൧. വിഭങ്ഗവാരോ

നഹേതുപച്ചയോ

൫൧. ഉപാദാനവിപ്പയുത്തം ധമ്മം പടിച്ച ഉപാദാനവിപ്പയുത്തോ ധമ്മോ ഉപ്പജ്ജതി നഹേതുപച്ചയാ – അഹേതുകം ഉപാദാനവിപ്പയുത്തം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… (യാവ അസഞ്ഞസത്താ) വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നആരമ്മണപച്ചയാദി

൫൨. ഉപാദാനസമ്പയുത്തം ധമ്മം പടിച്ച ഉപാദാനവിപ്പയുത്തോ ധമ്മോ ഉപ്പജ്ജതി നആരമ്മണപച്ചയാ – ഉപാദാനസമ്പയുത്തേ ഖന്ധേ പടിച്ച ചിത്തസമുട്ഠാനം രൂപം. (൧)

ഉപാദാനവിപ്പയുത്തം ധമ്മം പടിച്ച ഉപാദാനവിപ്പയുത്തോ ധമ്മോ ഉപ്പജ്ജതി നആരമ്മണപച്ചയാ – ഉപാദാനവിപ്പയുത്തേ ഖന്ധേ പടിച്ച ചിത്തസമുട്ഠാനം രൂപം, ദിട്ഠിഗതവിപ്പയുത്തം ലോഭം പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… (യാവ അസഞ്ഞസത്താ). (൧)

ഉപാദാനസമ്പയുത്തഞ്ച ഉപാദാനവിപ്പയുത്തഞ്ച ധമ്മം പടിച്ച ഉപാദാനവിപ്പയുത്തോ ധമ്മോ ഉപ്പജ്ജതി നആരമ്മണപച്ചയാ – ഉപാദാനസമ്പയുത്തേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം, ദിട്ഠിഗതവിപ്പയുത്തലോഭസഹഗതേ ഖന്ധേ ച ലോഭഞ്ച പടിച്ച ചിത്തസമുട്ഠാനം രൂപം. (൧)

നഅധിപതിപച്ചയാ… നഅനന്തരപച്ചയാ… നസമനന്തരപച്ചയാ… നഉപനിസ്സയപച്ചയാ.

നപുരേജാതപച്ചയാദി

൫൩. ഉപാദാനസമ്പയുത്തം ധമ്മം പടിച്ച ഉപാദാനസമ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ ഉപാദാനസമ്പയുത്തം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ…. (൧)

ഉപാദാനസമ്പയുത്തം ധമ്മം പടിച്ച ഉപാദാനവിപ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ ദിട്ഠിഗതവിപ്പയുത്തലോഭസഹഗതേ ഖന്ധേ പടിച്ച ലോഭോ, ഉപാദാനസമ്പയുത്തേ ഖന്ധേ പടിച്ച ചിത്തസമുട്ഠാനം രൂപം. (൨)

ഉപാദാനസമ്പയുത്തം ധമ്മം പടിച്ച ഉപാദാനസമ്പയുത്തോ ച ഉപാദാനവിപ്പയുത്തോ ച ധമ്മാ ഉപ്പജ്ജന്തി നപുരേജാതപച്ചയാ – അരൂപേ ദിട്ഠിഗതവിപ്പയുത്തലോഭസഹഗതം ഏകം ഖന്ധം പടിച്ച തയോ ഖന്ധാ ലോഭോ ച…പേ… ദ്വേ ഖന്ധേ…പേ…. (൩)

൫൪. ഉപാദാനവിപ്പയുത്തം ധമ്മം പടിച്ച ഉപാദാനവിപ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ ഉപാദാനവിപ്പയുത്തം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… ഉപാദാനവിപ്പയുത്തേ ഖന്ധേ പടിച്ച ചിത്തസമുട്ഠാനം രൂപം, ദിട്ഠിഗതവിപ്പയുത്തം ലോഭം പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… (യാവ അസഞ്ഞസത്താ). (൧)

ഉപാദാനവിപ്പയുത്തം ധമ്മം പടിച്ച ഉപാദാനസമ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ ദിട്ഠിഗതവിപ്പയുത്തം ലോഭം പടിച്ച സമ്പയുത്തകാ ഖന്ധാ. (൨)

ഉപാദാനസമ്പയുത്തഞ്ച ഉപാദാനവിപ്പയുത്തഞ്ച ധമ്മം പടിച്ച ഉപാദാനസമ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ ദിട്ഠിഗതവിപ്പയുത്തലോഭസഹഗതം ഏകം ഖന്ധഞ്ച ലോഭഞ്ച പടിച്ച തയോ ഖന്ധാ…പേ… ദ്വേ ഖന്ധേ ച…പേ…. (൧)

ഉപാദാനസമ്പയുത്തഞ്ച ഉപാദാനവിപ്പയുത്തഞ്ച ധമ്മം പടിച്ച ഉപാദാനവിപ്പയുത്തോ ധമ്മോ ഉപ്പജ്ജതി നപുരേജാതപച്ചയാ – ഉപാദാനസമ്പയുത്തേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം, ദിട്ഠിഗതവിപ്പയുത്തലോഭസഹഗതേ ഖന്ധേ ച ലോഭഞ്ച പടിച്ച ചിത്തസമുട്ഠാനം രൂപം. (൨)

നപച്ഛാജാതപച്ചയാ… നആസേവനപച്ചയാ.

നകമ്മപച്ചയോ

൫൫. ഉപാദാനസമ്പയുത്തം ധമ്മം പടിച്ച ഉപാദാനസമ്പയുത്തോ ധമ്മോ ഉപ്പജ്ജതി നകമ്മപച്ചയാ – ഉപാദാനസമ്പയുത്തേ ഖന്ധേ പടിച്ച സമ്പയുത്തകാ ചേതനാ. (൧)

ഉപാദാനവിപ്പയുത്തം ധമ്മം പടിച്ച ഉപാദാനവിപ്പയുത്തോ ധമ്മോ ഉപ്പജ്ജതി നകമ്മപച്ചയാ – ഉപാദാനവിപ്പയുത്തേ ഖന്ധേ പടിച്ച സമ്പയുത്തകാ ചേതനാ; ബാഹിരം… ആഹാരസമുട്ഠാനം… ഉതുസമുട്ഠാനം…പേ…. (൧)

ഉപാദാനവിപ്പയുത്തം ധമ്മം പടിച്ച ഉപാദാനസമ്പയുത്തോ ധമ്മോ ഉപ്പജ്ജതി നകമ്മപച്ചയാ – ദിട്ഠിഗതവിപ്പയുത്തം ലോഭം പടിച്ച സമ്പയുത്തകാ ചേതനാ. (൨)

ഉപാദാനസമ്പയുത്തഞ്ച ഉപാദാനവിപ്പയുത്തഞ്ച ധമ്മം പടിച്ച ഉപാദാനസമ്പയുത്തോ ധമ്മോ ഉപ്പജ്ജതി നകമ്മപച്ചയാ – ദിട്ഠിഗതവിപ്പയുത്തലോഭസഹഗതേ ഖന്ധേ ച ലോഭഞ്ച പടിച്ച സമ്പയുത്തകാ ചേതനാ. (൧) (സംഖിത്തം.)