൧. വിഭങ്ഗവാരോ

ഹേതുപച്ചയോ

൨൪൭. ചിത്തസഹഭും ധമ്മം പച്ചയാ ചിത്തസഹഭൂ ധമ്മോ ഉപ്പജ്ജതി ഹേതുപച്ചയാ… തീണി (പടിച്ചസദിസാ).

നോചിത്തസഹഭും ധമ്മം പച്ചയാ നോചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – വത്ഥും പച്ചയാ ചിത്തം, ചിത്തം പച്ചയാ നോചിത്തസഹഭു ചിത്തസമുട്ഠാനം രൂപം; പടിസന്ധിക്ഖണേ…പേ… (പടിച്ചവാരസദിസം, സബ്ബേ മഹാഭൂതാ). (൧)

നോചിത്തസഹഭും ധമ്മം പച്ചയാ ചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തം പച്ചയാ സമ്പയുത്തകാ ഖന്ധാ ചിത്തസഹഭു ചിത്തസമുട്ഠാനഞ്ച രൂപം, വത്ഥും പച്ചയാ ചിത്തസഹഭൂ ഖന്ധാ; പടിസന്ധിക്ഖണേ…പേ… (സബ്ബേ മഹാഭൂതാ പടിച്ചസദിസം). (൨)

നോചിത്തസഹഭും ധമ്മം പച്ചയാ ചിത്തസഹഭൂ ച നോചിത്തസഹഭൂ ച ധമ്മാ ഉപ്പജ്ജന്തി ഹേതുപച്ചയാ – ചിത്തം പച്ചയാ സമ്പയുത്തകാ ഖന്ധാ ചിത്തസഹഭു ച നോചിത്തസഹഭു ച ചിത്തസമുട്ഠാനം രൂപം, വത്ഥും പച്ചയാ ചിത്തഞ്ച സമ്പയുത്തകാ ച ഖന്ധാ; പടിസന്ധിക്ഖണേ…പേ… (പടിച്ചസദിസം, സബ്ബേ മഹാഭൂതാ). (൩)

൨൪൮. ചിത്തസഹഭുഞ്ച നോചിത്തസഹഭുഞ്ച ധമ്മം പച്ചയാ ചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തസഹഭും ഏകം ഖന്ധഞ്ച ചിത്തഞ്ച പച്ചയാ ദ്വേ ഖന്ധാ ചിത്തസഹഭു ചിത്തസമുട്ഠാനഞ്ച രൂപം, ദ്വേ ഖന്ധേ ച…പേ… ചിത്തസഹഭും ഏകം ഖന്ധഞ്ച വത്ഥുഞ്ച പച്ചയാ ദ്വേ ഖന്ധാ, ദ്വേ ഖന്ധേ ച…പേ… പടിസന്ധിക്ഖണേ…പേ… (പടിച്ചസദിസം, സബ്ബേ മഹാഭൂതാ). (൧)

ചിത്തസഹഭുഞ്ച നോചിത്തസഹഭുഞ്ച ധമ്മം പച്ചയാ നോചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തസഹഭൂ ഖന്ധേ ച ചിത്തഞ്ച പച്ചയാ നോചിത്തസഹഭു ചിത്തസമുട്ഠാനം രൂപം, ചിത്തസഹഭൂ ഖന്ധേ ച വത്ഥുഞ്ച പച്ചയാ ചിത്തം. ചിത്തസഹഭൂ ഖന്ധേ ച മഹാഭൂതേ ച പച്ചയാ നോചിത്തസഹഭു ചിത്തസമുട്ഠാനം രൂപം; പടിസന്ധിക്ഖണേ…പേ… (പടിച്ചസദിസം, സബ്ബേ മഹാഭൂതാ). (൨)

ചിത്തസഹഭുഞ്ച നോചിത്തസഹഭുഞ്ച ധമ്മം പച്ചയാ ചിത്തസഹഭൂ ച നോചിത്തസഹഭൂ ച ധമ്മാ ഉപ്പജ്ജന്തി ഹേതുപച്ചയാ – ചിത്തസഹഭും ഏകം ഖന്ധഞ്ച ചിത്തഞ്ച പച്ചയാ ദ്വേ ഖന്ധാ ചിത്തസഹഭു ച നോചിത്തസഹഭു ച ചിത്തസമുട്ഠാനം രൂപം, ചിത്തസഹഭും ഏകം ഖന്ധഞ്ച വത്ഥുഞ്ച പച്ചയാ ദ്വേ ഖന്ധാ ചിത്തഞ്ച, ദ്വേ ഖന്ധേ ച…പേ… പടിസന്ധിക്ഖണേ…പേ… (പടിച്ചസദിസം, സബ്ബേ മഹാഭൂതാ). (൩)

ആരമ്മണപച്ചയോ

൨൪൯. ചിത്തസഹഭും ധമ്മം പച്ചയാ ചിത്തസഹഭൂ ധമ്മോ ഉപ്പജ്ജതി ആരമ്മണപച്ചയാ… തീണി (പടിച്ചസദിസം).

നോചിത്തസഹഭും ധമ്മം പച്ചയാ നോചിത്തസഹഭൂ ധമ്മോ ഉപ്പജ്ജതി ആരമ്മണപച്ചയാ…പേ… ചക്ഖായതനം പച്ചയാ ചക്ഖുവിഞ്ഞാണം…പേ… കായായതനം…പേ…. (ഇമം ചിത്തസമുട്ഠാനദുകം പച്ചയവാരേ ആരമ്മണസദിസം. ഛന്നമ്പി ഇമേസം പഞ്ചവിഞ്ഞാണമൂലാ കാതബ്ബാ. സംഖിത്തം.)