൧-൪. പച്ചയാനുലോമാദി

ഹേതുപച്ചയോ

൧൦. സഞ്ഞോജനം ധമ്മം പച്ചയാ സഞ്ഞോജനോ ധമ്മോ ഉപ്പജ്ജതി ഹേതുപച്ചയാ… തീണി (പടിച്ചസദിസം).

നോസഞ്ഞോജനം ധമ്മം പച്ചയാ നോസഞ്ഞോജനോ ധമ്മോ ഉപ്പജ്ജതി ഹേതുപച്ചയാ – നോസഞ്ഞോജനം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ… ഖന്ധേ പച്ചയാ വത്ഥു, വത്ഥും പച്ചയാ ഖന്ധാ, ഏകം മഹാഭൂതം…പേ… മഹാഭൂതേ പച്ചയാ ചിത്തസമുട്ഠാനം രൂപം, കടത്താരൂപം, ഉപാദാരൂപം, വത്ഥും പച്ചയാ നോസഞ്ഞോജനാ ഖന്ധാ. (൧)

നോസഞ്ഞോജനം ധമ്മം പച്ചയാ സഞ്ഞോജനോ ധമ്മോ ഉപ്പജ്ജതി ഹേതുപച്ചയാ – നോസഞ്ഞോജനേ ഖന്ധേ പച്ചയാ സഞ്ഞോജനാ, വത്ഥും പച്ചയാ സഞ്ഞോജനാ. (൨)

നോസഞ്ഞോജനം ധമ്മം പച്ചയാ സഞ്ഞോജനോ ച നോസഞ്ഞോജനോ ച ധമ്മാ ഉപ്പജ്ജന്തി ഹേതുപച്ചയാ – നോസഞ്ഞോജനം ഏകം ഖന്ധം പച്ചയാ തയോ ഖന്ധാ സഞ്ഞോജനഞ്ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… വത്ഥും പച്ചയാ സഞ്ഞോജനാ, മഹാഭൂതേ പച്ചയാ ചിത്തസമുട്ഠാനം രൂപം, വത്ഥും പച്ചയാ സഞ്ഞോജനാ സമ്പയുത്തകാ ച ഖന്ധാ. (൩)

൧൧. സഞ്ഞോജനഞ്ച നോസഞ്ഞോജനഞ്ച ധമ്മം പച്ചയാ സഞ്ഞോജനോ ധമ്മോ ഉപ്പജ്ജതി ഹേതുപച്ചയാ – കാമരാഗസഞ്ഞോജനഞ്ച സമ്പയുത്തകേ ച ഖന്ധേ പച്ചയാ ദിട്ഠിസഞ്ഞോജനം അവിജ്ജാസഞ്ഞോജനം, കാമരാഗസഞ്ഞോജനഞ്ച വത്ഥുഞ്ച പച്ചയാ ദിട്ഠിസഞ്ഞോജനം അവിജ്ജാസഞ്ഞോജനം (ചക്കം) (൧)

സഞ്ഞോജനഞ്ച നോസഞ്ഞോജനഞ്ച ധമ്മം പച്ചയാ നോസഞ്ഞോജനോ ധമ്മോ ഉപ്പജ്ജതി ഹേതുപച്ചയാ – നോസഞ്ഞോജനം ഏകം ഖന്ധഞ്ച സഞ്ഞോജനേ ച പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… (ചക്കം). സഞ്ഞോജനേ ച വത്ഥുഞ്ച പച്ചയാ നോസഞ്ഞോജനാ ഖന്ധാ. (൨)

സഞ്ഞോജനഞ്ച നോസഞ്ഞോജനഞ്ച ധമ്മം പച്ചയാ സഞ്ഞോജനോ ച നോസഞ്ഞോജനോ ച ധമ്മാ ഉപ്പജ്ജന്തി ഹേതുപച്ചയാ – നോസഞ്ഞോജനം ഏകം ഖന്ധഞ്ച കാമരാഗസഞ്ഞോജനഞ്ച പച്ചയാ തയോ ഖന്ധാ ദിട്ഠിസഞ്ഞോജനം അവിജ്ജാസഞ്ഞോജനം ചിത്തസമുട്ഠാനഞ്ച രൂപം, ദ്വേ ഖന്ധേ…പേ… (ചക്കം). കാമരാഗസഞ്ഞോജനഞ്ച വത്ഥുഞ്ച പച്ചയാ ദിട്ഠിസഞ്ഞോജനം അവിജ്ജാസഞ്ഞോജനം സമ്പയുത്തകാ ച ഖന്ധാ (ചക്കം. സംഖിത്തം). (൩)

൧൨. ഹേതുയാ നവ, ആരമ്മണേ നവ (സബ്ബത്ഥ നവ), വിപാകേ ഏകം…പേ… അവിഗതേ നവ.

൧൩. നഹേതുയാ ചത്താരി (യത്ഥ യത്ഥ വത്ഥു ലബ്ഭതി, തത്ഥ തത്ഥ നിന്നേതബ്ബം), നആരമ്മണേ തീണി…പേ… നോവിഗതേ തീണി.