൧. വിഭങ്ഗവാരോ

ഹേതുപച്ചയോ

൧൦൪. ഗന്ഥോ ചേവ ഗന്ഥനിയോ ച ധമ്മോ ഗന്ഥസ്സ ചേവ ഗന്ഥനിയസ്സ ച ധമ്മസ്സ ഹേതുപച്ചയേന പച്ചയോ – ഗന്ഥാ ഹേതൂ സമ്പയുത്തകാനം ഗന്ഥാനം ഹേതുപച്ചയേന പച്ചയോ (ഏവം നവ പഞ്ഹാ വിത്ഥാരേതബ്ബാ).

ആരമ്മണപച്ചയോ

൧൦൫. ഗന്ഥോ ചേവ ഗന്ഥനിയോ ച ധമ്മോ ഗന്ഥസ്സ ചേവ ഗന്ഥനിയസ്സ ച ധമ്മസ്സ ആരമ്മണപച്ചയേന പച്ചയോ – ഗന്ഥേ ആരബ്ഭ ഗന്ഥാ ഉപ്പജ്ജന്തി. (മൂലം പുച്ഛിതബ്ബം) ഗന്ഥേ ആരബ്ഭ ഗന്ഥനിയാ ചേവ നോ ച ഗന്ഥാ ഖന്ധാ ഉപ്പജ്ജന്തി. (മൂലം പുച്ഛിതബ്ബം) ഗന്ഥേ ആരബ്ഭ ഗന്ഥാ ച സമ്പയുത്തകാ ച ഖന്ധാ ഉപ്പജ്ജന്തി. (൩)

൧൦൬. ഗന്ഥനിയോ ചേവ നോ ച ഗന്ഥോ ധമ്മോ ഗന്ഥനിയസ്സ ചേവ നോ ച ഗന്ഥസ്സ ച ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം കത്വാ തം പച്ചവേക്ഖതി, പുബ്ബേ സുചിണ്ണാനി…പേ… ഝാനാ…പേ… അരിയാ ഗോത്രഭും പച്ചവേക്ഖന്തി, വോദാനം പച്ചവേക്ഖന്തി, പഹീനേ കിലേസേ…പേ… വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി, ചക്ഖും…പേ… വത്ഥും ഗന്ഥനിയേ ചേവ നോ ച ഗന്ഥേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി; ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. (സബ്ബം വിത്ഥാരേതബ്ബം) ആവജ്ജനായ ആരമ്മണപച്ചയേന പച്ചയോ. (൧)

ഗന്ഥനിയോ ചേവ നോ ച ഗന്ഥോ ധമ്മോ ഗന്ഥസ്സ ചേവ ഗന്ഥനിയസ്സ ച ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം കത്വാ തം അസ്സാദേതി അഭിനന്ദതി, തം ആരബ്ഭ രാഗോ ഉപ്പജ്ജതി, ദിട്ഠി…പേ… വിചികിച്ഛാ…പേ… ദോമനസ്സം ഉപ്പജ്ജതി; പുബ്ബേ സുചിണ്ണാനി…പേ… ഝാനാ വുട്ഠഹിത്വാ ഝാനം…പേ… ചക്ഖും…പേ… വത്ഥും ഗന്ഥനിയേ ചേവ നോ ച ഗന്ഥേ ഖന്ധേ അസ്സാദേതി അഭിനന്ദതി, തം ആരബ്ഭ രാഗോ ഉപ്പജ്ജതി, ദിട്ഠി…പേ… ദോമനസ്സം ഉപ്പജ്ജതി. (൨)

ഗന്ഥനിയോ ചേവ നോ ച ഗന്ഥോ ധമ്മോ ഗന്ഥസ്സ ചേവ ഗന്ഥനിയസ്സ ച ഗന്ഥനിയസ്സ ചേവ നോ ച ഗന്ഥസ്സ ച ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം…പേ… പുബ്ബേ സുചിണ്ണാനി…പേ… ഝാനാ വുട്ഠഹിത്വാ ഝാനം…പേ… ചക്ഖും…പേ… വത്ഥും ഗന്ഥനിയേ ചേവ നോ ച ഗന്ഥേ ഖന്ധേ അസ്സാദേതി അഭിനന്ദതി, തം ആരബ്ഭ ഗന്ഥാ ച സമ്പയുത്തകാ ച ഖന്ധാ ഉപ്പജ്ജന്തി (ഏവം ഇതരേപി തീണി വിത്ഥാരേതബ്ബാ). (൩)

(ആരബ്ഭ കാതബ്ബാ. ഇമസ്മിം ദുകേ ലോകുത്തരം നത്ഥി, ഗന്ഥദുകസദിസം, നിന്നാനാകരണം. ‘‘ഗന്ഥനിയ’’ന്തി നിയാമേതബ്ബം, മഗ്ഗേ നവ പഞ്ഹാ കാതബ്ബാ.)

ഗന്ഥഗന്ഥനിയദുകം നിട്ഠിതം.