൧. വിഭങ്ഗവാരോ

ഹേതുപച്ചയോ

൧൦൬. സഞ്ഞോജനോ ചേവ സഞ്ഞോജനസമ്പയുത്തോ ച ധമ്മോ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച ധമ്മസ്സ ഹേതുപച്ചയേന പച്ചയോ – കാമരാഗസഞ്ഞോജനോ ദിട്ഠിസഞ്ഞോജനസ്സ അവിജ്ജാസഞ്ഞോജനസ്സ ഹേതുപച്ചയേന പച്ചയോ (ചക്കം). (൧)

സഞ്ഞോജനോ ചേവ സഞ്ഞോജനസമ്പയുത്തോ ച ധമ്മോ സഞ്ഞോജനസമ്പയുത്തസ്സ ചേവ നോ ച സഞ്ഞോജനസ്സ ധമ്മസ്സ ഹേതുപച്ചയേന പച്ചയോ – സഞ്ഞോജനാ ചേവ സഞ്ഞോജനസമ്പയുത്താ ച ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൨)

സഞ്ഞോജനോ ചേവ സഞ്ഞോജനസമ്പയുത്തോ ച ധമ്മോ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച സഞ്ഞോജനസമ്പയുത്തസ്സ ചേവ നോ ച സഞ്ഞോജനസ്സ ച ധമ്മസ്സ ഹേതുപച്ചയേന പച്ചയോ – കാമരാഗസഞ്ഞോജനോ ദിട്ഠിസഞ്ഞോജനസ്സ അവിജ്ജാസഞ്ഞോജനസ്സ സമ്പയുത്തകാനഞ്ച ഖന്ധാനം ഹേതുപച്ചയേന പച്ചയോ (ചക്കം). (൩)

ആരമ്മണപച്ചയോ

൧൦൭. സഞ്ഞോജനോ ചേവ സഞ്ഞോജനസമ്പയുത്തോ ച ധമ്മോ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച ധമ്മസ്സ ആരമ്മണപച്ചയേന പച്ചയോ – സഞ്ഞോജനേ ആരബ്ഭ സഞ്ഞോജനാ ഉപ്പജ്ജന്തി. (മൂലം കാതബ്ബം) സഞ്ഞോജനേ ആരബ്ഭ സഞ്ഞോജനസമ്പയുത്താ ചേവ നോ ച സഞ്ഞോജനാ ഖന്ധാ ഉപ്പജ്ജന്തി. (മൂലം കാതബ്ബം) സഞ്ഞോജനേ ആരബ്ഭ സഞ്ഞോജനാ ച സഞ്ഞോജനസമ്പയുത്തകാ ച ഖന്ധാ ഉപ്പജ്ജന്തി. (൧)

സഞ്ഞോജനസമ്പയുത്തോ ചേവ നോ ച സഞ്ഞോജനോ ധമ്മോ സഞ്ഞോജനസമ്പയുത്തസ്സ ചേവ നോ ച സഞ്ഞോജനസ്സ ധമ്മസ്സ ആരമ്മണപച്ചയേന പച്ചയോ – സഞ്ഞോജനസമ്പയുത്തേ ചേവ നോ ച സഞ്ഞോജനേ ഖന്ധേ ആരബ്ഭ സഞ്ഞോജനസമ്പയുത്താ ചേവ നോ ച സഞ്ഞോജനാ ഖന്ധാ ഉപ്പജ്ജന്തി. (൧)

സഞ്ഞോജനസമ്പയുത്തോ ചേവ നോ ച സഞ്ഞോജനോ ധമ്മോ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച ധമ്മസ്സ ആരമ്മണപച്ചയേന പച്ചയോ – സഞ്ഞോജനസമ്പയുത്തേ ചേവ നോ ച സഞ്ഞോജനേ ഖന്ധേ ആരബ്ഭ സഞ്ഞോജനാ ഉപ്പജ്ജന്തി. (൨)

സഞ്ഞോജനസമ്പയുത്തോ ചേവ നോ ച സഞ്ഞോജനോ ധമ്മോ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച സഞ്ഞോജനസമ്പയുത്തസ്സ ചേവ നോ ച സഞ്ഞോജനസ്സ ച ധമ്മസ്സ ആരമ്മണപച്ചയേന പച്ചയോ – സഞ്ഞോജനസമ്പയുത്തേ ചേവ നോ ച സഞ്ഞോജനേ ഖന്ധേ ആരബ്ഭ സഞ്ഞോജനാ ച സഞ്ഞോജനസമ്പയുത്തകാ ച ഖന്ധാ ഉപ്പജ്ജന്തി. (൩)

സഞ്ഞോജനോ ചേവ സഞ്ഞോജനസമ്പയുത്തോ ച സഞ്ഞോജനസമ്പയുത്തോ ചേവ നോ ച സഞ്ഞോജനോ ച ധമ്മാ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച ധമ്മസ്സ ആരമ്മണപച്ചയേന പച്ചയോ… തീണി.

അധിപതിപച്ചയോ

൧൦൮. സഞ്ഞോജനോ ചേവ സഞ്ഞോജനസമ്പയുത്തോ ച ധമ്മോ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി… തീണി.

സഞ്ഞോജനസമ്പയുത്തോ ചേവ നോ ച സഞ്ഞോജനോ ധമ്മോ സഞ്ഞോജനസമ്പയുത്തസ്സ ചേവ നോ ച സഞ്ഞോജനസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി… തീണി (ഇമാസു തീസുപി പഞ്ഹാസു ആരമ്മണാധിപതിപി സഹജാതാധിപതിപി കാതബ്ബാ).

സഞ്ഞോജനോ ചേവ സഞ്ഞോജനസമ്പയുത്തോ ച സഞ്ഞോജനസമ്പയുത്തോ ചേവ നോ ച സഞ്ഞോജനോ ച ധമ്മാ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി… തീണി.

അനന്തരപച്ചയാദി

൧൦൯. സഞ്ഞോജനോ ചേവ സഞ്ഞോജനസമ്പയുത്തോ ച ധമ്മോ സഞ്ഞോജനസ്സ ചേവ സഞ്ഞോജനസമ്പയുത്തസ്സ ച ധമ്മസ്സ അനന്തരപച്ചയേന പച്ചയോ… നവ (നിന്നാനാകരണം, വിഭജനാ നത്ഥി. ആരമ്മണസദിസാ)… സമനന്തരപച്ചയേന പച്ചയോ… നവ… സഹജാതപച്ചയേന പച്ചയോ… നവ… അഞ്ഞമഞ്ഞപച്ചയേന പച്ചയോ… നവ… നിസ്സയപച്ചയേന പച്ചയോ… നവ… ഉപനിസ്സയപച്ചയേന പച്ചയോ… നവ (ആരമ്മണനയേന കാതബ്ബാ)… ആസേവനപച്ചയേന പച്ചയോ… നവ.

കമ്മപച്ചയാദി

൧൧൦. സഞ്ഞോജനസമ്പയുത്തോ ചേവ നോ ച സഞ്ഞോജനോ ധമ്മോ സഞ്ഞോജനസമ്പയുത്തസ്സ ചേവ നോ ച സഞ്ഞോജനസ്സ ധമ്മസ്സ കമ്മപച്ചയേന പച്ചയോ… തീണി… ആഹാരപച്ചയേന പച്ചയോ… തീണി… ഇന്ദ്രിയപച്ചയേന പച്ചയോ… തീണി… ഝാനപച്ചയേന പച്ചയോ… തീണി… മഗ്ഗപച്ചയേന പച്ചയോ… നവ … സമ്പയുത്തപച്ചയേന പച്ചയോ… നവ… അത്ഥിപച്ചയേന പച്ചയോ … നവ… നത്ഥിപച്ചയേന പച്ചയോ… നവ… വിഗതപച്ചയേന പച്ചയോ… നവ… അവിഗതപച്ചയേന പച്ചയോ… നവ.