൧. വിഭങ്ഗവാരോ

നഹേതുപച്ചയോ

൫. നോഗന്ഥം ധമ്മം പടിച്ച നോഗന്ഥോ ധമ്മോ ഉപ്പജ്ജതി നഹേതുപച്ചയാ – അഹേതുകം നോഗന്ഥം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ (യാവ അസഞ്ഞസത്താ), വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നആരമ്മണപച്ചയാദി

൬. ഗന്ഥം ധമ്മം പടിച്ച നോഗന്ഥോ ധമ്മോ ഉപ്പജ്ജതി നആരമ്മണപച്ചയാ – ഗന്ഥേ പടിച്ച ചിത്തസമുട്ഠാനം രൂപം. (൧)

നോഗന്ഥം ധമ്മം പടിച്ച നോഗന്ഥോ ധമ്മോ ഉപ്പജ്ജതി നആരമ്മണപച്ചയാ – നോഗന്ഥേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… (യാവ അസഞ്ഞസത്താ). (൧)

ഗന്ഥഞ്ച നോഗന്ഥഞ്ച ധമ്മം പടിച്ച നോഗന്ഥോ ധമ്മോ ഉപ്പജ്ജതി നആരമ്മണപച്ചയാ – ഗന്ഥേ ച സമ്പയുത്തകേ ച ഖന്ധേ പടിച്ച ചിത്തസമുട്ഠാനം രൂപം (സംഖിത്തം).

നഅധിപതിപച്ചയാ… നവ, നഅനന്തരപച്ചയാ… തീണി, നസമനന്തരപച്ചയാ… തീണി, നഅഞ്ഞമഞ്ഞപച്ചയാ… തീണി, നഉപനിസ്സയപച്ചയാ… തീണി.

നപുരേജാതപച്ചയാദി

൭. ഗന്ഥം ധമ്മം പടിച്ച ഗന്ഥോ ധമ്മോ ഉപ്പജ്ജതി നപുരേജാതപച്ചയാ – അരൂപേ ഇദംസച്ചാഭിനിവേസം കായഗന്ഥം പടിച്ച അഭിജ്ഝാകായഗന്ഥോ, അഭിജ്ഝാകായഗന്ഥം പടിച്ച ഇദംസച്ചാഭിനിവേസോ കായഗന്ഥോ (അരൂപേ സീലബ്ബതപരാമാസോ നത്ഥി, ഏവം നവ പഞ്ഹാ കാതബ്ബാ), നപച്ഛാജാതേ നവ, നആസേവനേ നവ, നകമ്മേ തീണി, നവിപാകേ നവ, നആഹാരേ ഏകം, നഇന്ദ്രിയേ ഏകം, നഝാനേ ഏകം, നമഗ്ഗേ ഏകം, നസമ്പയുത്തേ തീണി, നവിപ്പയുത്തേ നവ, നോനത്ഥിയാ തീണി, നോവിഗതേ തീണി.