൧. വിഭങ്ഗവാരോ

ഹേതുപച്ചയോ

൩൪൦. ബാഹിരോ ധമ്മോ ബാഹിരസ്സ ധമ്മസ്സ ഹേതുപച്ചയേന പച്ചയോ – ബാഹിരാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ – പടിസന്ധിക്ഖണേ ബാഹിരാ ഹേതൂ സമ്പയുത്തകാനം ഖന്ധാനം ബാഹിരാനഞ്ച കടത്താരൂപാനം ഹേതുപച്ചയേന പച്ചയോ. (൧)

ബാഹിരോ ധമ്മോ അജ്ഝത്തികസ്സ ധമ്മസ്സ ഹേതുപച്ചയേന പച്ചയോ – ബാഹിരാ ഹേതൂ ചിത്തസ്സ ഹേതുപച്ചയേന പച്ചയോ; പടിസന്ധിക്ഖണേ ബാഹിരാ ഹേതൂ ചിത്തസ്സ അജ്ഝത്തികാനഞ്ച കടത്താരൂപാനം ഹേതുപച്ചയേന പച്ചയോ. (൨)

ബാഹിരോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ ഹേതുപച്ചയേന പച്ചയോ – ബാഹിരാ ഹേതൂ സമ്പയുത്തകാനം ഖന്ധാനം ചിത്തസ്സ ച ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ ബാഹിരാ ഹേതൂ സമ്പയുത്തകാനം ഖന്ധാനം ചിത്തസ്സ ച അജ്ഝത്തികാനഞ്ച ബാഹിരാനഞ്ച കടത്താരൂപാനം ഹേതുപച്ചയേന പച്ചയോ. (൩)

ആരമ്മണപച്ചയോ

൩൪൧. അജ്ഝത്തികോ ധമ്മോ അജ്ഝത്തികസ്സ ധമ്മസ്സ ആരമ്മണപച്ചയേന പച്ചയോ – ചിത്തം ആരബ്ഭ ചിത്തം ഉപ്പജ്ജതി. (മൂലം പുച്ഛിതബ്ബം) ചിത്തം ആരബ്ഭ ബാഹിരാ ഖന്ധാ ഉപ്പജ്ജന്തി. (മൂലം പുച്ഛിതബ്ബം) ചിത്തം ആരബ്ഭ ചിത്തഞ്ച സമ്പയുത്തകാ ച ഖന്ധാ ഉപ്പജ്ജന്തി. (൩)

ബാഹിരോ ധമ്മോ ബാഹിരസ്സ ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം കത്വാ തം പച്ചവേക്ഖതി അസ്സാദേതി അഭിനന്ദതി, തം ആരബ്ഭ രാഗോ…പേ… ദോമനസ്സം ഉപ്പജ്ജതി; പുബ്ബേ സുചിണ്ണാനി പച്ചവേക്ഖതി, ഝാനാ വുട്ഠഹിത്വാ ഝാനം…പേ… അരിയാ മഗ്ഗാ വുട്ഠഹിത്വാ മഗ്ഗം…പേ… ഫലം…പേ… നിബ്ബാനം പച്ചവേക്ഖന്തി… നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ, ഫലസ്സ, ആവജ്ജനായ ആരമ്മണപച്ചയേന പച്ചയോ. അരിയാ ബാഹിരേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ…പേ… പുബ്ബേ സമുദാചിണ്ണേ കിലേസേ ജാനന്തി, രൂപേ…പേ… വത്ഥും ബാഹിരേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി; ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. ചേതോപരിയഞാണേന ബാഹിരചിത്തസമങ്ഗിസ്സ ചിത്തം ജാനാതി, ആകാസാനഞ്ചായതനം വിഞ്ഞാണഞ്ചായതനസ്സ…പേ… ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ…പേ… രൂപായതനം ചക്ഖുവിഞ്ഞാണസഹഗതാനം ഖന്ധാനം ആരമ്മണപച്ചയേന പച്ചയോ…പേ… ഫോട്ഠബ്ബായതനം…പേ… ബാഹിരാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

ബാഹിരോ ധമ്മോ അജ്ഝത്തികസ്സ ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം കത്വാ തം പച്ചവേക്ഖതി അസ്സാദേതി അഭിനന്ദതി, തം ആരബ്ഭ ചിത്തം ഉപ്പജ്ജതി. പുബ്ബേ സുചിണ്ണാനി…പേ… ഝാനം…പേ… (സംഖിത്തം, സബ്ബം കാതബ്ബം) പുബ്ബേ സമുദാചിണ്ണേ…പേ… രൂപേ…പേ… വത്ഥും ബാഹിരേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ ചിത്തം ഉപ്പജ്ജതി. ദിബ്ബേന ചക്ഖുനാ രൂപം പസ്സതി…പേ… രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം…പേ… ബാഹിരാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൩)

ബാഹിരോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം കത്വാ തം പച്ചവേക്ഖതി അസ്സാദേതി അഭിനന്ദതി, തം ആരബ്ഭ ചിത്തഞ്ച സമ്പയുത്തകാ ച ഖന്ധാ ഉപ്പജ്ജന്തി (സംഖിത്തം, സബ്ബം കാതബ്ബം). ബാഹിരേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ ചിത്തഞ്ച സമ്പയുത്തകാ ച ഖന്ധാ ഉപ്പജ്ജന്തി. ദിബ്ബേന ചക്ഖുനാ രൂപം പസ്സതി…പേ… രൂപായതനം ചക്ഖുവിഞ്ഞാണസ്സ ച സമ്പയുത്തകാനഞ്ച ഖന്ധാനം…പേ… ഫോട്ഠബ്ബായതനം…പേ… ബാഹിരാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൩)

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ ആരമ്മണപച്ചയേന പച്ചയോ… തീണി.

അധിപതിപച്ചയോ

൩൪൨. അജ്ഝത്തികോ ധമ്മോ അജ്ഝത്തികസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ചിത്തം ഗരും കത്വാ ചിത്തം ഉപ്പജ്ജതി. (൧)

അജ്ഝത്തികോ ധമ്മോ ബാഹിരസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ചിത്തം ഗരും കത്വാ ബാഹിരാ ഖന്ധാ ഉപ്പജ്ജന്തി. സഹജാതാധിപതി – ചിത്താധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (മൂലം) ആരമ്മണാധിപതി – അജ്ഝത്തികം ചിത്തം ഗരും കത്വാ ചിത്തഞ്ച സമ്പയുത്തകാ ച ഖന്ധാ ഉപ്പജ്ജന്തി. (൩)

ബാഹിരോ ധമ്മോ ബാഹിരസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം ദത്വാ…പേ… തീണി (ദ്വേ അധിപതീ തിണ്ണമ്പി കാതബ്ബാ). (൩)

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ അധിപതിപച്ചയേന പച്ചയോ… തീണി (തിണ്ണമ്പി ഏകായേവ അധിപതി).

അനന്തരപച്ചയാദി

൩൪൩. അജ്ഝത്തികോ ധമ്മോ അജ്ഝത്തികസ്സ ധമ്മസ്സ അനന്തരപച്ചയേന പച്ചയോ – പുരിമം പുരിമം ചിത്തം പച്ഛിമസ്സ പച്ഛിമസ്സ ചിത്തസ്സ അനന്തരപച്ചയേന പച്ചയോ… തീണി.

ബാഹിരോ ധമ്മോ ബാഹിരസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ ബാഹിരാ ഖന്ധാ പച്ഛിമാനം പച്ഛിമാനം ഖന്ധാനം അനന്തരപച്ചയേന പച്ചയോ; അനുലോമം ഗോത്രഭുസ്സ…പേ… തീണി (തിണ്ണമ്പി ഏകസദിസാ).

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ അനന്തരപച്ചയേന പച്ചയോ… തീണി, സമനന്തരപച്ചയേന പച്ചയോ… നവ, സഹജാതപച്ചയേന പച്ചയോ… നവ (പടിച്ചസദിസാ), അഞ്ഞമഞ്ഞപച്ചയേന പച്ചയോ… പഞ്ച (പടിച്ചസദിസാ), നിസ്സയപച്ചയേന പച്ചയോ… നവ, (പച്ചയവാരസദിസാ).

ഉപനിസ്സയപച്ചയോ

൩൪൪. അജ്ഝത്തികോ ധമ്മോ അജ്ഝത്തികസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ചിത്തം ചിത്തസ്സ ഉപനിസ്സയപച്ചയേന പച്ചയോ… തീണി.

ബാഹിരോ ധമ്മോ ബാഹിരസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സദ്ധം ഉപനിസ്സായ ദാനം ദേതി…പേ… മാനം ജപ്പേതി, ദിട്ഠിം ഗണ്ഹാതി; സീലം…പേ… സേനാസനം ഉപനിസ്സായ ദാനം ദേതി…പേ… സങ്ഘം ഭിന്ദതി; സദ്ധാ…പേ… സേനാസനം സദ്ധായ…പേ… ഫലസമാപത്തിയാ ഉപനിസ്സയപച്ചയേന പച്ചയോ, (തീണിപി പൂരേത്വാ കാതബ്ബാ, ചിത്തസ്സാതി കാതബ്ബാ, സമ്പയുത്തകാനഞ്ചാതി കാതബ്ബാ).

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ ഉപനിസ്സയപച്ചയേന പച്ചയോ… തീണി.

പുരേജാതപച്ചയോ

൩൪൫. അജ്ഝത്തികോ ധമ്മോ അജ്ഝത്തികസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും …പേ… കായം അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ ചിത്തം ഉപ്പജ്ജതി. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ…പേ… കായായതനം കായവിഞ്ഞാണസ്സ പുരേജാതപച്ചയേന പച്ചയോ. (൧)

അജ്ഝത്തികോ ധമ്മോ ബാഹിരസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… കായം അനിച്ചതോ…പേ… വിപസ്സതി, അസ്സാദേതി…പേ… ദോമനസ്സം ഉപ്പജ്ജതി. വത്ഥുപുരേജാതം – ചക്ഖായതനം ചക്ഖുവിഞ്ഞാണസഹഗതാനം ഖന്ധാനം…പേ… കായായതനം കായവിഞ്ഞാണസഹഗതാനം ഖന്ധാനം പുരേജാതപച്ചയേന പച്ചയോ. (൨)

അജ്ഝത്തികോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… കായം അനിച്ചതോ…പേ… വിപസ്സതി, തം ആരബ്ഭ ചിത്തഞ്ച സമ്പയുത്തകാ ഖന്ധാ ച ഉപ്പജ്ജന്തി. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം…പേ… കായായതനം കായവിഞ്ഞാണസ്സ സമ്പയുത്തകാനഞ്ച ഖന്ധാനം പുരേജാതപച്ചയേന പച്ചയോ. (൩)

൩൪൬. ബാഹിരോ ധമ്മോ ബാഹിരസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – രൂപേ…പേ… ഫോട്ഠബ്ബേ… വത്ഥും അനിച്ചതോ…പേ… ദോമനസ്സം ഉപ്പജ്ജതി; ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. വത്ഥുപുരേജാതം – വത്ഥു ബാഹിരാനം ഖന്ധാനം പുരേജാതപച്ചയേന പച്ചയോ. (൧)

ബാഹിരോ ധമ്മോ അജ്ഝത്തികസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – രൂപേ…പേ… ഫോട്ഠബ്ബേ… വത്ഥും അനിച്ചതോ…പേ… തം ആരബ്ഭ ചിത്തം ഉപ്പജ്ജതി. ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. വത്ഥുപുരേജാതം – വത്ഥു ചിത്തസ്സ പുരേജാതപച്ചയേന പച്ചയോ. (൨)

ബാഹിരോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – രൂപേ…പേ… ഫോട്ഠബ്ബേ… വത്ഥും അനിച്ചതോ…പേ… തം ആരബ്ഭ ചിത്തഞ്ച സമ്പയുത്തകാ ഖന്ധാ ച ഉപ്പജ്ജന്തി. ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. വത്ഥുപുരേജാതം – വത്ഥു ചിത്തസ്സ സമ്പയുത്തകാനഞ്ച ഖന്ധാനം പുരേജാതപച്ചയേന പച്ചയോ. (൩)

൩൪൭. അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ചക്ഖായതനഞ്ച വത്ഥു ച ചിത്തസ്സ…പേ… കായായതനഞ്ച വത്ഥു ച ചിത്തസ്സ പുരേജാതപച്ചയേന പച്ചയോ; രൂപായതനഞ്ച ചക്ഖായതനഞ്ച ചക്ഖുവിഞ്ഞാണസ്സ…പേ… ഫോട്ഠബ്ബായതനഞ്ച കായായതനഞ്ച കായവിഞ്ഞാണസ്സ പുരേജാതപച്ചയേന പച്ചയോ. (൧)

അജ്ഝത്തികോ ച ബാഹിരോ ച ധമ്മാ ബാഹിരസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ചക്ഖായതനഞ്ച വത്ഥു ച ബാഹിരാനം ഖന്ധാനം പുരേജാതപച്ചയേന പച്ചയോ…പേ… കായായതനഞ്ച വത്ഥു ച ബാഹിരാനം ഖന്ധാനം പുരേജാതപച്ചയേന പച്ചയോ; രൂപായതനഞ്ച ചക്ഖായതനഞ്ച ചക്ഖുവിഞ്ഞാണസഹഗതാനം ഖന്ധാനം പുരേജാതപച്ചയേന പച്ചയോ…പേ… ഫോട്ഠബ്ബായതനഞ്ച കായായതനഞ്ച കായവിഞ്ഞാണസഹഗതാനം ഖന്ധാനം പുരേജാതപച്ചയേന പച്ചയോ. (൨)

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ച ബാഹിരസ്സ ച ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ചക്ഖായതനഞ്ച വത്ഥു ച ചിത്തസ്സ സമ്പയുത്തകാനഞ്ച ഖന്ധാനം പുരേജാതപച്ചയേന പച്ചയോ…പേ… കായായതനഞ്ച വത്ഥു ച…പേ… രൂപായതനഞ്ച ചക്ഖായതനഞ്ച ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം പുരേജാതപച്ചയേന പച്ചയോ…പേ… ഫോട്ഠബ്ബായതനഞ്ച…പേ…. (൩)

പച്ഛാജാതാസേവനപച്ചയാ

൩൪൮. അജ്ഝത്തികോ ധമ്മോ അജ്ഝത്തികസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അജ്ഝത്തികാ ഖന്ധാ പുരേജാതസ്സ ഇമസ്സ അജ്ഝത്തികസ്സ കായസ്സ പച്ഛാജാതപച്ചയേന പച്ചയോ. (മൂലം കാതബ്ബം) പച്ഛാജാതാ അജ്ഝത്തികാ ഖന്ധാ പുരേജാതസ്സ ഇമസ്സ ബാഹിരസ്സ കായസ്സ പച്ഛാജാതപച്ചയേന പച്ചയോ. (മൂലം കാതബ്ബം) പച്ഛാജാതാ അജ്ഝത്തികാ ഖന്ധാ പുരേജാതസ്സ ഇമസ്സ അജ്ഝത്തികസ്സ ച ബാഹിരസ്സ ച കായസ്സ പച്ഛാജാതപച്ചയേന പച്ചയോ (ഏവം നവപി പഞ്ഹാ കാതബ്ബാ), ആസേവനപച്ചയേന പച്ചയോ (നവ പഞ്ഹാ കാതബ്ബാ).

കമ്മ-വിപാകപച്ചയാ

൩൪൯. ബാഹിരോ ധമ്മോ ബാഹിരസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ബാഹിരാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ബാഹിരാ ചേതനാ വിപാകാനം ബാഹിരാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. (൧)

ബാഹിരോ ധമ്മോ അജ്ഝത്തികസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ബാഹിരാ ചേതനാ ചിത്തസ്സ കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ബാഹിരാ ചേതനാ വിപാകസ്സ ചിത്തസ്സ അജ്ഝത്തികാനഞ്ച കടത്താരൂപാനം കമ്മപച്ചയേന പച്ചയോ. (൨)

ബാഹിരോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ബാഹിരാ ചേതനാ സമ്പയുത്തകാനം ഖന്ധാനം ചിത്തസ്സ ച ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ബാഹിരാ ചേതനാ വിപാകാനം ഖന്ധാനം ചിത്തസ്സ ച അജ്ഝത്തികാനഞ്ച ബാഹിരാനഞ്ച കടത്താരൂപാനം കമ്മപച്ചയേന പച്ചയോ. (൩) വിപാകപച്ചയേന പച്ചയോ… നവ.

ആഹാരപച്ചയോ

൩൫൦. അജ്ഝത്തികോ ധമ്മോ അജ്ഝത്തികസ്സ ധമ്മസ്സ ആഹാരപച്ചയേന പച്ചയോ – പടിസന്ധിക്ഖണേ അജ്ഝത്തികാ ആഹാരാ അജ്ഝത്തികാനം കടത്താരൂപാനം ആഹാരപച്ചയേന പച്ചയോ. (൧)

അജ്ഝത്തികോ ധമ്മോ ബാഹിരസ്സ ധമ്മസ്സ ആഹാരപച്ചയേന പച്ചയോ – അജ്ഝത്തികാ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ; പടിസന്ധിക്ഖണേ അജ്ഝത്തികാ ആഹാരാ സമ്പയുത്തകാനം ഖന്ധാനം ബാഹിരാനഞ്ച കടത്താരൂപാനം ആഹാരപച്ചയേന പച്ചയോ. (മൂലം കാതബ്ബം) പടിസന്ധിക്ഖണേ അജ്ഝത്തികാ ആഹാരാ സമ്പയുത്തകാനം ഖന്ധാനം അജ്ഝത്തികാനഞ്ച ബാഹിരാനഞ്ച കടത്താരൂപാനം ആഹാരപച്ചയേന പച്ചയോ. (൩)

൩൫൧. ബാഹിരോ ധമ്മോ ബാഹിരസ്സ ധമ്മസ്സ ആഹാരപച്ചയേന പച്ചയോ – ബാഹിരാ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ; പടിസന്ധിക്ഖണേ…പേ… ബാഹിരോ കബളീകാരോ ആഹാരോ ബാഹിരസ്സ കായസ്സ ആഹാരപച്ചയേന പച്ചയോ. (൧)

ബാഹിരോ ധമ്മോ അജ്ഝത്തികസ്സ ധമ്മസ്സ ആഹാരപച്ചയേന പച്ചയോ – ബാഹിരാ ആഹാരാ ചിത്തസ്സ ആഹാരപച്ചയേന പച്ചയോ; പടിസന്ധിക്ഖണേ ബാഹിരാ ആഹാരാ ചിത്തസ്സ അജ്ഝത്തികാനഞ്ച കടത്താരൂപാനം ആഹാരപച്ചയേന പച്ചയോ; ബാഹിരോ കബളീകാരോ ആഹാരോ അജ്ഝത്തികസ്സ കായസ്സ ആഹാരപച്ചയേന പച്ചയോ. (൨)

ബാഹിരോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ ആഹാരപച്ചയേന പച്ചയോ – ബാഹിരാ ആഹാരാ സമ്പയുത്തകാനം ഖന്ധാനം ചിത്തസ്സ ച ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ; പടിസന്ധിക്ഖണേ ബാഹിരാ ആഹാരാ സമ്പയുത്തകാനം ഖന്ധാനം ചിത്തസ്സ ച അജ്ഝത്തികാനഞ്ച ബാഹിരാനഞ്ച കടത്താരൂപാനം ആഹാരപച്ചയേന പച്ചയോ; ബാഹിരോ കബളീകാരോ ആഹാരോ അജ്ഝത്തികസ്സ ച ബാഹിരസ്സ ച കായസ്സ ആഹാരപച്ചയേന പച്ചയോ. (൩)

൩൫൨. അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ ആഹാരപച്ചയേന പച്ചയോ – പടിസന്ധിക്ഖണേ അജ്ഝത്തികാ ച ബാഹിരാ ച ആഹാരാ അജ്ഝത്തികാനം കടത്താരൂപാനം ആഹാരപച്ചയേന പച്ചയോ. (൧)

അജ്ഝത്തികോ ച ബാഹിരോ ച ധമ്മാ ബാഹിരസ്സ ധമ്മസ്സ ആഹാരപച്ചയേന പച്ചയോ – അജ്ഝത്തികാ ച ബാഹിരാ ച ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ; പടിസന്ധിക്ഖണേ അജ്ഝത്തികാ ച ബാഹിരാ ച ആഹാരാ സമ്പയുത്തകാനം ഖന്ധാനം ബാഹിരാനഞ്ച കടത്താരൂപാനം ആഹാരപച്ചയേന പച്ചയോ. (൨)

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ച ബാഹിരസ്സ ച ധമ്മസ്സ ആഹാരപച്ചയേന പച്ചയോ – പടിസന്ധിക്ഖണേ അജ്ഝത്തികാ ച ബാഹിരാ ച ആഹാരാ സമ്പയുത്തകാനം ഖന്ധാനം അജ്ഝത്തികാനഞ്ച ബാഹിരാനഞ്ച കടത്താരൂപാനം ആഹാരപച്ചയേന പച്ചയോ. (൩)

ഇന്ദ്രിയപച്ചയോ

൩൫൩. അജ്ഝത്തികോ ധമ്മോ അജ്ഝത്തികസ്സ ധമ്മസ്സ ഇന്ദ്രിയപച്ചയേന പച്ചയോ – പടിസന്ധിക്ഖണേ അജ്ഝത്തികാ ഇന്ദ്രിയാ അജ്ഝത്തികാനം കടത്താരൂപാനം ഇന്ദ്രിയപച്ചയേന പച്ചയോ, ചക്ഖുന്ദ്രിയം ചക്ഖുവിഞ്ഞാണസ്സ…പേ… കായിന്ദ്രിയം കായവിഞ്ഞാണസ്സ ഇന്ദ്രിയപച്ചയേന പച്ചയോ. (൧)

അജ്ഝത്തികോ ധമ്മോ ബാഹിരസ്സ ധമ്മസ്സ ഇന്ദ്രിയപച്ചയേന പച്ചയോ – അജ്ഝത്തികാ ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ; പടിസന്ധിക്ഖണേ അജ്ഝത്തികാ ഇന്ദ്രിയാ സമ്പയുത്തകാനം ഖന്ധാനം ബാഹിരാനഞ്ച കടത്താരൂപാനം ഇന്ദ്രിയപച്ചയേന പച്ചയോ, ചക്ഖുന്ദ്രിയം ചക്ഖുവിഞ്ഞാണസഹഗതാനം ഖന്ധാനം…പേ… കായിന്ദ്രിയം കായവിഞ്ഞാണസഹഗതാനം ഖന്ധാനം ഇന്ദ്രിയപച്ചയേന പച്ചയോ. (൨)

അജ്ഝത്തികോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ ഇന്ദ്രിയപച്ചയേന പച്ചയോ – പടിസന്ധിക്ഖണേ അജ്ഝത്തികാ ഇന്ദ്രിയാ സമ്പയുത്തകാനം ഖന്ധാനം അജ്ഝത്തികാനഞ്ച ബാഹിരാനഞ്ച കടത്താരൂപാനം ഇന്ദ്രിയപച്ചയേന പച്ചയോ, ചക്ഖുന്ദ്രിയം ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം…പേ… കായിന്ദ്രിയം കായവിഞ്ഞാണസ്സ സമ്പയുത്തകാനഞ്ച ഖന്ധാനം ഇന്ദ്രിയപച്ചയേന പച്ചയോ. (൩)

൩൫൪. ബാഹിരോ ധമ്മോ ബാഹിരസ്സ ധമ്മസ്സ ഇന്ദ്രിയപച്ചയേന പച്ചയോ – ബാഹിരാ ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ; പടിസന്ധിക്ഖണേ ബാഹിരാ ഇന്ദ്രിയാ സമ്പയുത്തകാനം ഖന്ധാനം ബാഹിരാനഞ്ച കടത്താരൂപാനം ഇന്ദ്രിയപച്ചയേന പച്ചയോ, രൂപജീവിതിന്ദ്രിയം ബാഹിരാനം കടത്താരൂപാനം ഇന്ദ്രിയപച്ചയേന പച്ചയോ. (൧)

ബാഹിരോ ധമ്മോ അജ്ഝത്തികസ്സ ധമ്മസ്സ ഇന്ദ്രിയപച്ചയേന പച്ചയോ – ബാഹിരാ ഇന്ദ്രിയാ ചിത്തസ്സ ഇന്ദ്രിയപച്ചയേന പച്ചയോ; പടിസന്ധിക്ഖണേ ബാഹിരാ ഇന്ദ്രിയാ ചിത്തസ്സ അജ്ഝത്തികാനഞ്ച കടത്താരൂപാനം ഇന്ദ്രിയപച്ചയേന പച്ചയോ, രൂപജീവിതിന്ദ്രിയം അജ്ഝത്തികാനം കടത്താരൂപാനം ഇന്ദ്രിയപച്ചയേന പച്ചയോ. (൨)

ബാഹിരോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ ഇന്ദ്രിയപച്ചയേന പച്ചയോ – ബാഹിരാ ഇന്ദ്രിയാ സമ്പയുത്തകാനം ഖന്ധാനം ചിത്തസ്സ ച ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ; പടിസന്ധിക്ഖണേ ബാഹിരാ ഇന്ദ്രിയാ സമ്പയുത്തകാനം ഖന്ധാനം ചിത്തസ്സ ച അജ്ഝത്തികാനഞ്ച ബാഹിരാനഞ്ച കടത്താരൂപാനം ഇന്ദ്രിയപച്ചയേന പച്ചയോ, രൂപജീവിതിന്ദ്രിയം അജ്ഝത്തികാനഞ്ച ബാഹിരാനഞ്ച കടത്താരൂപാനം ഇന്ദ്രിയപച്ചയേന പച്ചയോ. (൩)

൩൫൫. അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ ഇന്ദ്രിയപച്ചയേന പച്ചയോ – പടിസന്ധിക്ഖണേ അജ്ഝത്തികാ ച ബാഹിരാ ച ഇന്ദ്രിയാ അജ്ഝത്തികാനം കടത്താരൂപാനം ഇന്ദ്രിയപച്ചയേന പച്ചയോ, ചക്ഖുന്ദ്രിയഞ്ച ഉപേക്ഖിന്ദ്രിയഞ്ച ചക്ഖുവിഞ്ഞാണസ്സ ഇന്ദ്രിയപച്ചയേന പച്ചയോ…പേ… കായിന്ദ്രിയഞ്ച സുഖിന്ദ്രിയം ച…പേ… കായിന്ദ്രിയഞ്ച ദുക്ഖിന്ദ്രിയഞ്ച കായവിഞ്ഞാണസ്സ ഇന്ദ്രിയപച്ചയേന പച്ചയോ. (൧)

അജ്ഝത്തികോ ച ബാഹിരോ ച ധമ്മാ ബാഹിരസ്സ ധമ്മസ്സ ഇന്ദ്രിയപച്ചയേന പച്ചയോ – അജ്ഝത്തികാ ച ബാഹിരാ ച ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ; പടിസന്ധിക്ഖണേ അജ്ഝത്തികാ ച ബാഹിരാ ച ഇന്ദ്രിയാ സമ്പയുത്തകാനം ഖന്ധാനം ബാഹിരാനഞ്ച കടത്താരൂപാനം ഇന്ദ്രിയപച്ചയേന പച്ചയോ, ചക്ഖുന്ദ്രിയഞ്ച ഉപേക്ഖിന്ദ്രിയഞ്ച ചക്ഖുവിഞ്ഞാണസഹഗതാനം ഖന്ധാനം ഇന്ദ്രിയപച്ചയേന പച്ചയോ…പേ… കായിന്ദ്രിയഞ്ച സുഖിന്ദ്രിയഞ്ച…പേ… കായിന്ദ്രിയഞ്ച ദുക്ഖിന്ദ്രിയഞ്ച കായവിഞ്ഞാണസഹഗതാനം ഖന്ധാനം ഇന്ദ്രിയപച്ചയേന പച്ചയോ. (൨)

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ച ബാഹിരസ്സ ച ധമ്മസ്സ ഇന്ദ്രിയപച്ചയേന പച്ചയോ – പടിസന്ധിക്ഖണേ അജ്ഝത്തികാ ച ബാഹിരാ ച ഇന്ദ്രിയാ സമ്പയുത്തകാനം ഖന്ധാനം അജ്ഝത്തികാനഞ്ച ബാഹിരാനഞ്ച കടത്താരൂപാനം ഇന്ദ്രിയപച്ചയേന പച്ചയോ, ചക്ഖുന്ദ്രിയഞ്ച ഉപേക്ഖിന്ദ്രിയഞ്ച ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം ഇന്ദ്രിയപച്ചയേന പച്ചയോ… കായിന്ദ്രിയഞ്ച…പേ…. (൩)

ഝാനപച്ചയാദി

൩൫൬. ബാഹിരോ ധമ്മോ ബാഹിരസ്സ ധമ്മസ്സ ഝാനപച്ചയേന പച്ചയോ… തീണി… മഗ്ഗപച്ചയേന പച്ചയോ… തീണി… സമ്പയുത്തപച്ചയേന പച്ചയോ… പഞ്ച.

വിപ്പയുത്തപച്ചയോ

൩൫൭. അജ്ഝത്തികോ ധമ്മോ അജ്ഝത്തികസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതം – പടിസന്ധിക്ഖണേ ചിത്തം അജ്ഝത്തികാനം കടത്താരൂപാനം വിപ്പയുത്തപച്ചയേന പച്ചയോ. പുരേജാതം – ചക്ഖായതനം ചക്ഖുവിഞ്ഞാണസ്സ…പേ… കായായതനം കായവിഞ്ഞാണസ്സ വിപ്പയുത്തപച്ചയേന പച്ചയോ. പച്ഛാജാതാ – അജ്ഝത്തികാ ഖന്ധാ പുരേജാതസ്സ ഇമസ്സ അജ്ഝത്തികസ്സ കായസ്സ വിപ്പയുത്തപച്ചയേന പച്ചയോ. (൧)

അജ്ഝത്തികോ ധമ്മോ ബാഹിരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതാ – അജ്ഝത്തികാ ഖന്ധാ ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ…പേ…. പുരേജാതം – ചക്ഖായതനം ചക്ഖുവിഞ്ഞാണസഹഗതാനം ഖന്ധാനം…പേ… കായായതനം കായവിഞ്ഞാണസഹഗതാനം ഖന്ധാനം വിപ്പയുത്തപച്ചയേന പച്ചയോ. പച്ഛാജാതാ – അജ്ഝത്തികാ ഖന്ധാ പുരേജാതസ്സ ഇമസ്സ ബാഹിരസ്സ കായസ്സ വിപ്പയുത്തപച്ചയേന പച്ചയോ. (൨)

അജ്ഝത്തികോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതാ – പടിസന്ധിക്ഖണേ അജ്ഝത്തികാ ഖന്ധാ അജ്ഝത്തികാനഞ്ച ബാഹിരാനഞ്ച കടത്താരൂപാനം വിപ്പയുത്തപച്ചയേന പച്ചയോ. പുരേജാതം – ചക്ഖായതനം ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം…പേ… കായായതനം കായവിഞ്ഞാണസ്സ സമ്പയുത്തകാനം ഖന്ധാനം വിപ്പയുത്തപച്ചയേന പച്ചയോ. പച്ഛാജാതാ – അജ്ഝത്തികാ ഖന്ധാ പുരേജാതസ്സ ഇമസ്സ അജ്ഝത്തികസ്സ ച ബാഹിരസ്സ ച കായസ്സ വിപ്പയുത്തപച്ചയേന പച്ചയോ. (൩)

൩൫൮. ബാഹിരോ ധമ്മോ ബാഹിരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതാ – ബാഹിരാ ഖന്ധാ ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ…പേ… ഖന്ധാ വത്ഥുസ്സ വിപ്പയുത്തപച്ചയേന പച്ചയോ; വത്ഥു ഖന്ധാനം വിപ്പയുത്തപച്ചയേന പച്ചയോ. പുരേജാതം – വത്ഥു ബാഹിരാനം ഖന്ധാനം വിപ്പയുത്തപച്ചയേന പച്ചയോ. പച്ഛാജാതാ – ബാഹിരാ ഖന്ധാ പുരേജാതസ്സ ഇമസ്സ ബാഹിരസ്സ കായസ്സ വിപ്പയുത്തപച്ചയേന പച്ചയോ. (൧)

ബാഹിരോ ധമ്മോ അജ്ഝത്തികസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതാ – പടിസന്ധിക്ഖണേ ബാഹിരാ ഖന്ധാ അജ്ഝത്തികാനം കടത്താരൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ വത്ഥു ചിത്തസ്സ വിപ്പയുത്തപച്ചയേന പച്ചയോ. പുരേജാതം – വത്ഥു ചിത്തസ്സ വിപ്പയുത്തപച്ചയേന പച്ചയോ. പച്ഛാജാതാ – ബാഹിരാ ഖന്ധാ പുരേജാതസ്സ ഇമസ്സ അജ്ഝത്തികസ്സ കായസ്സ വിപ്പയുത്തപച്ചയേന പച്ചയോ. (൨)

ബാഹിരോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം (സംഖിത്തം). (൩)

൩൫൯. അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം. സഹജാതാ – പടിസന്ധിക്ഖണേ അജ്ഝത്തികാ ച ബാഹിരാ ച ഖന്ധാ അജ്ഝത്തികാനം കടത്താരൂപാനം വിപ്പയുത്തപച്ചയേന പച്ചയോ. പച്ഛാജാതം – പച്ഛാജാതാ…പേ… (സംഖിത്തം). (൧)

അജ്ഝത്തികോ ച ബാഹിരോ ച ധമ്മാ ബാഹിരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം (സംഖിത്തം). (൨)

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ച ബാഹിരസ്സ ച ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം. സഹജാതാ – പടിസന്ധിക്ഖണേ അജ്ഝത്തികാ ച ബാഹിരാ ച ഖന്ധാ…പേ… (സംഖിത്തം). (൩)

അത്ഥിപച്ചയാദി

൩൬൦. അജ്ഝത്തികോ ധമ്മോ അജ്ഝത്തികസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതാ – പടിസന്ധിക്ഖണേ ചിത്തം അജ്ഝത്തികാനം കടത്താരൂപാനം അത്ഥിപച്ചയേന പച്ചയോ. പുരേജാതം – ചക്ഖും…പേ… കായം അനിച്ചതോ…പേ… (പുരേജാതസദിസം, നിന്നാനാകരണം). പച്ഛാജാതം (പച്ഛാജാതസദിസം കാതബ്ബം). (൧)

അജ്ഝത്തികോ ധമ്മോ ബാഹിരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതം – സഹജാതാ അജ്ഝത്തികാ ഖന്ധാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അത്ഥിപച്ചയേന പച്ചയോ (സംഖിത്തം). (൨)

(ഇധ അത്ഥി സബ്ബട്ഠാനേ സഹജാതം പച്ചയവാരസദിസം. പുരേജാതം പുരേജാതസദിസം. പച്ഛാജാതം പച്ഛാജാതസദിസം കാതബ്ബം, നിന്നാനാകരണം).

അജ്ഝത്തികോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം (സംഖിത്തം). (൩)

൩൬൧. ബാഹിരോ ധമ്മോ ബാഹിരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സബ്ബം വിത്ഥാരേതബ്ബം). (൧)

ബാഹിരോ ധമ്മോ അജ്ഝത്തികസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സംഖിത്തം). (൨)

ബാഹിരോ ധമ്മോ അജ്ഝത്തികസ്സ ച ബാഹിരസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സംഖിത്തം). (൩)

൩൬൨. അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം. സഹജാതാ – ചക്ഖുവിഞ്ഞാണസഹഗതാ ഖന്ധാ ച ചക്ഖായതനഞ്ച ചക്ഖുവിഞ്ഞാണസഹഗതാ ഖന്ധാ ച ചക്ഖായതനഞ്ച ചക്ഖുവിഞ്ഞാണസ്സ അത്ഥിപച്ചയേന പച്ചയോ…പേ… കായവിഞ്ഞാണസഹഗതാ ഖന്ധാ ച…പേ… പടിസന്ധിക്ഖണേ അജ്ഝത്തികാ ച ബാഹിരാ ച ഖന്ധാ അജ്ഝത്തികാനം കടത്താരൂപാനം അത്ഥിപച്ചയേന പച്ചയോ. പുരേജാതം – ചക്ഖായതനഞ്ച വത്ഥു ച ചിത്തസ്സ അത്ഥിപച്ചയേന പച്ചയോ…പേ… കായായതനഞ്ച വത്ഥു ച ചിത്തസ്സ അത്ഥിപച്ചയേന പച്ചയോ; രൂപായതനഞ്ച ചക്ഖായതനഞ്ച ചക്ഖുവിഞ്ഞാണസ്സ…പേ… ഫോട്ഠബ്ബായതനഞ്ച കായായതനഞ്ച കായവിഞ്ഞാണസ്സ അത്ഥിപച്ചയേന പച്ചയോ. പച്ഛാജാതാ – അജ്ഝത്തികാ ച ബാഹിരാ ച ഖന്ധാ പുരേജാതസ്സ ഇമസ്സ അജ്ഝത്തികസ്സ കായസ്സ അത്ഥിപച്ചയേന പച്ചയോ. പച്ഛാജാതാ – അജ്ഝത്തികാ ച ബാഹിരാ ച ഖന്ധാ കബളീകാരോ ആഹാരോ ച ഇമസ്സ അജ്ഝത്തികസ്സ കായസ്സ അത്ഥിപച്ചയേന പച്ചയോ. പച്ഛാജാതാ – അജ്ഝത്തികാ ച ബാഹിരാ ച ഖന്ധാ രൂപജീവിതിന്ദ്രിയഞ്ച അജ്ഝത്തികാനം കടത്താരൂപാനം അത്ഥിപച്ചയേന പച്ചയോ. (൧)

അജ്ഝത്തികോ ച ബാഹിരോ ച ധമ്മാ ബാഹിരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം. സഹജാതോ – ചക്ഖുവിഞ്ഞാണസഹഗതോ ഏകോ ഖന്ധോ ച ചക്ഖായതനഞ്ച ചക്ഖുവിഞ്ഞാണഞ്ച ദ്വിന്നം ഖന്ധാനം അത്ഥിപച്ചയേന പച്ചയോ…പേ… (സഹജാതപച്ചയവാരസദിസം നിന്നാനാകരണം, പഠമഗമനസദിസംയേവ. സബ്ബേ പദാ പഠമഘടനാനയേന വിഭജിതബ്ബാ). (൨)

അജ്ഝത്തികോ ച ബാഹിരോ ച ധമ്മാ അജ്ഝത്തികസ്സ ച ബാഹിരസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം. സഹജാതോ – ചക്ഖുവിഞ്ഞാണസഹഗതോ ഏകോ ഖന്ധോ ച ചക്ഖായതനഞ്ച ദ്വിന്നം ഖന്ധാനം ചക്ഖുവിഞ്ഞാണസ്സ ച അത്ഥിപച്ചയേന പച്ചയോ (സംഖിത്തം. സബ്ബേ പദാ വിഭജിതബ്ബാ പഠമഘടനാനയേന). (൩)

നത്ഥിപച്ചയേന പച്ചയോ… വിഗതപച്ചയേന പച്ചയോ… അവിഗതപച്ചയേന പച്ചയോ.