൧. വിഭങ്ഗവാരോ

ഹേതുപച്ചയോ

൧൮൬. ചിത്തസമുട്ഠാനം ധമ്മം പടിച്ച ചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസമുട്ഠാനം ഏകം ഖന്ധം പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ…പേ… പടിസന്ധിക്ഖണേ ചിത്തസമുട്ഠാനം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ…പേ… ഏകം മഹാഭൂതം…പേ… മഹാഭൂതേ പടിച്ച ചിത്തസമുട്ഠാനം രൂപം ഉപാദാരൂപം. (൧)

ചിത്തസമുട്ഠാനം ധമ്മം പടിച്ച നോചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസമുട്ഠാനേ ഖന്ധേ പടിച്ച ചിത്തം; പടിസന്ധിക്ഖണേ ചിത്തസമുട്ഠാനേ ഖന്ധേ പടിച്ച ചിത്തം കടത്താ ച രൂപം. (൨)

ചിത്തസമുട്ഠാനം ധമ്മം പടിച്ച ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ഹേതുപച്ചയാ – ചിത്തസമുട്ഠാനം ഏകം ഖന്ധം പടിച്ച ദ്വേ ഖന്ധാ ചിത്തഞ്ച ചിത്തസമുട്ഠാനഞ്ച രൂപം, ദ്വേ ഖന്ധേ…പേ… പടിസന്ധിക്ഖണേ ചിത്തസമുട്ഠാനം ഏകം ഖന്ധം പടിച്ച ദ്വേ ഖന്ധാ ചിത്തഞ്ച കടത്താ ച രൂപം, ദ്വേ ഖന്ധേ…പേ…. (൩)

൧൮൭. നോചിത്തസമുട്ഠാനം ധമ്മം പടിച്ച നോചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – പടിസന്ധിക്ഖണേ ചിത്തം പടിച്ച കടത്താരൂപം; ചിത്തം പടിച്ച വത്ഥു, വത്ഥും പടിച്ച ചിത്തം, ഏകം മഹാഭൂതം…പേ… മഹാഭൂതേ പടിച്ച കടത്താരൂപം ഉപാദാരൂപം. (൧)

നോചിത്തസമുട്ഠാനം ധമ്മം പടിച്ച ചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തം പടിച്ച സമ്പയുത്തകാ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ, പടിസന്ധിക്ഖണേ വത്ഥും പടിച്ച ചിത്തസമുട്ഠാനാ ഖന്ധാ. (൨)

നോചിത്തസമുട്ഠാനം ധമ്മം പടിച്ച ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ഹേതുപച്ചയാ – പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ കടത്താ ച രൂപം; പടിസന്ധിക്ഖണേ വത്ഥും പടിച്ച ചിത്തം സമ്പയുത്തകാ ച ഖന്ധാ. (൩)

൧൮൮. ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പടിച്ച ചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – ചിത്തസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം, ദ്വേ ഖന്ധേ ച…പേ… പടിസന്ധിക്ഖണേ ചിത്തസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ… പടിസന്ധിക്ഖണേ ചിത്തസമുട്ഠാനം ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ, ദ്വേ ഖന്ധേ ച…പേ…. (൧)

ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പടിച്ച നോചിത്തസമുട്ഠാനോ ധമ്മോ ഉപ്പജ്ജതി ഹേതുപച്ചയാ – പടിസന്ധിക്ഖണേ ചിത്തസമുട്ഠാനേ ഖന്ധേ ച ചിത്തഞ്ച പടിച്ച കടത്താരൂപം; പടിസന്ധിക്ഖണേ ചിത്തസമുട്ഠാനേ ഖന്ധേ ച മഹാഭൂതേ ച പടിച്ച കടത്താരൂപം, പടിസന്ധിക്ഖണേ ചിത്തസമുട്ഠാനേ ഖന്ധേ ച വത്ഥുഞ്ച പടിച്ച ചിത്തം. (൨)

ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പടിച്ച ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ഹേതുപച്ചയാ – പടിസന്ധിക്ഖണേ ചിത്തസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ കടത്താ ച രൂപം, ദ്വേ ഖന്ധേ ച…പേ… പടിസന്ധിക്ഖണേ ചിത്തസമുട്ഠാനം ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ ച…പേ…. (൩)

ആരമ്മണപച്ചയോ

൧൮൯. ചിത്തസമുട്ഠാനം ധമ്മം പടിച്ച ചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – ചിത്തസമുട്ഠാനം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ…പേ… പടിസന്ധിക്ഖണേ…പേ…. (൧)

ചിത്തസമുട്ഠാനം ധമ്മം പടിച്ച നോചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – ചിത്തസമുട്ഠാനേ ഖന്ധേ പടിച്ച ചിത്തം; പടിസന്ധിക്ഖണേ…പേ…. (൨)

ചിത്തസമുട്ഠാനം ധമ്മം പടിച്ച ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ആരമ്മണപച്ചയാ – ചിത്തസമുട്ഠാനം ഏകം ഖന്ധം പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ…പേ… പടിസന്ധിക്ഖണേ…പേ…. (൩)

൧൯൦. നോചിത്തസമുട്ഠാനം ധമ്മം പടിച്ച നോചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – പടിസന്ധിക്ഖണേ വത്ഥും പടിച്ച ചിത്തം. (൧)

നോചിത്തസമുട്ഠാനം ധമ്മം പടിച്ച ചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – ചിത്തം പടിച്ച സമ്പയുത്തകാ ഖന്ധാ; പടിസന്ധിക്ഖണേ ചിത്തം പടിച്ച സമ്പയുത്തകാ ഖന്ധാ; പടിസന്ധിക്ഖണേ വത്ഥും പടിച്ച ചിത്തസമുട്ഠാനാ ഖന്ധാ. (൨)

നോചിത്തസമുട്ഠാനം ധമ്മം പടിച്ച ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ആരമ്മണപച്ചയാ – പടിസന്ധിക്ഖണേ വത്ഥും പടിച്ച ചിത്തം സമ്പയുത്തകാ ച ഖന്ധാ. (൩)

൧൯൧. ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പടിച്ച ചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – ചിത്തസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ…പേ… പടിസന്ധിക്ഖണേ ചിത്തസമുട്ഠാനം ഏകം ഖന്ധഞ്ച ചിത്തഞ്ച പടിച്ച ദ്വേ ഖന്ധാ, ദ്വേ ഖന്ധേ…പേ… പടിസന്ധിക്ഖണേ ചിത്തസമുട്ഠാനം ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ, ദ്വേ ഖന്ധേ…പേ…. (൧)

ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പടിച്ച നോചിത്തസമുട്ഠാനോ ധമ്മോ ഉപ്പജ്ജതി ആരമ്മണപച്ചയാ – പടിസന്ധിക്ഖണേ ചിത്തസമുട്ഠാനേ ഖന്ധേ ച വത്ഥുഞ്ച പടിച്ച ചിത്തം. (൨)

ചിത്തസമുട്ഠാനഞ്ച നോചിത്തസമുട്ഠാനഞ്ച ധമ്മം പടിച്ച ചിത്തസമുട്ഠാനോ ച നോചിത്തസമുട്ഠാനോ ച ധമ്മാ ഉപ്പജ്ജന്തി ആരമ്മണപച്ചയാ – പടിസന്ധിക്ഖണേ ചിത്തസമുട്ഠാനം ഏകം ഖന്ധഞ്ച വത്ഥുഞ്ച പടിച്ച ദ്വേ ഖന്ധാ ചിത്തഞ്ച, ദ്വേ ഖന്ധേ…പേ…. (൩)