൧. വിഭങ്ഗവാരോ

ഹേതുപച്ചയോ

൨൦൧. ചിത്തസമുട്ഠാനം ധമ്മം പച്ചയാ ചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ… തീണി (പടിച്ചവാരസദിസം).

നോചിത്തസമുട്ഠാനം ധമ്മം പച്ചയാ നോചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – വത്ഥും പച്ചയാ ചിത്തം; പടിസന്ധിക്ഖണേ…പേ… (പടിച്ചവാരസദിസാ). (൧)

നോചിത്തസമുട്ഠാനം ധമ്മം പച്ചയാ ചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തം പച്ചയാ സമ്പയുത്തകാ ഖന്ധാ ചിത്തസമുട്ഠാനഞ്ച രൂപം, വത്ഥും പച്ചയാ ചിത്തസമുട്ഠാനാ ഖന്ധാ (പടിസന്ധിക്ഖണേ ദ്വേപി കാതബ്ബാ). (൧)

നോചിത്തസമുട്ഠാനം ധമ്മം പച്ചയാ ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ഹേതുപച്ചയാ – വത്ഥും പച്ചയാ ചിത്തം സമ്പയുത്തകാ ച ഖന്ധാ; പടിസന്ധിക്ഖണേ ദ്വേ (പടിച്ചവാരസദിസം). (൩)

൨൦൨. ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പച്ചയാ ചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസമുട്ഠാനം ഏകം ഖന്ധഞ്ച ചിത്തഞ്ച പച്ചയാ ദ്വേ ഖന്ധാ, ദ്വേ ഖന്ധേ…പേ… ചിത്തസമുട്ഠാനം ഏകം ഖന്ധഞ്ച വത്ഥുഞ്ച പച്ചയാ ദ്വേ ഖന്ധാ, ദ്വേ ഖന്ധേ…പേ… (പടിസന്ധിക്ഖണേ ദ്വേപി പടിച്ചവാരസദിസാ). (൧)

ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പച്ചയാ നോചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസമുട്ഠാനേ ഖന്ധേ ച വത്ഥുഞ്ച പച്ചയാ ചിത്തം (പടിസന്ധിക്ഖണേ തീണിപി കാതബ്ബാ പടിച്ചവാരസദിസാ). (൨)

ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പച്ചയാ ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ഹേതുപച്ചയാ – ചിത്തസമുട്ഠാനം ഏകം ഖന്ധഞ്ച വത്ഥുഞ്ച പച്ചയാ ദ്വേ ഖന്ധാ ചിത്തഞ്ച, ദ്വേ ഖന്ധേ…പേ… (പടിസന്ധിക്ഖണേ ദ്വേപി കാതബ്ബാ പടിച്ചവാരസദിസാ). (൩)

ആരമ്മണപച്ചയോ

൨൦൩. ചിത്തസമുട്ഠാനം ധമ്മം പച്ചയാ ചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ… തീണി (പടിച്ചവാരസദിസാ).

നോചിത്തസമുട്ഠാനം ധമ്മം പച്ചയാ നോചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – ചക്ഖായതനം പച്ചയാ ചക്ഖുവിഞ്ഞാണം…പേ… കായായതനം പച്ചയാ കായവിഞ്ഞാണം…പേ… വത്ഥും പച്ചയാ ചിത്തം. (൧)

നോചിത്തസമുട്ഠാനം ധമ്മം പച്ചയാ ചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – ചക്ഖായതനം പച്ചയാ ചക്ഖുവിഞ്ഞാണസഹഗതാ ഖന്ധാ…പേ… കായായതനം പച്ചയാ കായവിഞ്ഞാണസഹഗതാ ഖന്ധാ, ചിത്തം പച്ചയാ സമ്പയുത്തകാ ഖന്ധാ, വത്ഥും പച്ചയാ ചിത്തസമുട്ഠാനാ ഖന്ധാ (പടിസന്ധിക്ഖണേ ദ്വേപി). (൨)

നോചിത്തസമുട്ഠാനം ധമ്മം പച്ചയാ ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ആരമ്മണപച്ചയാ – ചക്ഖായതനം പച്ചയാ ചക്ഖുവിഞ്ഞാണം സമ്പയുത്തകാ ച ഖന്ധാ…പേ… കായായതനം…പേ… വത്ഥും പച്ചയാ ചിത്തം സമ്പയുത്തകാ ച ഖന്ധാ; പടിസന്ധിക്ഖണേ…പേ…. (൩)

൨൦൪. ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പച്ചയാ ചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – ചിത്തസമുട്ഠാനം ഏകം ഖന്ധഞ്ച ചിത്തഞ്ച പച്ചയാ ദ്വേ ഖന്ധാ, ദ്വേ ഖന്ധേ …പേ… ചിത്തസമുട്ഠാനം ഏകം ഖന്ധഞ്ച വത്ഥുഞ്ച പച്ചയാ ദ്വേ ഖന്ധാ, ദ്വേ ഖന്ധേ…പേ… (പടിസന്ധിക്ഖണേ ദ്വേപി കാതബ്ബാ). (൧)

ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പച്ചയാ നോചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – ചക്ഖുവിഞ്ഞാണസഹഗതേ ഖന്ധേ ച ചക്ഖായതനഞ്ച പച്ചയാ ചക്ഖുവിഞ്ഞാണം…പേ… കായവിഞ്ഞാണസഹഗതേ…പേ… ചിത്തസമുട്ഠാനേ ഖന്ധേ ച വത്ഥുഞ്ച പച്ചയാ ചിത്തം; പടിസന്ധിക്ഖണേ…പേ…. (൨)

ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പച്ചയാ ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ആരമ്മണപച്ചയാ – ചക്ഖുവിഞ്ഞാണസഹഗതം ഏകം ഖന്ധഞ്ച ചക്ഖായതനഞ്ച പച്ചയാ ദ്വേ ഖന്ധാ ചക്ഖുവിഞ്ഞാണഞ്ച, ദ്വേ ഖന്ധേ…പേ… കായവിഞ്ഞാണസഹഗതം…പേ… ചിത്തസമുട്ഠാനം ഏകം ഖന്ധഞ്ച വത്ഥുഞ്ച പച്ചയാ ദ്വേ ഖന്ധാ ചിത്തഞ്ച, ദ്വേ ഖന്ധേ…പേ… പടിസന്ധിക്ഖണേ…പേ…. (൩) (സംഖിത്തം).