൧. വിഭങ്ഗവാരോ

ഹേതുപച്ചയോ

൯൩. രൂപിം ധമ്മം പടിച്ച രൂപീ ധമ്മോ ഉപ്പജ്ജതി ഹേതുപച്ചയാ – ഏകം മഹാഭൂതം പടിച്ച തയോ മഹാഭൂതാ…പേ… ദ്വേ മഹാഭൂതേ…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. (൧)

രൂപിം ധമ്മം പടിച്ച അരൂപീ ധമ്മോ ഉപ്പജ്ജതി ഹേതുപച്ചയാ – പടിസന്ധിക്ഖണേ വത്ഥും പടിച്ച അരൂപിനോ ഖന്ധാ. (൨)

രൂപിം ധമ്മം പടിച്ച രൂപീ ച അരൂപീ ച ധമ്മാ ഉപ്പജ്ജന്തി ഹേതുപച്ചയാ – പടിസന്ധിക്ഖണേ വത്ഥും പടിച്ച അരൂപിനോ ഖന്ധാ, മഹാഭൂതേ പടിച്ച കടത്താരൂപം. (൩)

൯൪. അരൂപിം ധമ്മം പടിച്ച അരൂപീ ധമ്മോ ഉപ്പജ്ജതി ഹേതുപച്ചയാ – അരൂപിം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൧)

അരൂപിം ധമ്മം പടിച്ച രൂപീ ധമ്മോ ഉപ്പജ്ജതി ഹേതുപച്ചയാ – അരൂപിനോ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ…. (൨)

അരൂപിം ധമ്മം പടിച്ച രൂപീ ച അരൂപീ ച ധമ്മാ ഉപ്പജ്ജന്തി ഹേതുപച്ചയാ – അരൂപിം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൩)

൯൫. രൂപിഞ്ച അരൂപിഞ്ച ധമ്മം പടിച്ച രൂപീ ധമ്മോ ഉപ്പജ്ജതി ഹേതുപച്ചയാ – അരൂപിനോ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ…. (൧)

രൂപിഞ്ച അരൂപിഞ്ച ധമ്മം പടിച്ച അരൂപീ ധമ്മോ ഉപ്പജ്ജതി ഹേതുപച്ചയാ – പടിസന്ധിക്ഖണേ അരൂപിം ഏകം ഖന്ധഞ്ച വത്ഥുഞ്ച പടിച്ച തയോ ഖന്ധാ…പേ… ദ്വേ ഖന്ധേ…പേ…. (൨)

രൂപിഞ്ച അരൂപിഞ്ച ധമ്മം പടിച്ച രൂപീ ച അരൂപീ ച ധമ്മാ ഉപ്പജ്ജന്തി ഹേതുപച്ചയാ – പടിസന്ധിക്ഖണേ അരൂപിം ഏകം ഖന്ധഞ്ച വത്ഥുഞ്ച പടിച്ച തയോ ഖന്ധാ…പേ… ദ്വേ ഖന്ധേ…പേ… അരൂപിനോ ഖന്ധേ ച മഹാഭൂതേ ച പടിച്ച കടത്താരൂപം (സംഖിത്തം). (൩)