൧. വിഭങ്ഗവാരോ

ഹേതുപച്ചയോ

൩൩൨. അജ്ഝത്തികം ധമ്മം പച്ചയാ അജ്ഝത്തികോ ധമ്മോ ഉപ്പജ്ജതി ഹേതുപച്ചയാ… തീണി (പടിച്ചസദിസാ).

ബാഹിരം ധമ്മം പച്ചയാ ബാഹിരോ ധമ്മോ ഉപ്പജ്ജതി ഹേതുപച്ചയാ – ബാഹിരം ഏകം ഖന്ധം പച്ചയാ ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ…പേ… (പടിസന്ധിക്ഖണേ ദ്വേപി കാതബ്ബാ, യാവ അജ്ഝത്തികാ മഹാഭൂതാ) വത്ഥും പച്ചയാ ബാഹിരാ ഖന്ധാ. ബാഹിരം ധമ്മം പച്ചയാ അജ്ഝത്തികോ ധമ്മോ ഉപ്പജ്ജതി ഹേതുപച്ചയാ – ബാഹിരേ ഖന്ധേ പച്ചയാ ചിത്തം, വത്ഥും പച്ചയാ ചിത്തം (പടിസന്ധിക്ഖണേ ദ്വേപി കാതബ്ബാ). ബാഹിരം ധമ്മം പച്ചയാ അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ഹേതുപച്ചയാ – ബാഹിരം ഏകം ഖന്ധം പച്ചയാ ദ്വേ ഖന്ധാ ചിത്തഞ്ച ചിത്തസമുട്ഠാനഞ്ച രൂപം, ദ്വേ ഖന്ധേ…പേ… വത്ഥും പച്ചയാ ചിത്തം സമ്പയുത്തകാ ച ഖന്ധാ (പടിസന്ധിക്ഖണേ ദ്വേപി കാതബ്ബാ). (൩)

൩൩൩. അജ്ഝത്തികഞ്ച ബാഹിരഞ്ച ധമ്മം പച്ചയാ അജ്ഝത്തികോ ധമ്മോ ഉപ്പജ്ജതി ഹേതുപച്ചയാ – പടിസന്ധിക്ഖണേ ചിത്തഞ്ച സമ്പയുത്തകേ ച ഖന്ധേ പച്ചയാ അജ്ഝത്തികം കടത്താരൂപം. അജ്ഝത്തികഞ്ച ബാഹിരഞ്ച ധമ്മം പച്ചയാ ബാഹിരോ ധമ്മോ ഉപ്പജ്ജതി ഹേതുപച്ചയാ – ബാഹിരം ഏകം ഖന്ധഞ്ച ചിത്തഞ്ച പച്ചയാ ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ…പേ… ചിത്തഞ്ച മഹാഭൂതേ ച പച്ചയാ ചിത്തസമുട്ഠാനം രൂപം, ചിത്തഞ്ച വത്ഥുഞ്ച പച്ചയാ ബാഹിരാ ഖന്ധാ (പടിസന്ധിക്ഖണേ തീണിപി കാതബ്ബാ). അജ്ഝത്തികഞ്ച ബാഹിരഞ്ച ധമ്മം പച്ചയാ അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ഹേതുപച്ചയാ – പടിസന്ധിക്ഖണേ ബാഹിരം ഏകം ഖന്ധഞ്ച ചിത്തഞ്ച പച്ചയാ ദ്വേ ഖന്ധാ അജ്ഝത്തികഞ്ച ബാഹിരഞ്ച കടത്താരൂപം, ദ്വേ ഖന്ധേ…പേ…. (൩)

ആരമ്മണപച്ചയോ

൩൩൪. അജ്ഝത്തികം ധമ്മം പച്ചയാ അജ്ഝത്തികോ ധമ്മോ ഉപ്പജ്ജതി ആരമ്മണപച്ചയാ – ചക്ഖായതനം പച്ചയാ ചക്ഖുവിഞ്ഞാണം…പേ… കായായതനം …പേ…. അജ്ഝത്തികം ധമ്മം പച്ചയാ ബാഹിരോ ധമ്മോ ഉപ്പജ്ജതി ആരമ്മണപച്ചയാ – ചക്ഖായതനഞ്ച ചക്ഖുവിഞ്ഞാണഞ്ച പച്ചയാ ചക്ഖുവിഞ്ഞാണസഹഗതാ ഖന്ധാ…പേ… കായായതനഞ്ച…പേ… ചിത്തം പച്ചയാ സമ്പയുത്തകാ ഖന്ധാ; പടിസന്ധിക്ഖണേ…പേ…. അജ്ഝത്തികം ധമ്മം പച്ചയാ അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ആരമ്മണപച്ചയാ – ചക്ഖായതനം പച്ചയാ ചക്ഖുവിഞ്ഞാണം സമ്പയുത്തകാ ച ഖന്ധാ…പേ… കായായതനം…പേ…. (൩)

ബാഹിരം ധമ്മം പച്ചയാ ബാഹിരോ ധമ്മോ ഉപ്പജ്ജതി ആരമ്മണപച്ചയാ – ബാഹിരം ഏകം ഖന്ധം പച്ചയാ ദ്വേ ഖന്ധാ, ദ്വേ ഖന്ധേ…പേ… പടിസന്ധിക്ഖണേ…പേ… വത്ഥും പച്ചയാ ബാഹിരാ ഖന്ധാ. ബാഹിരം ധമ്മം പച്ചയാ അജ്ഝത്തികോ ധമ്മോ ഉപ്പജ്ജതി ആരമ്മണപച്ചയാ – ബാഹിരേ ഖന്ധേ പച്ചയാ ചിത്തം, വത്ഥും പച്ചയാ ചിത്തം (പടിസന്ധിക്ഖണേ ദ്വേപി കാതബ്ബാ). ബാഹിരം ധമ്മം പച്ചയാ അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ആരമ്മണപച്ചയാ – വത്ഥും പച്ചയാ ചിത്തഞ്ച സമ്പയുത്തകാ ച ഖന്ധാ (പടിസന്ധിക്ഖണേ ഏകം കാതബ്ബം). (൩)

൩൩൫. അജ്ഝത്തികഞ്ച ബാഹിരഞ്ച ധമ്മം പച്ചയാ അജ്ഝത്തികോ ധമ്മോ ഉപ്പജ്ജതി ആരമ്മണപച്ചയാ – ചക്ഖുവിഞ്ഞാണസഹഗതേ ഖന്ധേ ച ചക്ഖായതനഞ്ച പച്ചയാ ചക്ഖുവിഞ്ഞാണം…പേ… കായവിഞ്ഞാണസഹഗതേ…പേ….

അജ്ഝത്തികഞ്ച ബാഹിരഞ്ച ധമ്മം പച്ചയാ ബാഹിരോ ധമ്മോ ഉപ്പജ്ജതി ആരമ്മണപച്ചയാ – ചക്ഖുവിഞ്ഞാണസഹഗതം ഏകം ഖന്ധഞ്ച ചക്ഖായതനഞ്ച ചക്ഖുവിഞ്ഞാണഞ്ച പച്ചയാ ദ്വേ ഖന്ധാ, ദ്വേ ഖന്ധേ…പേ… കായവിഞ്ഞാണസഹഗതം…പേ… ബാഹിരം ഏകം ഖന്ധഞ്ച ചിത്തഞ്ച പച്ചയാ ദ്വേ ഖന്ധാ, ദ്വേ ഖന്ധേ…പേ… ചിത്തഞ്ച വത്ഥുഞ്ച പച്ചയാ ബാഹിരാ ഖന്ധാ (പടിസന്ധിക്ഖണേ ദ്വേപി കാതബ്ബാ). അജ്ഝത്തികഞ്ച ബാഹിരഞ്ച ധമ്മം പച്ചയാ അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ആരമ്മണപച്ചയാ – ചക്ഖുവിഞ്ഞാണസഹഗതം ഏകം ഖന്ധഞ്ച ചക്ഖായതനഞ്ച പച്ചയാ ദ്വേ ഖന്ധാ ചക്ഖുവിഞ്ഞാണഞ്ച, ദ്വേ ഖന്ധേ…പേ… (സംഖിത്തം). (൩)