൧. വിഭങ്ഗവാരോ

ഹേതുപച്ചയോ

൨൫൭. ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ ഹേതുപച്ചയേന പച്ചയോ – ചിത്തസഹഭൂ ഹേതൂ സമ്പയുത്തകാനം ഖന്ധാനം ചിത്തസഹഭൂനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൧)

ചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ ഹേതുപച്ചയേന പച്ചയോ – ചിത്തസഹഭൂ ഹേതൂ ചിത്തസ്സ നോചിത്തസഹഭൂനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ ചിത്തസഹഭൂ ഹേതൂ ചിത്തസ്സ കടത്താ ച രൂപാനം ഹേതുപച്ചയേന പച്ചയോ. (൨)

ചിത്തസഹഭൂ ധമ്മോ ചിത്തസഹഭുസ്സ ച നോചിത്തസഹഭുസ്സ ച ധമ്മസ്സ ഹേതുപച്ചയേന പച്ചയോ; ചിത്തസഹഭൂ ഹേതൂ സമ്പയുത്തകാനം ഖന്ധാനം ചിത്തസ്സ ച ചിത്തസഹഭൂനഞ്ച നോചിത്തസഹഭൂനഞ്ച ചിത്തസമുട്ഠാനാനം രൂപാനം ഹേതുപച്ചയേന പച്ചയോ. (൩)

ആരമ്മണപച്ചയോ

൨൫൮. ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ ആരമ്മണപച്ചയേന പച്ചയോ… നവ (ചിത്തസമുട്ഠാനദുകസദിസം, നിന്നാനാകരണം).

അധിപതിപച്ചയോ

൨൫൯. ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ അധിപതിപച്ചയേന പച്ചയോ… തീണി (ആരമ്മണാധിപതിപി സഹജാതാധിപതിപി കാതബ്ബാ).

നോചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ അധിപതിപച്ചയേന പച്ചയോ… തീണി (ആരമ്മണാധിപതിപി സഹജാതാധിപതിപി ഇമേസമ്പി തിണ്ണം കാതബ്ബാ. നവപി പഞ്ഹാ ചിത്തസമുട്ഠാനദുകസദിസാ. അന്തേ തീണി ആരമ്മണാധിപതിയേവ).

അനന്തരപച്ചയാദി

൨൬൦. ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ അനന്തരപച്ചയേന പച്ചയോ… നവ (ചിത്തസമുട്ഠാനദുകസദിസം, നിന്നാനാകരണം)… സമനന്തരപച്ചയേന പച്ചയോ… നവ (പടിച്ചസദിസാ) … സഹജാതപച്ചയേന പച്ചയോ… നവ (പടിച്ചസദിസാ)… അഞ്ഞമഞ്ഞപച്ചയേന പച്ചയോ… നവ (പടിച്ചസദിസാ)… നിസ്സയപച്ചയേന പച്ചയോ… നവ (പച്ചയവാരസദിസാ)… ഉപനിസ്സയപച്ചയേന പച്ചയോ… നവ (ചിത്തസമുട്ഠാനദുകസദിസാ).

പുരേജാതപച്ചയോ

൨൬൧. നോചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം… തീണി (നോചിത്തസഹഭൂ മൂലംയേവ ലബ്ഭതി, ചിത്തസമുട്ഠാനദുകസദിസാ. തീണിപി നിന്നാനാകരണം).

പച്ഛാജാതാസേവനപച്ചയാ

൨൬൨. ചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ ചിത്തസഹഭൂ ഖന്ധാ പുരേജാതസ്സ ഇമസ്സ നോചിത്തസഹഭുസ്സ കായസ്സ പച്ഛാജാതപച്ചയേന പച്ചയോ. (൧)

നോചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ പച്ഛാജാതപച്ചയേന പച്ചയോ…പേ…. (൧)

ചിത്തസഹഭൂ ച നോചിത്തസഹഭൂ ച ധമ്മാ നോചിത്തസഹഭുസ്സ ധമ്മസ്സ പച്ഛാജാതപച്ചയേന പച്ചയോ (സംഖിത്തം)… ആസേവനപച്ചയേന പച്ചയോ… നവ.

കമ്മപച്ചയോ

൨൬൩. ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ചിത്തസഹഭൂ ചേതനാ സമ്പയുത്തകാനം ഖന്ധാനം ചിത്തസഹഭൂനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ചിത്തസഹഭൂ ചേതനാ വിപാകാനം ചിത്തസഹഭൂനം ഖന്ധാനം കമ്മപച്ചയേന പച്ചയോ. (൧)

ചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ചിത്തസഹഭൂ ചേതനാ ചിത്തസ്സ നോചിത്തസഹഭൂനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ചിത്തസഹഭൂ ചേതനാ വിപാകസ്സ ചിത്തസ്സ കടത്താ ച രൂപാനം കമ്മപച്ചയേന പച്ചയോ. (൨)

ചിത്തസഹഭൂ ധമ്മോ ചിത്തസഹഭുസ്സ ച നോചിത്തസഹഭുസ്സ ച ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ചിത്തസഹഭൂ ചേതനാ സമ്പയുത്തകാനം ഖന്ധാനം ചിത്തസ്സ ച ചിത്തസഹഭൂനഞ്ച നോചിത്തസഹഭൂനഞ്ച ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ചിത്തസഹഭൂ ചേതനാ വിപാകാനം ഖന്ധാനം ചിത്തസ്സ കടത്താ ച രൂപാനം കമ്മപച്ചയേന പച്ചയോ. (൩)

വിപാകപച്ചയാദി

൨൬൪. ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ വിപാകപച്ചയേന പച്ചയോ (ചിത്തസമുട്ഠാനദുകസദിസം)… ആഹാരപച്ചയേന പച്ചയോ… നവ (ചിത്തസമുട്ഠാനദുകസദിസാ. ഇമമ്പി ഏകം കബളീകാരആഹാരസദിസം). ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ ഇന്ദ്രിയപച്ചയേന പച്ചയോ… നവ (ചിത്തസമുട്ഠാനദുകസദിസം, നിന്നാനാകരണം)… ഝാനപച്ചയേന പച്ചയോ… തീണി… മഗ്ഗപച്ചയേന പച്ചയോ… തീണി… സമ്പയുത്തപച്ചയേന പച്ചയോ… പഞ്ച.

വിപ്പയുത്തപച്ചയോ

൨൬൫. ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ വിപ്പയുത്തപച്ചയേന പച്ചയോ. സഹജാതാ – ചിത്തസഹഭൂ ഖന്ധാ ചിത്തസഹഭൂനം ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ. (൧)

ചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം. സഹജാതാ – ചിത്തസഹഭൂ ഖന്ധാ നോചിത്തസഹഭൂനം ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ…പേ…. പച്ഛാജാതാ – ചിത്തസഹഭൂ ഖന്ധാ പുരേജാതസ്സ ഇമസ്സ നോചിത്തസഹഭുസ്സ കായസ്സ വിപ്പയുത്തപച്ചയേന പച്ചയോ. (൨)

ചിത്തസഹഭൂ ധമ്മോ ചിത്തസഹഭുസ്സ ച നോചിത്തസഹഭുസ്സ ച ധമ്മസ്സ വിപ്പയുത്തപച്ചയേന പച്ചയോ. സഹജാതാ – ചിത്തസഹഭൂ ഖന്ധാ ചിത്തസഹഭൂനഞ്ച നോചിത്തസഹഭൂനഞ്ച ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ. (൩)

൨൬൬. നോചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതം – ചിത്തം നോചിത്തസഹഭൂനം ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ ചിത്തം കടത്താരൂപാനം വിപ്പയുത്തപച്ചയേന പച്ചയോ; ചിത്തം വത്ഥുസ്സ വിപ്പയുത്തപച്ചയേന പച്ചയോ; വത്ഥു ചിത്തസ്സ വിപ്പയുത്തപച്ചയേന പച്ചയോ. പുരേജാതം – ചക്ഖായതനം ചക്ഖുവിഞ്ഞാണസ്സ വിപ്പയുത്തപച്ചയേന പച്ചയോ…പേ… കായായതനം…പേ… വത്ഥു ചിത്തസ്സ വിപ്പയുത്തപച്ചയേന പച്ചയോ. പച്ഛാജാതം – ചിത്തം പുരേജാതസ്സ ഇമസ്സ നോചിത്തസഹഭുസ്സ കായസ്സ വിപ്പയുത്തപച്ചയേന പച്ചയോ. (൧)

നോചിത്തസഹഭൂ ധമ്മോ ചിത്തസഹഭുസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം. സഹജാതം – ചിത്തം ചിത്തസഹഭൂനം ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ. പുരേജാതം – ചക്ഖായതനം ചക്ഖുവിഞ്ഞാണസഹഗതാനം ഖന്ധാനം വിപ്പയുത്തപച്ചയേന പച്ചയോ…പേ… കായായതനം…പേ… വത്ഥു ചിത്തസഹഭൂനം ഖന്ധാനം വിപ്പയുത്തപച്ചയേന പച്ചയോ. (൨)

നോചിത്തസഹഭൂ ധമ്മോ ചിത്തസഹഭുസ്സ ച നോചിത്തസഹഭുസ്സ ച ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം. സഹജാതം – ചിത്തം ചിത്തസഹഭൂനഞ്ച നോചിത്തസഹഭൂനഞ്ച ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ…പേ…. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ സമ്പയുത്തകാനഞ്ച രൂപാനം വിപ്പയുത്തപച്ചയേന പച്ചയോ…പേ… കായായതനം…പേ… വത്ഥു ചിത്തസ്സ സമ്പയുത്തകാനഞ്ച ഖന്ധാനം വിപ്പയുത്തപച്ചയേന പച്ചയോ. (൩)

൨൬൭. ചിത്തസഹഭൂ ച നോചിത്തസഹഭൂ ച ധമ്മാ ചിത്തസഹഭുസ്സ ധമ്മസ്സ വിപ്പയുത്തപച്ചയേന പച്ചയോ. സഹജാതാ – ചിത്തസഹഭൂ ഖന്ധാ ച ചിത്തഞ്ച ചിത്തസഹഭൂനം ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ. (൧)

ചിത്തസഹഭൂ ച നോചിത്തസഹഭൂ ച ധമ്മാ നോചിത്തസഹഭുസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം. സഹജാതാ – ചിത്തസഹഭൂ ഖന്ധാ ച ചിത്തഞ്ച നോചിത്തസഹഭൂനം ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ …പേ…. പച്ഛാജാതാ – ചിത്തസഹഭൂ ഖന്ധാ ച ചിത്തഞ്ച പുരേജാതസ്സ ഇമസ്സ നോചിത്തസഹഭുസ്സ കായസ്സ വിപ്പയുത്തപച്ചയേന പച്ചയോ. (൨)

ചിത്തസഹഭൂ ച നോചിത്തസഹഭൂ ച ധമ്മാ ചിത്തസഹഭുസ്സ ച നോചിത്തസഹഭുസ്സ ച ധമ്മസ്സ വിപ്പയുത്തപച്ചയേന പച്ചയോ – ചിത്തസഹഭൂ ഖന്ധാ ച ചിത്തഞ്ച ചിത്തസഹഭൂനഞ്ച നോചിത്തസഹഭൂനഞ്ച ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ. (൩)

അത്ഥിപച്ചയോ

൨൬൮. ചിത്തസഹഭൂ ധമ്മോ ചിത്തസഹഭുസ്സ ധമ്മസ്സ അത്ഥിപച്ചയേന പച്ചയോ – ചിത്തസഹഭൂ ഏകോ ഖന്ധോ…പേ… (പടിച്ചസദിസം). (൧)

ചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ അത്ഥിപച്ചയേന പച്ചയോ – സഹജാതം, പച്ഛാജാതം (സംഖിത്തം). (൨)

ചിത്തസഹഭൂ ധമ്മോ ചിത്തസഹഭുസ്സ ച നോചിത്തസഹഭുസ്സ ച ധമ്മസ്സ അത്ഥിപച്ചയേന പച്ചയോ – ചിത്തസഹഭൂ ഏകോ ഖന്ധോ…പേ… (പടിച്ചസദിസം). (൩)

നോചിത്തസഹഭൂ ധമ്മോ നോചിത്തസഹഭുസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സംഖിത്തം). (൧)

നോചിത്തസഹഭൂ ധമ്മോ ചിത്തസഹഭുസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം (സംഖിത്തം. (൨)

നോചിത്തസഹഭൂ ധമ്മോ ചിത്തസഹഭുസ്സ ച നോചിത്തസഹഭുസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം (സംഖിത്തം). (൩)

൨൬൯. ചിത്തസഹഭൂ ച നോചിത്തസഹഭൂ ച ധമ്മാ ചിത്തസഹഭുസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതോ – ചക്ഖുവിഞ്ഞാണസഹഗതോ ഏകോ ഖന്ധോ ച ചക്ഖായതനഞ്ച ചക്ഖുവിഞ്ഞാണഞ്ച ദ്വിന്നം ഖന്ധാനം…പേ… ദ്വേ ഖന്ധാ ച…പേ… (സബ്ബം പടിസന്ധിയം കാതബ്ബം, സഹജാതം പുരേജാതമ്പി). (൧)

ചിത്തസഹഭൂ ച നോചിത്തസഹഭൂ ച ധമ്മാ നോചിത്തസഹഭുസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം. സഹജാതാ – ചക്ഖുവിഞ്ഞാണസഹഗതാ ഖന്ധാ ചക്ഖായതനഞ്ച ചക്ഖുവിഞ്ഞാണസ്സ അത്ഥിപച്ചയേന പച്ചയോ…പേ… കായവിഞ്ഞാണസഹഗതാ…പേ… ചിത്തസഹഭൂ ഖന്ധാ ച ചിത്തഞ്ച നോചിത്തസഹഭൂനം ചിത്തസമുട്ഠാനാനം രൂപാനം അത്ഥിപച്ചയേന പച്ചയോ. സഹജാതാ – ചിത്തസഹഭൂ ഖന്ധാ ച വത്ഥു ച ചിത്തസ്സ അത്ഥിപച്ചയേന പച്ചയോ. സഹജാതാ – ചിത്തസഹഭൂ ഖന്ധാ ച മഹാഭൂതാ ച നോചിത്തസഹഭൂനം ചിത്തസമുട്ഠാനാനം രൂപാനം അത്ഥിപച്ചയേന പച്ചയോ (പടിസന്ധിക്ഖണേ തീണിപി കാതബ്ബാ). പച്ഛാജാതാ – ചിത്തസഹഭൂ ഖന്ധാ ച ചിത്തഞ്ച പുരേജാതസ്സ ഇമസ്സ നോചിത്തസഹഭുസ്സ കായസ്സ അത്ഥിപച്ചയേന പച്ചയോ. പച്ഛാജാതാ – ചിത്തസഹഭൂ ഖന്ധാ ച കബളീകാരോ ആഹാരോ ച ഇമസ്സ നോചിത്തസഹഭുസ്സ കായസ്സ അത്ഥിപച്ചയേന പച്ചയോ. പച്ഛാജാതാ – ചിത്തസഹഭൂ ഖന്ധാ ച രൂപജീവിതിന്ദ്രിയഞ്ച കടത്താരൂപാനം അത്ഥിപച്ചയേന പച്ചയോ. (൨)

ചിത്തസഹഭൂ ച നോചിത്തസഹഭൂ ച ധമ്മാ ചിത്തസഹഭുസ്സ ച നോചിത്തസഹഭുസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതോ – ചക്ഖുവിഞ്ഞാണസഹഗതോ ഏകോ ഖന്ധോ ച ചക്ഖായതനം ച…പേ… (പച്ചയവാരസദിസം). (൩)