്ചയോ… തീണി… മഗ്ഗപച്ചയേന പച്ചയോ… തീണി… സമ്പയുത്തപച്ചയേന പച്ചയോ… നവ… അത്ഥിപച്ചയേന പച്ചയോ… നവ… നത്ഥിപച്ചയേന പച്ചയോ… നവ… വിഗതപച്ചയേന പച്ചയോ… നവ… അവിഗതപച്ചയേന പച്ചയോ … നവ.