൧. വിഭങ്ഗവാരോ

നഹേതുപച്ചയോ

൫. നീവരണം ധമ്മം പടിച്ച നീവരണോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാനീവരണം പടിച്ച അവിജ്ജാനീവരണം, ഉദ്ധച്ചനീവരണം പടിച്ച അവിജ്ജാനീവരണം. (൧)

നോനീവരണം ധമ്മം പടിച്ച നോനീവരണോ ധമ്മോ ഉപ്പജ്ജതി നഹേതുപച്ചയാ – അഹേതുകം നോനീവരണം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ…പേ… അഹേതുകപടിസന്ധിക്ഖണേ…പേ… (യാവ അസഞ്ഞസത്താ). (൧)

നോനീവരണം ധമ്മം പടിച്ച നീവരണോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച അവിജ്ജാനീവരണം. (൨)

൬. നീവരണഞ്ച നോനീവരണഞ്ച ധമ്മം പടിച്ച നീവരണോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാനീവരണഞ്ച സമ്പയുത്തകേ ച ഖന്ധേ പടിച്ച അവിജ്ജാനീവരണം, ഉദ്ധച്ചനീവരണഞ്ച സമ്പയുത്തകേ ച ഖന്ധേ പടിച്ച അവിജ്ജാനീവരണം. (൧)

നആരമ്മണപച്ചയാദി

൭. നീവരണം ധമ്മം പടിച്ച നോനീവരണോ ധമ്മോ ഉപ്പജ്ജതി നആരമ്മണപച്ചയാ – നീവരണേ പടിച്ച ചിത്തസമുട്ഠാനം രൂപം. (൧)

നോനീവരണം ധമ്മം പടിച്ച നോനീവരണോ ധമ്മോ ഉപ്പജ്ജതി നആരമ്മണപച്ചയാ – നോനീവരണേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… (യാവ അസഞ്ഞസത്താ). (൧)

നീവരണഞ്ച നോനീവരണഞ്ച ധമ്മം പടിച്ച നോനീവരണോ ധമ്മോ ഉപ്പജ്ജതി നആരമ്മണപച്ചയാ – നീവരണേ ച സമ്പയുത്തകേ ച ഖന്ധേ പടിച്ച ചിത്തസമുട്ഠാനം രൂപം (സംഖിത്തം)… നഅധിപതിപച്ചയാ… നഅനന്തരപച്ചയാ… നസമനന്തരപച്ചയാ… നഅഞ്ഞമഞ്ഞപച്ചയാ… നഉപനിസ്സയപച്ചയാ.

നപുരേജാതപച്ചയോ

൮. നീവരണം ധമ്മം പടിച്ച നീവരണോ ധമ്മോ ഉപ്പജ്ജതി നപുരേജാതപച്ചയാ – അരൂപേ കാമച്ഛന്ദനീവരണം പടിച്ച ഥിനമിദ്ധനീവരണം ഉദ്ധച്ചനീവരണം അവിജ്ജാനീവരണം, അരൂപേ കാമച്ഛന്ദനീവരണം പടിച്ച ഉദ്ധച്ചനീവരണം അവിജ്ജാനീവരണം, അരൂപേ വിചികിച്ഛാനീവരണം പടിച്ച ഉദ്ധച്ചനീവരണം അവിജ്ജാനീവരണം, അരൂപേ ഉദ്ധച്ചനീവരണം പടിച്ച അവിജ്ജാനീവരണം. (൧)

നീവരണം ധമ്മം പടിച്ച നോനീവരണോ ധമ്മോ ഉപ്പജ്ജതി നപുരേജാതപച്ചയാ – അരൂപേ നീവരണേ പടിച്ച സമ്പയുത്തകാ ഖന്ധാ, നീവരണേ പടിച്ച ചിത്തസമുട്ഠാനം രൂപം. (അവസേസാ പഞ്ഹാ സബ്ബേ വിത്ഥാരേതബ്ബാ. അരൂപം പഠമം കാതബ്ബം, രൂപം പച്ഛാ യഥാ ലഭതി.)

൯. നീവരണഞ്ച നോനീവരണഞ്ച ധമ്മം പടിച്ച നീവരണോ ധമ്മോ ഉപ്പജ്ജതി നപുരേജാതപച്ചയാ – അരൂപേ നോനീവരണേ ഖന്ധേ ച കാമച്ഛന്ദനീവരണഞ്ച പടിച്ച ഥിനമിദ്ധനീവരണം ഉദ്ധച്ചനീവരണം (ചക്കം). (൧)

നീവരണഞ്ച നോനീവരണഞ്ച ധമ്മം പടിച്ച നോനീവരണോ ധമ്മോ ഉപ്പജ്ജതി നപുരേജാതപച്ചയാ – അരൂപേ നോനീവരണം ഏകം ഖന്ധഞ്ച നീവരണേ ച പടിച്ച തയോ ഖന്ധാ…പേ… ദ്വേ ഖന്ധേ ച…പേ… നീവരണേ ച സമ്പയുത്തകേ ച ഖന്ധേ പടിച്ച ചിത്തസമുട്ഠാനം രൂപം, നീവരണേ ച മഹാഭൂതേ ച പടിച്ച ചിത്തസമുട്ഠാനം രൂപം. (൨)

നീവരണഞ്ച നോനീവരണഞ്ച ധമ്മം പടിച്ച നീവരണോ ച നോനീവരണോ ച ധമ്മാ ഉപ്പജ്ജന്തി നപുരേജാതപച്ചയാ – അരൂപേ നോനീവരണം ഏകം ഖന്ധഞ്ച കാമച്ഛന്ദനീവരണഞ്ച പടിച്ച തയോ ഖന്ധാ ഥിനമിദ്ധനീവരണം ഉദ്ധച്ചനീവരണം അവിജ്ജാനീവരണം (ചക്കം. സംഖിത്തം). (൩)