൧. വിഭങ്ഗവാരോ

ഹേതുപച്ചയോ

൬൨. ഗന്ഥസമ്പയുത്തം ധമ്മം സംസട്ഠോ ഗന്ഥസമ്പയുത്തോ ധമ്മോ ഉപ്പജ്ജതി ഹേതുപച്ചയാ – ഗന്ഥസമ്പയുത്തം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ…. (൧)

ഗന്ഥസമ്പയുത്തം ധമ്മം സംസട്ഠോ ഗന്ഥവിപ്പയുത്തോ ധമ്മോ ഉപ്പജ്ജതി ഹേതുപച്ചയാ – ദിട്ഠിഗതവിപ്പയുത്തലോഭസഹഗതേ ഖന്ധേ സംസട്ഠോ ലോഭോ, ദോമനസ്സസഹഗതേ ഖന്ധേ സംസട്ഠം പടിഘം. (൨)

ഗന്ഥസമ്പയുത്തം ധമ്മം സംസട്ഠോ ഗന്ഥസമ്പയുത്തോ ച ഗന്ഥവിപ്പയുത്തോ ച ധമ്മാ ഉപ്പജ്ജന്തി ഹേതുപച്ചയാ – ദിട്ഠിഗതവിപ്പയുത്തലോഭസഹഗതം ഏകം ഖന്ധം സംസട്ഠാ തയോ ഖന്ധാ ലോഭോ ച…പേ… ദ്വേ ഖന്ധേ…പേ… ദോമനസ്സസഹഗതം ഏകം ഖന്ധം സംസട്ഠാ തയോ ഖന്ധാ പടിഘഞ്ച…പേ… ദ്വേ ഖന്ധേ…പേ…. (൩)

൬൩. ഗന്ഥവിപ്പയുത്തം ധമ്മം സംസട്ഠോ ഗന്ഥവിപ്പയുത്തോ ധമ്മോ ഉപ്പജ്ജതി ഹേതുപച്ചയാ – ഗന്ഥവിപ്പയുത്തം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൧)

ഗന്ഥവിപ്പയുത്തം ധമ്മം സംസട്ഠോ ഗന്ഥസമ്പയുത്തോ ധമ്മോ ഉപ്പജ്ജതി ഹേതുപച്ചയാ – ദിട്ഠിഗതവിപ്പയുത്തം ലോഭം സംസട്ഠാ സമ്പയുത്തകാ ഖന്ധാ, പടിഘം സംസട്ഠാ സമ്പയുത്തകാ ഖന്ധാ. (൨)

ഗന്ഥസമ്പയുത്തഞ്ച ഗന്ഥവിപ്പയുത്തഞ്ച ധമ്മം സംസട്ഠോ ഗന്ഥസമ്പയുത്തോ ധമ്മോ ഉപ്പജ്ജതി ഹേതുപച്ചയാ – ദിട്ഠിഗതവിപ്പയുത്തം ലോഭസഹഗതം ഏകം ഖന്ധഞ്ച ലോഭഞ്ച സംസട്ഠാ തയോ ഖന്ധാ…പേ… ദ്വേ ഖന്ധേ…പേ… ദോമനസ്സസഹഗതം ഏകം ഖന്ധഞ്ച പടിഘഞ്ച സംസട്ഠാ തയോ ഖന്ധാ…പേ… ദ്വേ ഖന്ധേ…പേ… (സംഖിത്തം).