൧. വിഭങ്ഗവാരോ

ഹേതുപച്ചയോ

൧. ഗന്ഥം ധമ്മം പടിച്ച ഗന്ഥോ ധമ്മോ ഉപ്പജ്ജതി ഹേതുപച്ചയാ – സീലബ്ബതപരാമാസം കായഗന്ഥം പടിച്ച അഭിജ്ഝാകായഗന്ഥോ, അഭിജ്ഝാകായഗന്ഥം പടിച്ച സീലബ്ബതപരാമാസോ കായഗന്ഥോ, ഇദംസച്ചാഭിനിവേസം കായഗന്ഥം പടിച്ച അഭിജ്ഝാകായഗന്ഥോ, അഭിജ്ഝാകായഗന്ഥം പടിച്ച ഇദംസച്ചാഭിനിവേസോ കായഗന്ഥോ. (൧)

ഗന്ഥം ധമ്മം പടിച്ച നോഗന്ഥോ ധമ്മോ ഉപ്പജ്ജതി ഹേതുപച്ചയാ – ഗന്ഥേ പടിച്ച സമ്പയുത്തകാ ഖന്ധാ ചിത്തസമുട്ഠാനഞ്ച രൂപം. (൨)

ഗന്ഥം ധമ്മം പടിച്ച ഗന്ഥോ ച നോഗന്ഥോ ച ധമ്മാ ഉപ്പജ്ജന്തി ഹേതുപച്ചയാ – സീലബ്ബതപരാമാസം കായഗന്ഥം പടിച്ച അഭിജ്ഝാകായഗന്ഥോ സമ്പയുത്തകാ ച ഖന്ധാ ചിത്തസമുട്ഠാനഞ്ച രൂപം (ചക്കം). (൩)

൨. നോഗന്ഥം ധമ്മം പടിച്ച നോഗന്ഥോ ധമ്മോ ഉപ്പജ്ജതി ഹേതുപച്ചയാ – നോഗന്ഥം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ, ഏകം മഹാഭൂതം…പേ…. (൧)

നോഗന്ഥം ധമ്മം പടിച്ച ഗന്ഥോ ധമ്മോ ഉപ്പജ്ജതി ഹേതുപച്ചയാ – നോഗന്ഥേ ഖന്ധേ പടിച്ച ഗന്ഥാ. (൨)

നോഗന്ഥം ധമ്മം പടിച്ച ഗന്ഥോ ച നോഗന്ഥോ ച ധമ്മാ ഉപ്പജ്ജന്തി ഹേതുപച്ചയാ – നോഗന്ഥം ഏകം ഖന്ധം പടിച്ച തയോ ഖന്ധാ ഗന്ഥാ ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ…. (൩)

൩. ഗന്ഥഞ്ച നോഗന്ഥഞ്ച ധമ്മം പടിച്ച ഗന്ഥോ ധമ്മോ ഉപ്പജ്ജതി ഹേതുപച്ചയാ – സീലബ്ബതപരാമാസം കായഗന്ഥഞ്ച സമ്പയുത്തകേ ച ഖന്ധേ പടിച്ച അഭിജ്ഝാകായഗന്ഥോ (ചക്കം). (൧)

ഗന്ഥഞ്ച നോഗന്ഥഞ്ച ധമ്മം പടിച്ച നോഗന്ഥോ ധമ്മോ ഉപ്പജ്ജതി ഹേതുപച്ചയാ – നോഗന്ഥം ഏകം ഖന്ധഞ്ച ഗന്ഥേ ച പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ ച…പേ… ഗന്ഥേ ച സമ്പയുത്തകേ ഖന്ധേ ച പടിച്ച ചിത്തസമുട്ഠാനം രൂപം. (൨)

ഗന്ഥഞ്ച നോഗന്ഥഞ്ച ധമ്മം പടിച്ച ഗന്ഥോ ച നോഗന്ഥോ ച ധമ്മാ ഉപ്പജ്ജന്തി ഹേതുപച്ചയാ – നോഗന്ഥം ഏകം ഖന്ധഞ്ച സീലബ്ബതപരാമാസകായഗന്ഥഞ്ച പടിച്ച തയോ ഖന്ധാ അഭിജ്ഝാകായഗന്ഥോ ചിത്തസമുട്ഠാനഞ്ച രൂപം…പേ… ദ്വേ ഖന്ധേ ച…പേ…. (ചക്കം. സംഖിത്തം.) (൩)

ആരമ്മണപച്ചയാ…പേ… അവിഗതപച്ചയാ.