൧. വിഭങ്ഗവാരോ

നഹേതുപച്ചയോ

൧൫൮. ചിത്തസമ്പയുത്തം ധമ്മം പച്ചയാ ചിത്തസമ്പയുത്തോ ധമ്മോ ഉപ്പജ്ജതി നഹേതുപച്ചയാ… തീണി (പടിച്ചസദിസാ).

ചിത്തവിപ്പയുത്തം ധമ്മം പച്ചയാ ചിത്തവിപ്പയുത്തോ ധമ്മോ ഉപ്പജ്ജതി നഹേതുപച്ചയാ – ഏകം മഹാഭൂതം…പേ… (യാവ അസഞ്ഞസത്താ). (൧)

ചിത്തവിപ്പയുത്തം ധമ്മം പച്ചയാ ചിത്തസമ്പയുത്തോ ധമ്മോ ഉപ്പജ്ജതി നഹേതുപച്ചയാ – ചക്ഖായതനം പച്ചയാ ചക്ഖുവിഞ്ഞാണസഹഗതാ ഖന്ധാ…പേ… കായായതനം…പേ… വത്ഥും പച്ചയാ അഹേതുകാ ചിത്തസമ്പയുത്തകാ ഖന്ധാ; പടിസന്ധിക്ഖണേ…പേ… വത്ഥും പച്ചയാ വിചികിച്ഛാസഹഗതോ ഉദ്ധച്ചസഹഗതോ മോഹോ. (൨)

ചിത്തവിപ്പയുത്തം ധമ്മം പച്ചയാ ചിത്തസമ്പയുത്തോ ച ചിത്തവിപ്പയുത്തോ ച ധമ്മാ ഉപ്പജ്ജന്തി നഹേതുപച്ചയാ – വത്ഥും പച്ചയാ അഹേതുകാ ചിത്തസമ്പയുത്തകാ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം; പടിസന്ധിക്ഖണേ…പേ…. (൩)

ചിത്തസമ്പയുത്തഞ്ച ചിത്തവിപ്പയുത്തഞ്ച ധമ്മം പച്ചയാ ചിത്തസമ്പയുത്തോ ധമ്മോ ഉപ്പജ്ജതി നഹേതുപച്ചയാ – ചക്ഖുവിഞ്ഞാണസഹഗതം ഏകം ഖന്ധഞ്ച ചക്ഖായതനഞ്ച പച്ചയാ ദ്വേ ഖന്ധാ, ദ്വേ ഖന്ധേ ച…പേ… കായവിഞ്ഞാണസഹഗതം ഏകം ഖന്ധഞ്ച കായായതനഞ്ച പച്ചയാ ദ്വേ ഖന്ധാ, ദ്വേ ഖന്ധേ ച…പേ… അഹേതുകം ചിത്തസമ്പയുത്തം ഏകം ഖന്ധഞ്ച വത്ഥുഞ്ച പച്ചയാ ദ്വേ ഖന്ധാ, ദ്വേ ഖന്ധേ ച…പേ… അഹേതുകപടിസന്ധിക്ഖണേ…പേ… വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച വത്ഥുഞ്ച പച്ചയാ വിചികിച്ഛാസഹഗതോ ഉദ്ധച്ചസഹഗതോ മോഹോ. (ഏവം ദ്വേ പഞ്ഹാ പവത്തിപടിസന്ധി കാതബ്ബാ. സംഖിത്തം.)