൧. വിഭങ്ഗവാരോ

നഹേതുപച്ചയോ

൯൯. ചേതസികം ധമ്മം പടിച്ച ചേതസികോ ധമ്മോ ഉപ്പജ്ജതി നഹേതുപച്ചയാ – അഹേതുകം ചേതസികം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

ചേതസികം ധമ്മം പടിച്ച അചേതസികോ ധമ്മോ ഉപ്പജ്ജതി നഹേതുപച്ചയാ – അഹേതുകേ ചേതസികേ ഖന്ധേ പടിച്ച ചിത്തഞ്ച ചിത്തസമുട്ഠാനഞ്ച രൂപം; അഹേതുകപടിസന്ധിക്ഖണേ…പേ…. (൨)

ചേതസികം ധമ്മം പടിച്ച ചേതസികോ ച അചേതസികോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകം ചേതസികം ഏകം ഖന്ധം പടിച്ച ദ്വേ ഖന്ധാ ചിത്തഞ്ച ചിത്തസമുട്ഠാനഞ്ച രൂപം, ദ്വേ ഖന്ധേ…പേ… അഹേതുകപടിസന്ധിക്ഖണേ …പേ…. (൩)

൧൦൦. അചേതസികം ധമ്മം പടിച്ച അചേതസികോ ധമ്മോ ഉപ്പജ്ജതി നഹേതുപച്ചയാ – അഹേതുകം ചിത്തം പടിച്ച ചിത്തസമുട്ഠാനം രൂപം; അഹേതുകപടിസന്ധിക്ഖണേ ചിത്തം പടിച്ച കടത്താരൂപം, ചിത്തം പടിച്ച വത്ഥു, വത്ഥും പടിച്ച ചിത്തം, ഏകം മഹാഭൂതം…പേ… അസഞ്ഞസത്താനം ഏകം മഹാഭൂതം…പേ…. (൧)

അചേതസികം ധമ്മം പടിച്ച ചേതസികോ ധമ്മോ ഉപ്പജ്ജതി നഹേതുപച്ചയാ – അഹേതുകം ചിത്തം പടിച്ച സമ്പയുത്തകാ ഖന്ധാ; അഹേതുകപടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ, അഹേതുകപടിസന്ധിക്ഖണേ വത്ഥും പടിച്ച ചേതസികാ ഖന്ധാ, വിചികിച്ഛാസഹഗതം ഉദ്ധച്ചസഹഗതം ചിത്തം പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൨)

അചേതസികം ധമ്മം പടിച്ച ചേതസികോ ച അചേതസികോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകം ചിത്തം പടിച്ച സമ്പയുത്തകാ ഖന്ധാ ചിത്തസമുട്ഠാനഞ്ച രൂപം; അഹേതുകപടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ കടത്താ ച രൂപം, അഹേതുകപടിസന്ധിക്ഖണേ വത്ഥും പടിച്ച ചിത്തഞ്ച സമ്പയുത്തകാ ച ഖന്ധാ. (൩)

൧൦൧. ചേതസികഞ്ച അചേതസികഞ്ച ധമ്മം പടിച്ച ചേതസികോ ധമ്മോ ഉപ്പജ്ജതി നഹേതുപച്ചയാ – അഹേതുകം ചേതസികം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… അഹേതുകപടിസന്ധിക്ഖണേ ചേതസികം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… അഹേതുകപടിസന്ധിക്ഖണേ ചേതസികം ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച ചിത്തഞ്ച പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

ചേതസികഞ്ച അചേതസികഞ്ച ധമ്മം പടിച്ച അചേതസികോ ധമ്മോ ഉപ്പജ്ജതി നഹേതുപച്ചയാ – അഹേതുകേ ചേതസികേ ഖന്ധേ ച ചിത്തഞ്ച പടിച്ച ചിത്തസമുട്ഠാനം രൂപം, അഹേതുകേ ചേതസികേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം; അഹേതുകപടിസന്ധിക്ഖണേ ചേതസികേ ഖന്ധേ ച ചിത്തഞ്ച പടിച്ച കടത്താരൂപം, അഹേതുകപടിസന്ധിക്ഖണേ ചേതസികേ ഖന്ധേ ച മഹാഭൂതേ ച പടിച്ച കടത്താരൂപം, അഹേതുകപടിസന്ധിക്ഖണേ ചേതസികേ ഖന്ധേ ച വത്ഥുഞ്ച പടിച്ച ചിത്തം. (൨)

ചേതസികഞ്ച അചേതസികഞ്ച ധമ്മം പടിച്ച ചേതസികോ ച അചേതസികോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകം ചേതസികം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം; അഹേതുകപടിസന്ധിക്ഖണേ ചേതസികം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ കടത്താ ച രൂപം, അഹേതുകപടിസന്ധിക്ഖണേ ചേതസികം ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ ച…പേ…. (൩)

നആരമ്മണപച്ചയോ

൧൦൨. ചേതസികം ധമ്മം പടിച്ച അചേതസികോ ധമ്മോ ഉപ്പജ്ജതി നആരമ്മണപച്ചയാ – ചേതസികേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ…. (൧)

അചേതസികം ധമ്മം പടിച്ച അചേതസികോ ധമ്മോ ഉപ്പജ്ജതി നആരമ്മണപച്ചയാ – ചിത്തം പടിച്ച ചിത്തസമുട്ഠാനം രൂപം; പടിസന്ധിക്ഖണേ …പേ… (യാവ അസഞ്ഞസത്താ). (൧)

ചേതസികഞ്ച അചേതസികഞ്ച ധമ്മം പടിച്ച അചേതസികോ ധമ്മോ ഉപ്പജ്ജതി നആരമ്മണപച്ചയാ – ചേതസികേ ഖന്ധേ ച ചിത്തഞ്ച പടിച്ച ചിത്തസമുട്ഠാനം രൂപം, ചേതസികേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം (പടിസന്ധിക്ഖണേ ദ്വേപി കാതബ്ബാ, സംഖിത്തം).