൧. വിഭങ്ഗവാരോ

ഹേതുപച്ചയോ

൧൩. നീവരണം ധമ്മം പച്ചയാ നീവരണോ ധമ്മോ ഉപ്പജ്ജതി ഹേതുപച്ചയാ… തീണി.

നോനീവരണം ധമ്മം പച്ചയാ നോനീവരണോ ധമ്മോ ഉപ്പജ്ജതി ഹേതുപച്ചയാ – നോനീവരണം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… (യാവ അജ്ഝത്തികാ മഹാഭൂതാ), വത്ഥും പച്ചയാ നോനീവരണാ ഖന്ധാ. (൧)

നോനീവരണം ധമ്മം പച്ചയാ നീവരണോ ധമ്മോ ഉപ്പജ്ജതി ഹേതുപച്ചയാ – നോനീവരണേ ഖന്ധേ പച്ചയാ നീവരണാ, വത്ഥും പച്ചയാ നീവരണാ. (൨)

നോനീവരണം ധമ്മം പച്ചയാ നീവരണോ ച നോനീവരണോ ച ധമ്മാ ഉപ്പജ്ജന്തി ഹേതുപച്ചയാ – നോനീവരണം ഏകം ഖന്ധം പച്ചയാ തയോ ഖന്ധാ നീവരണാ ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… വത്ഥും പച്ചയാ നീവരണാ, മഹാഭൂതേ പച്ചയാ ചിത്തസമുട്ഠാനം രൂപം, വത്ഥും പച്ചയാ നീവരണാ ച സമ്പയുത്തകാ ച ഖന്ധാ. (൩)

൧൪. നീവരണഞ്ച നോനീവരണഞ്ച ധമ്മം പച്ചയാ നീവരണോ ധമ്മോ ഉപ്പജ്ജതി ഹേതുപച്ചയാ – കാമച്ഛന്ദനീവരണഞ്ച സമ്പയുത്തകേ ച ഖന്ധേ പച്ചയാ ഥിനമിദ്ധനീവരണം ഉദ്ധച്ചനീവരണം അവിജ്ജാനീവരണം (ചക്കം). കാമച്ഛന്ദനീവരണഞ്ച വത്ഥുഞ്ച പച്ചയാ ഥിനമിദ്ധനീവരണം ഉദ്ധച്ചനീവരണം അവിജ്ജാനീവരണം (ചക്കം). (൧)

നീവരണഞ്ച നോനീവരണഞ്ച ധമ്മം പച്ചയാ നോനീവരണോ ധമ്മോ ഉപ്പജ്ജതി ഹേതുപച്ചയാ – നോനീവരണം ഏകം ഖന്ധഞ്ച നീവരണഞ്ച പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… നീവരണഞ്ച വത്ഥുഞ്ച പച്ചയാ സമ്പയുത്തകാ ഖന്ധാ, നീവരണഞ്ച സമ്പയുത്തകേ ച ഖന്ധേ പച്ചയാ ചിത്തസമുട്ഠാനം രൂപം, നീവരണേ ച മഹാഭൂതേ ച പച്ചയാ ചിത്തസമുട്ഠാനം രൂപം. (൨)

നീവരണഞ്ച നോനീവരണഞ്ച ധമ്മം പച്ചയാ നീവരണോ ച നോനീവരണോ ച ധമ്മാ ഉപ്പജ്ജന്തി ഹേതുപച്ചയാ – നോനീവരണം ഏകം ഖന്ധഞ്ച കാമച്ഛന്ദനീവരണഞ്ച പച്ചയാ തയോ ഖന്ധാ ഥിനമിദ്ധനീവരണം ഉദ്ധച്ചനീവരണം അവിജ്ജാനീവരണം…പേ… ദ്വേ ഖന്ധേ …പേ… (ചക്കം). കാമച്ഛന്ദനീവരണഞ്ച വത്ഥുഞ്ച പച്ചയാ ഥിനമിദ്ധനീവരണം ഉദ്ധച്ചനീവരണം അവിജ്ജാനീവരണം സമ്പയുത്തകാ ച ഖന്ധാ (ചക്കം. സംഖിത്തം). (൩)