൧. വിഭങ്ഗവാരോ

ഹേതുപച്ചയോ

൩൧൮. അജ്ഝത്തികം ധമ്മം പടിച്ച അജ്ഝത്തികോ ധമ്മോ ഉപ്പജ്ജതി ഹേതുപച്ചയാ – പടിസന്ധിക്ഖണേ ചിത്തം പടിച്ച അജ്ഝത്തികം കടത്താരൂപം. (൧)

അജ്ഝത്തികം ധമ്മം പടിച്ച ബാഹിരോ ധമ്മോ ഉപ്പജ്ജതി ഹേതുപച്ചയാ – ചിത്തം പടിച്ച സമ്പയുത്തകാ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ ബാഹിരം കടത്താ ച രൂപം. (൨)

അജ്ഝത്തികം ധമ്മം പടിച്ച അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ഹേതുപച്ചയാ – പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ അജ്ഝത്തികഞ്ച ബാഹിരഞ്ച കടത്താരൂപം. (൩)

൩൧൯. ബാഹിരം ധമ്മം പടിച്ച ബാഹിരോ ധമ്മോ ഉപ്പജ്ജതി ഹേതുപച്ചയാ – ബാഹിരം ഏകം ഖന്ധം പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ…പേ… പടിസന്ധിക്ഖണേ ബാഹിരം ഏകം ഖന്ധം പടിച്ച ദ്വേ ഖന്ധാ ബാഹിരം കടത്താ ച രൂപം, ദ്വേ ഖന്ധേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ, ഏകം മഹാഭൂതം…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. (൧)

ബാഹിരം ധമ്മം പടിച്ച അജ്ഝത്തികോ ധമ്മോ ഉപ്പജ്ജതി ഹേതുപച്ചയാ – ബാഹിരേ ഖന്ധേ പടിച്ച ചിത്തം; പടിസന്ധിക്ഖണേ ബാഹിരേ ഖന്ധേ പടിച്ച ചിത്തം അജ്ഝത്തികം കടത്താ ച രൂപം, പടിസന്ധിക്ഖണേ ബാഹിരം വത്ഥും പടിച്ച ചിത്തം. (൨)

ബാഹിരം ധമ്മം പടിച്ച അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ഹേതുപച്ചയാ – ബാഹിരം ഏകം ഖന്ധം പടിച്ച ദ്വേ ഖന്ധാ ചിത്തഞ്ച ചിത്തസമുട്ഠാനഞ്ച രൂപം, ദ്വേ ഖന്ധേ…പേ… പടിസന്ധിക്ഖണേ ബാഹിരം ഏകം ഖന്ധം പടിച്ച ദ്വേ ഖന്ധാ ചിത്തഞ്ച അജ്ഝത്തികഞ്ച ബാഹിരഞ്ച കടത്താരൂപം, ദ്വേ ഖന്ധേ…പേ… പടിസന്ധിക്ഖണേ വത്ഥും പടിച്ച ചിത്തം സമ്പയുത്തകാ ച ഖന്ധാ. (൩)

൩൨൦. അജ്ഝത്തികഞ്ച ബാഹിരഞ്ച ധമ്മം പടിച്ച അജ്ഝത്തികോ ധമ്മോ ഉപ്പജ്ജതി ഹേതുപച്ചയാ – പടിസന്ധിക്ഖണേ ചിത്തഞ്ച സമ്പയുത്തകേ ച ഖന്ധേ പടിച്ച അജ്ഝത്തികം കടത്താരൂപം. (൧)

അജ്ഝത്തികഞ്ച ബാഹിരഞ്ച ധമ്മം പടിച്ച ബാഹിരോ ധമ്മോ ഉപ്പജ്ജതി ഹേതുപച്ചയാ – ബാഹിരം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ ച…പേ… ചിത്തഞ്ച മഹാഭൂതേ ച പടിച്ച ചിത്തസമുട്ഠാനം രൂപം; പടിസന്ധിക്ഖണേ ബാഹിരം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ ബാഹിരം കടത്താ ച രൂപം, ദ്വേ ഖന്ധേ ച…പേ… ചിത്തഞ്ച മഹാഭൂതേ ച പടിച്ച ബാഹിരം കടത്താരൂപം, പടിസന്ധിക്ഖണേ ചിത്തഞ്ച വത്ഥുഞ്ച പടിച്ച ബാഹിരാ ഖന്ധാ. (൨)

അജ്ഝത്തികഞ്ച ബാഹിരഞ്ച ധമ്മം പടിച്ച അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ഹേതുപച്ചയാ – പടിസന്ധിക്ഖണേ ബാഹിരം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ അജ്ഝത്തികഞ്ച ബാഹിരഞ്ച കടത്താരൂപം, ദ്വേ ഖന്ധേ ച…പേ…. (൩)

ആരമ്മണപച്ചയോ

൩൨൧. അജ്ഝത്തികം ധമ്മം പടിച്ച ബാഹിരോ ധമ്മോ ഉപ്പജ്ജതി ആരമ്മണപച്ചയാ – ചിത്തം പടിച്ച സമ്പയുത്തകാ ഖന്ധാ; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ. (൧)

ബാഹിരം ധമ്മം പടിച്ച ബാഹിരോ ധമ്മോ ഉപ്പജ്ജതി ആരമ്മണപച്ചയാ – ബാഹിരം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ…പേ… പടിസന്ധിക്ഖണേ…പേ… വത്ഥും പടിച്ച ഖന്ധാ. (൧)

ബാഹിരം ധമ്മം പടിച്ച അജ്ഝത്തികോ ധമ്മോ ഉപ്പജ്ജതി ആരമ്മണപച്ചയാ – ബാഹിരേ ഖന്ധേ പടിച്ച ചിത്തം; പടിസന്ധിക്ഖണേ ബാഹിരേ ഖന്ധേ പടിച്ച ചിത്തം, പടിസന്ധിക്ഖണേ വത്ഥും പടിച്ച ചിത്തം. (൨)

ബാഹിരം ധമ്മം പടിച്ച അജ്ഝത്തികോ ച ബാഹിരോ ച ധമ്മാ ഉപ്പജ്ജന്തി ആരമ്മണപച്ചയാ – ബാഹിരം ഏകം ഖന്ധം പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ…പേ… പടിസന്ധിക്ഖണേ ബാഹിരം ഏകം ഖന്ധം പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ…പേ… പടിസന്ധിക്ഖണേ വത്ഥും പടിച്ച ചിത്തം സമ്പയുത്തകാ ച ഖന്ധാ. (൩)

അജ്ഝത്തികഞ്ച ബാഹിരഞ്ച ധമ്മം പടിച്ച ബാഹിരോ ധമ്മോ ഉപ്പജ്ജതി ആരമ്മണപച്ചയാ – ബാഹിരം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… പടിസന്ധിക്ഖണേ ബാഹിരം ഏകം ഖന്ധം ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… പടിസന്ധിക്ഖണേ ബാഹിരം ഏകം ഖന്ധഞ്ച ചിത്തഞ്ച വത്ഥുഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… (സംഖിത്തം). (൧)