൧. വിഭങ്ഗവാരോ

ഹേതുപച്ചയോ

൨൩൯. ചിത്തസഹഭും ധമ്മം പടിച്ച ചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തസഹഭും ഏകം ഖന്ധം പടിച്ച ദ്വേ ഖന്ധാ ചിത്തസഹഭു ചിത്തസമുട്ഠാനഞ്ച രൂപം, ദ്വേ ഖന്ധേ…പേ… പടിസന്ധിക്ഖണേ ചിത്തസഹഭും ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ…പേ…. (൧)

ചിത്തസഹഭും ധമ്മം പടിച്ച നോചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തസഹഭൂ ഖന്ധേ പടിച്ച ചിത്തം നോചിത്തസഹഭു ചിത്തസമുട്ഠാനഞ്ച രൂപം; പടിസന്ധിക്ഖണേ ചിത്തസഹഭൂ ഖന്ധേ പടിച്ച ചിത്തം കടത്താ ച രൂപം. (൨)

ചിത്തസഹഭും ധമ്മം പടിച്ച ചിത്തസഹഭൂ ച നോചിത്തസഹഭൂ ച ധമ്മാ ഉപ്പജ്ജന്തി ഹേതുപച്ചയാ – ചിത്തസഹഭും ഏകം ഖന്ധം പടിച്ച ദ്വേ ഖന്ധാ ചിത്തഞ്ച ചിത്തസഹഭു ച നോചിത്തസഹഭു ച ചിത്തസമുട്ഠാനം രൂപം, ദ്വേ ഖന്ധേ…പേ… പടിസന്ധിക്ഖണേ ചിത്തസഹഭും ഏകം ഖന്ധം പടിച്ച ദ്വേ ഖന്ധാ ചിത്തഞ്ച കടത്താ ച രൂപം, ദ്വേ ഖന്ധേ…പേ…. (൩)

൨൪൦. നോചിത്തസഹഭും ധമ്മം പടിച്ച നോചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തം പടിച്ച നോചിത്തസഹഭു ചിത്തസമുട്ഠാനം രൂപം; പടിസന്ധിക്ഖണേ ചിത്തം പടിച്ച കടത്താരൂപം, ചിത്തം പടിച്ച വത്ഥു, വത്ഥും പടിച്ച ചിത്തം, ഏകം മഹാഭൂതം…പേ… മഹാഭൂതേ പടിച്ച നോചിത്തസഹഭു ചിത്തസമുട്ഠാനം രൂപം കടത്താരൂപം ഉപാദാരൂപം. (൧)

നോചിത്തസഹഭും ധമ്മം പടിച്ച ചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തം പടിച്ച സമ്പയുത്തകാ ഖന്ധാ ചിത്തസഹഭു ചിത്തസമുട്ഠാനഞ്ച രൂപം; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ, പടിസന്ധിക്ഖണേ വത്ഥും പടിച്ച ചിത്തസഹഭൂ ഖന്ധാ, മഹാഭൂതേ പടിച്ച ചിത്തസഹഭു ചിത്തസമുട്ഠാനം രൂപം ഉപാദാരൂപം. (൨)

നോചിത്തസഹഭും ധമ്മം പടിച്ച ചിത്തസഹഭൂ ച നോചിത്തസഹഭൂ ച ധമ്മാ ഉപ്പജ്ജന്തി ഹേതുപച്ചയാ – ചിത്തം പടിച്ച സമ്പയുത്തകാ ഖന്ധാ ചിത്തസഹഭു ച നോചിത്തസഹഭു ച ചിത്തസമുട്ഠാനം രൂപം; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ കടത്താ ച രൂപം, പടിസന്ധിക്ഖണേ വത്ഥും പടിച്ച ചിത്തഞ്ച സമ്പയുത്തകാ ച ഖന്ധാ, മഹാഭൂതേ പടിച്ച ചിത്തസഹഭു ച നോചിത്തസഹഭു ച ചിത്തസമുട്ഠാനം രൂപം ഉപാദാരൂപം. (൩)

൨൪൧. ചിത്തസഹഭുഞ്ച നോചിത്തസഹഭുഞ്ച ധമ്മം പടിച്ച ചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തസഹഭും ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ ചിത്തസഹഭു ചിത്തസമുട്ഠാനഞ്ച രൂപം, ദ്വേ ഖന്ധേ ച…പേ… പടിസന്ധിക്ഖണേ ചിത്തസഹഭും ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… പടിസന്ധിക്ഖണേ ചിത്തസഹഭും ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… ചിത്തസഹഭൂ ഖന്ധേ ച മഹാഭൂതേ ച പടിച്ച ചിത്തസഹഭു ചിത്തസമുട്ഠാനം രൂപം ഉപാദാരൂപം. (൧)

ചിത്തസഹഭുഞ്ച നോചിത്തസഹഭുഞ്ച ധമ്മം പടിച്ച നോചിത്തസഹഭൂ ധമ്മോ ഉപ്പജ്ജതി ഹേതുപച്ചയാ – ചിത്തസഹഭൂ ഖന്ധേ ച ചിത്തഞ്ച പടിച്ച നോചിത്തസഹഭു ചിത്തസമുട്ഠാനം രൂപം; പടിസന്ധിക്ഖണേ ചിത്തസഹഭൂ ഖന്ധേ ച ചിത്തഞ്ച പടിച്ച കടത്താരൂപം, പടിസന്ധിക്ഖണേ ചിത്തസഹഭൂ ഖന്ധേ ച വത്ഥുഞ്ച പടിച്ച ചിത്തം, ചിത്തസഹഭൂ ഖന്ധേ ച മഹാഭൂതേ ച പടിച്ച നോചിത്തസഹഭു ചിത്തസമുട്ഠാനം രൂപം കടത്താരൂപം ഉപാദാരൂപം. (൨)

ചിത്തസഹഭുഞ്ച നോചിത്തസഹഭുഞ്ച ധമ്മം പടിച്ച ചിത്തസഹഭൂ ച നോചിത്തസഹഭൂ ച ധമ്മാ ഉപ്പജ്ജന്തി ഹേതുപച്ചയാ – ചിത്തസഹഭും ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ ചിത്തസഹഭു ച നോചിത്തസഹഭു ച ചിത്തസമുട്ഠാനം രൂപം, ദ്വേ ഖന്ധേ ച…പേ… പടിസന്ധിക്ഖണേ ചിത്തസഹഭും ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ കടത്താ ച രൂപം, ദ്വേ ഖന്ധേ ച…പേ… പടിസന്ധിക്ഖണേ ചിത്തസഹഭും ഏക ഖന്ധഞ്ച വത്ഥുഞ്ച പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ ച…പേ… ചിത്തസഹഭൂ ഖന്ധേ ച മഹാഭൂതേ ച പടിച്ച കടത്താരൂപം ഉപാദാരൂപം (സംഖിത്തം). (൩)