൧. വിഭങ്ഗവാരോ

നഹേതുപച്ചയോ

൬. നോഉപാദാനം ധമ്മം പടിച്ച നോഉപാദാനോ ധമ്മോ ഉപ്പജ്ജതി നഹേതുപച്ചയാ – അഹേതുകം നോഉപാദാനം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ, ഏകം മഹാഭൂതം…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ… വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നആരമ്മണപച്ചയാദി

൭. ഉപാദാനം ധമ്മം പടിച്ച നോഉപാദാനോ ധമ്മോ ഉപ്പജ്ജതി നആരമ്മണപച്ചയാ – ഉപാദാനേ പടിച്ച ചിത്തസമുട്ഠാനം രൂപം. (൧)

നോഉപാദാനം ധമ്മം പടിച്ച നോഉപാദാനോ ധമ്മോ ഉപ്പജ്ജതി നആരമ്മണപച്ചയാ – നോഉപാദാനേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ നോഉപാദാനേ ഖന്ധേ പടിച്ച കടത്താരൂപം, ഖന്ധേ പടിച്ച വത്ഥു, ഏകം മഹാഭൂതം…പേ… (യാവ അസഞ്ഞസത്താ). (൧)

ഉപാദാനഞ്ച നോഉപാദാനം ച ധമ്മം പടിച്ച നോഉപാദാനോ ധമ്മോ ഉപ്പജ്ജതി നആരമ്മണപച്ചയാ – ഉപാദാനേ ച സമ്പയുത്തകേ ച ഖന്ധേ പടിച്ച ചിത്തസമുട്ഠാനം രൂപം, ഉപാദാനേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

നഅധിപതിപച്ചയാ… നഅനന്തരപച്ചയാ…പേ… നഉപനിസ്സയപച്ചയാ.

നപുരേജാതപച്ചയോ

൮. ഉപാദാനം ധമ്മം പടിച്ച ഉപാദാനോ ധമ്മോ ഉപ്പജ്ജതി നപുരേജാതപച്ചയാ – അരൂപേ അത്തവാദുപാദാനം പടിച്ച കാമുപാദാനം, കാമുപാദാനം പടിച്ച അത്തവാദുപാദാനം. (൧)

ഉപാദാനം ധമ്മം പടിച്ച നോഉപാദാനോ ധമ്മോ ഉപ്പജ്ജതി നപുരേജാതപച്ചയാ – അരൂപേ ഉപാദാനേ പടിച്ച സമ്പയുത്തകാ ഖന്ധാ, ഉപാദാനേ പടിച്ച ചിത്തസമുട്ഠാനം രൂപം (സംഖിത്തം, നവപി പഞ്ഹാ അരൂപേ ദ്വേ ഉപാദാനാ).