൧. വിഭങ്ഗവാരോ

ഹേതുപച്ചയോ

൨൭൮. ചിത്തസംസട്ഠസമുട്ഠാനം ധമ്മം പടിച്ച ചിത്തസംസട്ഠസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസംസട്ഠസമുട്ഠാനം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ; പടിസന്ധിക്ഖണേ…പേ…. (൧)

ചിത്തസംസട്ഠസമുട്ഠാനം ധമ്മം പടിച്ച നോചിത്തസംസട്ഠസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസംസട്ഠസമുട്ഠാനേ ഖന്ധേ പടിച്ച ചിത്തം ചിത്തസമുട്ഠാനഞ്ച രൂപം; പടിസന്ധിക്ഖണേ ചിത്തസംസട്ഠസമുട്ഠാനേ ഖന്ധേ പടിച്ച ചിത്തം കടത്താ ച രൂപം. (൨)

ചിത്തസംസട്ഠസമുട്ഠാനം ധമ്മം പടിച്ച ചിത്തസംസട്ഠസമുട്ഠാനോ ച നോചിത്തസംസട്ഠസമുട്ഠാനോ ച ധമ്മാ ഉപ്പജ്ജന്തി ഹേതുപച്ചയാ – ചിത്തസംസട്ഠസമുട്ഠാനം ഏകം ഖന്ധം പടിച്ച ദ്വേ ഖന്ധാ ചിത്തഞ്ച ചിത്തസമുട്ഠാനഞ്ച രൂപം, ദ്വേ ഖന്ധേ…പേ… പടിസന്ധിക്ഖണേ…പേ…. (൩)

൨൭൯. നോചിത്തസംസട്ഠസമുട്ഠാനം ധമ്മം പടിച്ച നോചിത്തസംസട്ഠസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തം പടിച്ച ചിത്തസമുട്ഠാനം രൂപം; പടിസന്ധിക്ഖണേ ചിത്തം പടിച്ച കടത്താരൂപം, ചിത്തം പടിച്ച വത്ഥു, വത്ഥും പടിച്ച ചിത്തം, ഏകം മഹാഭൂതം…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. (൧)

നോചിത്തസംസട്ഠസമുട്ഠാനം ധമ്മം പടിച്ച ചിത്തസംസട്ഠസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തം പടിച്ച സമ്പയുത്തകാ ഖന്ധാ; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ, പടിസന്ധിക്ഖണേ വത്ഥും പടിച്ച ചിത്തസംസട്ഠസമുട്ഠാനാ ഖന്ധാ. (൨)

നോചിത്തസംസട്ഠസമുട്ഠാനം ധമ്മം പടിച്ച ചിത്തസംസട്ഠസമുട്ഠാനോ ച നോചിത്തസംസട്ഠസമുട്ഠാനോ ച ധമ്മാ ഉപ്പജ്ജന്തി ഹേതുപച്ചയാ – ചിത്തം പടിച്ച സമ്പയുത്തകാ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ കടത്താ ച രൂപം, പടിസന്ധിക്ഖണേ വത്ഥും പടിച്ച ചിത്തം സമ്പയുത്തകാ ച ഖന്ധാ. (൩)

൨൮൦. ചിത്തസംസട്ഠസമുട്ഠാനഞ്ച നോചിത്തസംസട്ഠസമുട്ഠാനഞ്ച ധമ്മം പടിച്ച ചിത്തസംസട്ഠസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസംസട്ഠസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ…പേ… പടിസന്ധിക്ഖണേ ചിത്തസംസട്ഠസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ…പേ… പടിസന്ധിക്ഖണേ ചിത്തസംസട്ഠസമുട്ഠാനം ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ, ദ്വേ ഖന്ധേ…പേ…. (൧)

ചിത്തസംസട്ഠസമുട്ഠാനഞ്ച നോചിത്തസംസട്ഠസമുട്ഠാനഞ്ച ധമ്മം പടിച്ച നോചിത്തസംസട്ഠസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസംസട്ഠസമുട്ഠാനേ ഖന്ധേ ച ചിത്തഞ്ച പടിച്ച ചിത്തസമുട്ഠാനം രൂപം, ചിത്തസംസട്ഠസമുട്ഠാനേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം; പടിസന്ധിക്ഖണേ ചിത്തസംസട്ഠസമുട്ഠാനേ ഖന്ധേ ച ചിത്തഞ്ച പടിച്ച കടത്താരൂപം, പടിസന്ധിക്ഖണേ ചിത്തസംസട്ഠസമുട്ഠാനേ ഖന്ധേ ച മഹാഭൂതേ ച പടിച്ച കടത്താരൂപം, പടിസന്ധിക്ഖണേ ചിത്തസംസട്ഠസമുട്ഠാനേ ഖന്ധേ ച വത്ഥുഞ്ച പടിച്ച ചിത്തം. (൨)

ചിത്തസംസട്ഠസമുട്ഠാനഞ്ച നോചിത്തസംസട്ഠസമുട്ഠാനഞ്ച ധമ്മം പടിച്ച ചിത്തസംസട്ഠസമുട്ഠാനോ ച നോചിത്തസംസട്ഠസമുട്ഠാനോ ച ധമ്മാ ഉപ്പജ്ജന്തി ഹേതുപച്ചയാ – ചിത്തസംസട്ഠസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ…പേ… പടിസന്ധിക്ഖണേ ചിത്തസംസട്ഠസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ കടത്താ ച രൂപം, ദ്വേ ഖന്ധേ…പേ… പടിസന്ധിക്ഖണേ ചിത്തസംസട്ഠസമുട്ഠാനം ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ…പേ… (സംഖിത്തം). (൩)