൧. വിഭങ്ഗവാരോ

ഹേതുപച്ചയോ

൧൧. ഗന്ഥം ധമ്മം പച്ചയാ ഗന്ഥോ ധമ്മോ ഉപ്പജ്ജതി ഹേതുപച്ചയാ… തീണി (പടിച്ചവാരസദിസോ).

നോഗന്ഥം ധമ്മം പച്ചയാ നോഗന്ഥോ ധമ്മോ ഉപ്പജ്ജതി ഹേതുപച്ചയാ – നോഗന്ഥം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ… ഖന്ധേ പച്ചയാ വത്ഥു, വത്ഥും പച്ചയാ ഖന്ധാ. ഏകം മഹാഭൂതം…പേ… വത്ഥും പച്ചയാ നോഗന്ഥാ ഖന്ധാ. (൧)

നോഗന്ഥം ധമ്മം പച്ചയാ ഗന്ഥോ ധമ്മോ ഉപ്പജ്ജതി ഹേതുപച്ചയാ – നോഗന്ഥേ ഖന്ധേ പച്ചയാ ഗന്ഥാ, വത്ഥും പച്ചയാ ഗന്ഥാ. (൨)

നോഗന്ഥം ധമ്മം പച്ചയാ ഗന്ഥോ ച നോഗന്ഥോ ച ധമ്മാ ഉപ്പജ്ജന്തി ഹേതുപച്ചയാ – നോഗന്ഥം ഏകം ഖന്ധം പച്ചയാ തയോ ഖന്ധാ ഗന്ഥാ ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… വത്ഥും പച്ചയാ ഗന്ഥാ സമ്പയുത്തകാ ച ഖന്ധാ. (൩)

൧൨. ഗന്ഥഞ്ച നോഗന്ഥഞ്ച ധമ്മം പച്ചയാ ഗന്ഥോ ധമ്മോ ഉപ്പജ്ജതി ഹേതുപച്ചയാ – സീലബ്ബതപരാമാസം കായഗന്ഥഞ്ച സമ്പയുത്തകേ ച ഖന്ധേ പച്ചയാ അഭിജ്ഝാകായഗന്ഥോ (ചക്കം). സീലബ്ബതപരാമാസം കായഗന്ഥഞ്ച വത്ഥുഞ്ച പച്ചയാ അഭിജ്ഝാകായഗന്ഥോ (ചക്കം). (൧)

ഗന്ഥഞ്ച നോഗന്ഥഞ്ച ധമ്മം പച്ചയാ നോഗന്ഥോ ധമ്മോ ഉപ്പജ്ജതി ഹേതുപച്ചയാ – നോഗന്ഥം ഏകം ഖന്ധഞ്ച ഗന്ഥേ ച പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… ഗന്ഥേ ച വത്ഥുഞ്ച പച്ചയാ നോഗന്ഥാ ഖന്ധാ. (൨)

ഗന്ഥഞ്ച നോഗന്ഥഞ്ച ധമ്മം പച്ചയാ ഗന്ഥോ ച നോഗന്ഥോ ച ധമ്മാ ഉപ്പജ്ജന്തി ഹേതുപച്ചയാ – നോഗന്ഥം ഏകം ഖന്ധഞ്ച സീലബ്ബതപരാമാസം കായഗന്ഥഞ്ച പച്ചയാ തയോ ഖന്ധാ അഭിജ്ഝാകായഗന്ഥോ ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… (ചക്കം). സീലബ്ബതപരാമാസം കായഗന്ഥഞ്ച വത്ഥുഞ്ച പച്ചയാ അഭിജ്ഝാകായഗന്ഥോ ച സമ്പയുത്തകാ ച ഖന്ധാ (ചക്കം). (൩)