൧. വിഭങ്ഗവാരോ

ഹേതുപച്ചയോ

൫൦. ചിത്തം ധമ്മം പടിച്ച നോചിത്തോ ധമ്മോ ഉപ്പജ്ജതി ഹേതുപച്ചയാ – ചിത്തം പടിച്ച സമ്പയുത്തകാ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ കടത്താ ച രൂപം. (൧)

നോചിത്തം ധമ്മം പടിച്ച നോചിത്തോ ധമ്മോ ഉപ്പജ്ജതി ഹേതുപച്ചയാ – നോചിത്തം ഏകം ഖന്ധം പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം; പടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ, ഏകം മഹാഭൂതം പടിച്ച…പേ…. (൧)

നോചിത്തം ധമ്മം പടിച്ച ചിത്തോ ധമ്മോ ഉപ്പജ്ജതി ഹേതുപച്ചയാ – നോചിത്തേ ഖന്ധേ പടിച്ച ചിത്തം; പടിസന്ധിക്ഖണേ നോചിത്തേ ഖന്ധേ പടിച്ച ചിത്തം; പടിസന്ധിക്ഖണേ വത്ഥും പടിച്ച ചിത്തം. (൨)

നോചിത്തം ധമ്മം പടിച്ച ചിത്തോ ച നോചിത്തോ ച ധമ്മാ ഉപ്പജ്ജന്തി ഹേതുപച്ചയാ – നോചിത്തം ഏകം ഖന്ധം പടിച്ച ദ്വേ ഖന്ധാ ചിത്തഞ്ച ചിത്തസമുട്ഠാനഞ്ച രൂപം, ദ്വേ ഖന്ധേ…പേ… പടിസന്ധിക്ഖണേ നോചിത്തം ഏകം ഖന്ധം പടിച്ച ദ്വേ ഖന്ധാ ചിത്തഞ്ച കടത്താ ച രൂപം, ദ്വേ ഖന്ധേ പടിച്ച ഏകോ ഖന്ധോ ചിത്തഞ്ച കടത്താ ച രൂപം; പടിസന്ധിക്ഖണേ വത്ഥും പടിച്ച ചിത്തഞ്ച സമ്പയുത്തകാ ച ഖന്ധാ. (൩)

ചിത്തഞ്ച നോചിത്തഞ്ച ധമ്മം പടിച്ച നോചിത്തോ ധമ്മോ ഉപ്പജ്ജതി ഹേതുപച്ചയാ – നോചിത്തം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ ച…പേ… ചിത്തഞ്ച മഹാഭൂതേ ച പടിച്ച ചിത്തസമുട്ഠാനം രൂപം; പടിസന്ധിക്ഖണേ നോചിത്തം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ കടത്താ ച രൂപം, ദ്വേ ഖന്ധേ…പേ… പടിസന്ധിക്ഖണേ ചിത്തഞ്ച വത്ഥുഞ്ച പടിച്ച നോചിത്താ ഖന്ധാ; പടിസന്ധിക്ഖണേ ചിത്തഞ്ച മഹാഭൂതേ ച പടിച്ച കടത്താരൂപം. (൧)

ആരമ്മണപച്ചയോ

൫൧. ചിത്തം ധമ്മം പടിച്ച നോചിത്തോ ധമ്മോ ഉപ്പജ്ജതി ആരമ്മണപച്ചയാ – ചിത്തം പടിച്ച സമ്പയുത്തകാ ഖന്ധാ; പടിസന്ധിക്ഖണേ…പേ…. (൧)

നോചിത്തം ധമ്മം പടിച്ച നോചിത്തോ ധമ്മോ ഉപ്പജ്ജതി ആരമ്മണപച്ചയാ – നോചിത്തം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ…പേ… പടിസന്ധിക്ഖണേ…പേ… പടിസന്ധിക്ഖണേ വത്ഥും പടിച്ച ഖന്ധാ. (൧)

നോചിത്തം ധമ്മം പടിച്ച ചിത്തോ ധമ്മോ ഉപ്പജ്ജതി ആരമ്മണപച്ചയാ – നോചിത്തേ ഖന്ധേ പടിച്ച ചിത്തം; പടിസന്ധിക്ഖണേ നോചിത്തേ ഖന്ധേ പടിച്ച ചിത്തം; പടിസന്ധിക്ഖണേ വത്ഥും പടിച്ച ചിത്തം. (൨)

നോചിത്തം ധമ്മം പടിച്ച ചിത്തോ ച നോചിത്തോ ച ധമ്മാ ഉപ്പജ്ജന്തി ആരമ്മണപച്ചയാ – നോചിത്തം ഏകം ഖന്ധം പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ പടിച്ച…പേ… പടിസന്ധിക്ഖണേ നോചിത്തം ഏകം ഖന്ധം പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ…പേ… പടിസന്ധിക്ഖണേ വത്ഥും പടിച്ച ചിത്തഞ്ച സമ്പയുത്തകാ ച ഖന്ധാ. (൩)

ചിത്തഞ്ച നോചിത്തഞ്ച ധമ്മം പടിച്ച നോചിത്തോ ധമ്മോ ഉപ്പജ്ജതി ആരമ്മണപച്ചയാ – നോചിത്തം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… പടിസന്ധിക്ഖണേ…പേ… പടിസന്ധിക്ഖണേ ചിത്തഞ്ച വത്ഥുഞ്ച പടിച്ച നോചിത്താ ഖന്ധാ. (൧) (സംഖിത്തം).