൨. സങ്ഖ്യാവാരോ

സുദ്ധം

൮൬. ഹേതുയാ തീണി, ആരമ്മണേ ദ്വേ, അധിപതിയാ ചത്താരി, അനന്തരേ ഏകം, സമനന്തരേ ഏകം, സഹജാതേ നവ, അഞ്ഞമഞ്ഞേ ഛ, നിസ്സയേ നവ, ഉപനിസ്സയേ ദ്വേ, പുരേജാതേ തീണി, പച്ഛാജാതേ തീണി, ആസേവനേ ഏകം, കമ്മേ തീണി, വിപാകേ തീണി, ആഹാരേ തീണി, ഇന്ദ്രിയേ പഞ്ച, ഝാനേ തീണി, മഗ്ഗേ തീണി, സമ്പയുത്തേ ഏകം, വിപ്പയുത്തേ ചത്താരി, അത്ഥിയാ നവ, നത്ഥിയാ ഏകം, വിഗതേ ഏകം, അവിഗതേ നവ (ഏവം ഗണേതബ്ബം).

അനുലോമം.

൨. പച്ചനീയുദ്ധാരോ

൮൭. സപ്പടിഘോ ധമ്മോ സപ്പടിഘസ്സ ധമ്മസ്സ സഹജാതപച്ചയേന പച്ചയോ. (൧)

സപ്പടിഘോ ധമ്മോ അപ്പടിഘസ്സ ധമ്മസ്സ ആരമ്മണപച്ചയേന പച്ചയോ, സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ… പുരേജാതപച്ചയേന പച്ചയോ. (൨)

സപ്പടിഘോ ധമ്മോ സപ്പടിഘസ്സ ച അപ്പടിഘസ്സ ച ധമ്മസ്സ സഹജാതപച്ചയേന പച്ചയോ. (൩)

൮൮. അപ്പടിഘോ ധമ്മോ അപ്പടിഘസ്സ ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ… പുരേജാതപച്ചയേന പച്ചയോ… പച്ഛാജാതപച്ചയേന പച്ചയോ… കമ്മപച്ചയേന പച്ചയോ… ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ. (൧)

അപ്പടിഘോ ധമ്മോ സപ്പടിഘസ്സ ധമ്മസ്സ സഹജാതപച്ചയേന പച്ചയോ … പച്ഛാജാതപച്ചയേന പച്ചയോ… കമ്മപച്ചയേന പച്ചയോ… ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ. (൨)

അപ്പടിഘോ ധമ്മോ സപ്പടിഘസ്സ ച അപ്പടിഘസ്സ ച ധമ്മസ്സ സഹജാതപച്ചയേന പച്ചയോ… പച്ഛാജാതപച്ചയേന പച്ചയോ… കമ്മപച്ചയേന പച്ചയോ… ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ. (൩)

൮൯. സപ്പടിഘോ ച അപ്പടിഘോ ച ധമ്മാ സപ്പടിഘസ്സ ധമ്മസ്സ സഹജാതപച്ചയേന പച്ചയോ. (൧)

സപ്പടിഘോ ച അപ്പടിഘോ ച ധമ്മാ അപ്പടിഘസ്സ ധമ്മസ്സ സഹജാതം, പുരേജാതം. (൨)

സപ്പടിഘോ ച അപ്പടിഘോ ച ധമ്മാ സപ്പടിഘസ്സ ച അപ്പടിഘസ്സ ച ധമ്മസ്സ സഹജാതപച്ചയേന പച്ചയോ. (൩)