൧. വിഭങ്ഗവാരോ

ഹേതുപച്ചയോ

൧൧൯. ചേതസികോ ധമ്മോ ചേതസികസ്സ ധമ്മസ്സ ഹേതുപച്ചയേന പച്ചയോ – ചേതസികാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൧)

ചേതസികോ ധമ്മോ അചേതസികസ്സ ധമ്മസ്സ ഹേതുപച്ചയേന പച്ചയോ – ചേതസികാ ഹേതൂ ചിത്തസ്സ ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൨)

ചേതസികോ ധമ്മോ ചേതസികസ്സ ച അചേതസികസ്സ ച ധമ്മസ്സ ഹേതുപച്ചയേന പച്ചയോ – ചേതസികാ ഹേതൂ സമ്പയുത്തകാനം ഖന്ധാനം ചിത്തസ്സ ച ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൩)

ആരമ്മണപച്ചയോ

൧൨൦. ചേതസികോ ധമ്മോ ചേതസികസ്സ ധമ്മസ്സ ആരമ്മണപച്ചയേന പച്ചയോ – ചേതസികേ ഖന്ധേ ആരബ്ഭ ചേതസികാ ഖന്ധാ ഉപ്പജന്തി. (മൂലം പുച്ഛിതബ്ബം) ചേതസികേ ഖന്ധേ ആരബ്ഭ ചിത്തം ഉപ്പജ്ജതി. (മൂലം പുച്ഛിതബ്ബം) ചേതസികേ ഖന്ധേ ആരബ്ഭ ചേതസികാ ഖന്ധാ ച ചിത്തഞ്ച ഉപ്പജ്ജന്തി. (൩)

൧൨൧. അചേതസികോ ധമ്മോ അചേതസികസ്സ ധമ്മസ്സ ആരമ്മണപച്ചയേന പച്ചയോ – അരിയാ മഗ്ഗാ വുട്ഠഹിത്വാ…പേ… ഫലം പച്ചവേക്ഖന്തി, നിബ്ബാനം പച്ചവേക്ഖന്തി. നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ, ഫലസ്സ, ആവജ്ജനായ ആരമ്മണപച്ചയേന പച്ചയോ; ചക്ഖും…പേ… വത്ഥും അചേതസികേ ഖന്ധേ അനിച്ചതോ…പേ… വിപസ്സതി അസ്സാദേതി അഭിനന്ദതി, തം ആരബ്ഭ ചിത്തം ഉപ്പജ്ജതി. ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. ചേതോപരിയഞാണേന അചേതസികചിത്തസമങ്ഗിസ്സ ചിത്തം ജാനാതി, ആകാസാനഞ്ചായതനം…പേ… ആകിഞ്ചഞ്ഞായതനം…പേ… രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ…പേ… അചേതസികാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

അചേതസികോ ധമ്മോ ചേതസികസ്സ ധമ്മസ്സ ആരമ്മണപച്ചയേന പച്ചയോ – അരിയാ മഗ്ഗാ വുട്ഠഹിത്വാ…പേ… നിബ്ബാനം പച്ചവേക്ഖന്തി (പഠമഗമനസദിസം); ചക്ഖും…പേ… വത്ഥും അചേതസികേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി; ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. ചേതോപരിയഞാണേന അചേതസികചിത്തസമങ്ഗിസ്സ ചിത്തം ജാനാതി, ആകാസാനഞ്ചായതനം…പേ… ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ…പേ… രൂപായതനം ചക്ഖുവിഞ്ഞാണസഹഗതാനം ഖന്ധാനം…പേ… ഫോട്ഠബ്ബായതനം കായവിഞ്ഞാണസഹഗതാനം ഖന്ധാനം…പേ… അചേതസികാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

അചേതസികോ ധമ്മോ ചേതസികസ്സ ച അചേതസികസ്സ ച ധമ്മസ്സ ആരമ്മണപച്ചയേന പച്ചയോ – അരിയാ മഗ്ഗാ വുട്ഠഹിത്വാ…പേ… നിബ്ബാനം പച്ചവേക്ഖന്തി (പഠമഗമനസദിസം); ചക്ഖും…പേ… വത്ഥും അചേതസികേ ഖന്ധേ അനിച്ചതോ…പേ… വിപസ്സതി അസ്സാദേതി അഭിനന്ദതി, തം ആരബ്ഭ ചിത്തഞ്ച സമ്പയുത്തകാ ച ഖന്ധാ ഉപ്പജ്ജന്തി. ദിബ്ബേന ചക്ഖുനാ രൂപം പസ്സതി…പേ… രൂപായതനം ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം ആരമ്മണപച്ചയേന പച്ചയോ…പേ… ഫോട്ഠബ്ബായതനം കായവിഞ്ഞാണസ്സ സമ്പയുത്തകാനഞ്ച ഖന്ധാനം…പേ… അചേതസികാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൩)

൧൨൨. ചേതസികോ ച അചേതസികോ ച ധമ്മാ ചേതസികസ്സ ധമ്മസ്സ ആരമ്മണപച്ചയേന പച്ചയോ – ചേതസികേ ഖന്ധേ ച ചിത്തഞ്ച ആരബ്ഭ ചേതസികാ ഖന്ധാ ഉപ്പജ്ജന്തി. (മൂലം പുച്ഛിതബ്ബം) ചേതസികേ ഖന്ധേ ച ചിത്തഞ്ച ആരബ്ഭ ചിത്തം ഉപ്പജ്ജതി. (മൂലം പുച്ഛിതബ്ബം) ചേതസികേ ഖന്ധേ ച ചിത്തഞ്ച ആരബ്ഭ ചേതസികാ ഖന്ധാ ച ചിത്തഞ്ച ഉപ്പജ്ജന്തി. (൩)

അധിപതിപച്ചയോ

൧൨൩. ചേതസികോ ധമ്മോ ചേതസികസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ചേതസികേ ഖന്ധേ ഗരും കത്വാ ചേതസികാ ഖന്ധാ ഉപ്പജ്ജന്തി. സഹജാതാധിപതി – ചേതസികാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (മൂലം പുച്ഛിതബ്ബം) ആരമ്മണാധിപതി – ചേതസികേ ഖന്ധേ ഗരും കത്വാ ചിത്തം ഉപ്പജ്ജതി. സഹജാതാധിപതി – ചേതസികാധിപതി ചിത്തസ്സ ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (മൂലം പുച്ഛിതബ്ബം ) ആരമ്മണാധിപതി – ചേതസികേ ഖന്ധേ ഗരും കത്വാ ചേതസികാ ഖന്ധാ ച ചിത്തഞ്ച ഉപ്പജ്ജന്തി. സഹജാതാധിപതി – ചേതസികാധിപതി സമ്പയുത്തകാനം ഖന്ധാനം ചിത്തസ്സ ച ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൩)

൧൨൪. അചേതസികോ ധമ്മോ അചേതസികസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – അരിയാ മഗ്ഗാ വുട്ഠഹിത്വാ…പേ… നിബ്ബാനം ഗരും കത്വാ പച്ചവേക്ഖന്തി, നിബ്ബാനം ഗോത്രഭുസ്സ, വോദാനസ്സ. മഗ്ഗസ്സ, ഫലസ്സ അധിപതിപച്ചയേന പച്ചയോ; ചക്ഖും …പേ… വത്ഥും അചേതസികേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ ചിത്തം ഉപ്പജ്ജതി. സഹജാതാധിപതി – അചേതസികാധിപതി ചിത്തസമുട്ഠാനാനം രൂപാനം അധിപതിപച്ചയേന പച്ചയോ. (൧)

അചേതസികോ ധമ്മോ ചേതസികസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – അരിയാ മഗ്ഗാ വുട്ഠഹിത്വാ…പേ… നിബ്ബാനം ഗരും കത്വാ…പേ… (പഠമഗമനസദിസം); ചക്ഖും…പേ… വത്ഥും അചേതസികേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – അചേതസികാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൨)

അചേതസികോ ധമ്മോ ചേതസികസ്സ ച അചേതസികസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – അരിയാ മഗ്ഗാ വുട്ഠഹിത്വാ…പേ… നിബ്ബാനം…പേ… (പഠമഗമനം) അചേതസികേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ ചേതസികാ ഖന്ധാ ച ചിത്തഞ്ച ഉപ്പജ്ജന്തി. സഹജാതാധിപതി – അചേതസികാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൩)

ചേതസികോ ച അചേതസികോ ച ധമ്മാ ചേതസികസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി… തീണി (ആരമ്മണാധിപതിയേവ).

അനന്തരപച്ചയാദി

൧൨൫. ചേതസികോ ധമ്മോ ചേതസികസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ ചേതസികാ ഖന്ധാ പച്ഛിമാനം പച്ഛിമാനം ചേതസികാനം ഖന്ധാനം അനന്തരപച്ചയേന പച്ചയോ. (മൂലം പുച്ഛിതബ്ബം) പുരിമാ പുരിമാ ചേതസികാ ഖന്ധാ പച്ഛിമസ്സ പച്ഛിമസ്സ ചിത്തസ്സ അനന്തരപച്ചയേന പച്ചയോ. (മൂലം പുച്ഛിതബ്ബം) പുരിമാ പുരിമാ ചേതസികാ ഖന്ധാ പച്ഛിമാനം പച്ഛിമാനം ചേതസികാനം ഖന്ധാനം ചിത്തസ്സ ച അനന്തരപച്ചയേന പച്ചയോ. (൩)

൧൨൬. അചേതസികോ ധമ്മോ അചേതസികസ്സ ധമ്മസ്സ അനന്തരപച്ചയേന പച്ചയോ – പുരിമം പുരിമം ചിത്തം പച്ഛിമസ്സ പച്ഛിമസ്സ ചിത്തസ്സ അനന്തരപച്ചയേന പച്ചയോ; അനുലോമം ഗോത്രഭുസ്സ…പേ… ഫലസമാപത്തിയാ അനന്തരപച്ചയേന പച്ചയോ. (൧)

അചേതസികോ ധമ്മോ ചേതസികസ്സ ധമ്മസ്സ അനന്തരപച്ചയേന പച്ചയോ (ഏവം തീണി കാതബ്ബാനി, പഠമഗമനസദിസം. പൂരിത്വാ കാതബ്ബം, നിന്നാനാകരണം).

ചേതസികോ ച അചേതസികോ ച ധമ്മാ ചേതസികസ്സ ധമ്മസ്സ അനന്തരപച്ചയേന പച്ചയോ… തീണി (ആവജ്ജനാപി വുട്ഠാനമ്പി നത്ഥി).

സമനന്തരപച്ചയേന പച്ചയോ… നവ, സഹജാതപച്ചയേന പച്ചയോ… നവ (പടിച്ചവാരസദിസം), അഞ്ഞമഞ്ഞപച്ചയേന പച്ചയോ… നവ (പടിച്ചവാരസദിസം), നിസ്സയപച്ചയേന പച്ചയോ… നവ (പച്ചയവാരസദിസം).

ഉപനിസ്സയപച്ചയോ

൧൨൭. ചേതസികോ ധമ്മോ ചേതസികസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ചേതസികാ ഖന്ധാ ചേതസികാനം ഖന്ധാനം ഉപനിസ്സയപച്ചയേന പച്ചയോ. (മൂലം പുച്ഛിതബ്ബം, തീണി ഉപനിസ്സയാ) ചേതസികാ ഖന്ധാ ചിത്തസ്സ ഉപനിസ്സയപച്ചയേന പച്ചയോ. (മൂലം പുച്ഛിതബ്ബം, തീണി ഉപനിസ്സയാ) ചേതസികാ ഖന്ധാ ചേതസികാനം ഖന്ധാനം ചിത്തസ്സ ച ഉപനിസ്സയപച്ചയേന പച്ചയോ. (൩)

൧൨൮. അചേതസികോ ധമ്മോ അചേതസികസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഉതും… ഭോജനം… സേനാസനം ചിത്തം ഉപനിസ്സായ ദാനം ദേതി…പേ… സങ്ഘം ഭിന്ദതി; ഉതും… ഭോജനം… സേനാസനം ചിത്തം സദ്ധായ…പേ… പഞ്ഞായ… രാഗസ്സ…പേ… പത്ഥനായ കായികസ്സ സുഖസ്സ, കായികസ്സ ദുക്ഖസ്സ, മഗ്ഗസ്സ, ഫലസമാപത്തിയാ ഉപനിസ്സയപച്ചയേന പച്ചയോ. (൧)

അചേതസികോ ധമ്മോ ചേതസികസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ പകതൂപനിസ്സയോ…പേ…. പകതൂപനിസ്സയോ – ഉതും… ഭോജനം… സേനാസനം ചിത്തം ഉപനിസ്സായ ദാനം ദേതി…പേ… (തീണി, പഠമഗമനസദിസം നിന്നാനാകരണം).

ചേതസികോ ച അചേതസികോ ച ധമ്മാ ചേതസികസ്സ ധമ്മസ്സ ഉപനിസ്സയപച്ചയേന പച്ചയോ… തീണി.

പുരേജാതപച്ചയോ

൧൨൯. അചേതസികോ ധമ്മോ അചേതസികസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… വത്ഥും അനിച്ചതോ…പേ… വിപസ്സതി അസ്സാദേതി അഭിനന്ദതി, തം ആരബ്ഭ ചിത്തം ഉപ്പജ്ജതി. ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ…പേ…. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ…പേ… കായായതനം കായവിഞ്ഞാണസ്സ…പേ… വത്ഥു ചിത്തസ്സ പുരേജാതപച്ചയേന പച്ചയോ. (൧)

അചേതസികോ ധമ്മോ ചേതസികസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… വത്ഥും അനിച്ചതോ…പേ… ദോമനസ്സം ഉപ്പജ്ജതി; ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. രൂപായതനം ചക്ഖുവിഞ്ഞാണസഹഗതാനം ഖന്ധാനം…പേ… ഫോട്ഠബ്ബായതനം കായവിഞ്ഞാണസഹഗതാനം ഖന്ധാനം…പേ…. വത്ഥുപുരേജാതം – ചക്ഖായതനം ചക്ഖുവിഞ്ഞാണസഹഗതാനം ഖന്ധാനം…പേ… കായായതനം…പേ… വത്ഥു ചേതസികാനം ഖന്ധാനം പുരേജാതപച്ചയേന പച്ചയോ. (൨)

അചേതസികോ ധമ്മോ ചേതസികസ്സ ച അചേതസികസ്സ ച ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… വത്ഥും അനിച്ചതോ…പേ… വിപസ്സതി അസ്സാദേതി അഭിനന്ദതി, തം ആരബ്ഭ ചിത്തഞ്ച സമ്പയുത്തകാ ച ഖന്ധാ ഉപ്പജ്ജന്തി. ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. രൂപായതനം ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം…പേ… ഫോട്ഠബ്ബായതനം…പേ…. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം…പേ… കായായതനം…പേ… വത്ഥു ചിത്തസ്സ സമ്പയുത്തകാനഞ്ച ഖന്ധാനം പുരേജാതപച്ചയേന പച്ചയോ. (൩)

പച്ഛാജാതാസേവനപച്ചയാ

൧൩൦. ചേതസികോ ധമ്മോ അചേതസികസ്സ ധമ്മസ്സ പച്ഛാജാതപച്ചയേന പച്ചയോ (സംഖിത്തം).

അചേതസികോ ധമ്മോ അചേതസികസ്സ ധമ്മസ്സ പച്ഛാജാതപച്ചയേന പച്ചയോ (സംഖിത്തം).

ചേതസികോ ച അചേതസികോ ച ധമ്മാ അചേതസികസ്സ ധമ്മസ്സ പച്ഛാജാതപച്ചയേന പച്ചയോ (സംഖിത്തം).

ചേതസികോ ധമ്മോ ചേതസികസ്സ ധമ്മസ്സ ആസേവനപച്ചയേന പച്ചയോ (സംഖിത്തം).

കമ്മപച്ചയോ

൧൩൧. ചേതസികോ ധമ്മോ ചേതസികസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ചേതസികാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ചേതസികാ ചേതനാ വിപാകാനം ഖന്ധാനം കമ്മപച്ചയേന പച്ചയോ. (൧)

ചേതസികോ ധമ്മോ അചേതസികസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ചേതസികാ ചേതനാ ചിത്തസ്സ ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ചേതസികാ ചേതനാ വിപാകസ്സ ചിത്തസ്സ കടത്താ ച രൂപാനം കമ്മപച്ചയേന പച്ചയോ. (൨)

ചേതസികോ ധമ്മോ ചേതസികസ്സ ച അചേതസികസ്സ ച ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ചേതസികാ ചേതനാ സമ്പയുത്തകാനം ഖന്ധാനം ചിത്തസ്സ ച ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – ചേതസികാ ചേതനാ വിപാകാനം ഖന്ധാനം ചിത്തസ്സ കടത്താ ച രൂപാനം കമ്മപച്ചയേന പച്ചയോ. (൩)

വിപാകപച്ചയാദി

൧൩൨. ചേതസികോ ധമ്മോ ചേതസികസ്സ ധമ്മസ്സ വിപാകപച്ചയേന പച്ചയോ… നവ… ആഹാരപച്ചയേന പച്ചയോ… നവ… ഇന്ദ്രിയപച്ചയേന പച്ചയോ… നവ… ഝാനപച്ചയേന പച്ചയോ… തീണി… മഗ്ഗപച്ചയേന പച്ചയോ… തീണി… സമ്പയുത്തപച്ചയേന പച്ചയോ… പഞ്ച.

വിപ്പയുത്തപച്ചയോ

൧൩൩. ചേതസികോ ധമ്മോ അചേതസികസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം (സംഖിത്തം). (൧)

അചേതസികോ ധമ്മോ അചേതസികസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതം – ചിത്തം ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ ചിത്തം കടത്താരൂപാനം വിപ്പയുത്തപച്ചയേന പച്ചയോ; ചിത്തം വത്ഥുസ്സ വിപ്പയുത്തപച്ചയേന പച്ചയോ; വത്ഥു ചിത്തസ്സ വിപ്പയുത്തപച്ചയേന പച്ചയോ. പുരേജാതം – ചക്ഖായതനം ചക്ഖുവിഞ്ഞാണസ്സ വിപ്പയുത്തപച്ചയേന പച്ചയോ…പേ… കായായതനം കായവിഞ്ഞാണസ്സ…പേ… വത്ഥു ചിത്തസ്സ വിപ്പയുത്തപച്ചയേന പച്ചയോ. പച്ഛാജാതം – ചിത്തം പുരേജാതസ്സ ഇമസ്സ കായസ്സ വിപ്പയുത്തപച്ചയേന പച്ചയോ. (൧)

അചേതസികോ ധമ്മോ ചേതസികസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം. സഹജാതം – പടിസന്ധിക്ഖണേ വത്ഥു ചേതസികാനം ഖന്ധാനം വിപ്പയുത്തപച്ചയേന പച്ചയോ. പുരേജാതം – ചക്ഖായതനം ചക്ഖുവിഞ്ഞാണസഹഗതാനം ഖന്ധാനം…പേ… കായായതനം കായവിഞ്ഞാണസഹഗതാനം ഖന്ധാനം…പേ… വത്ഥു ചേതസികാനം ഖന്ധാനം വിപ്പയുത്തപച്ചയേന പച്ചയോ. (൨)

അചേതസികോ ധമ്മോ ചേതസികസ്സ ച അചേതസികസ്സ ച ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം. സഹജാതം – പടിസന്ധിക്ഖണേ വത്ഥു ചേതസികാനം ഖന്ധാനം ചിത്തസ്സ ച വിപ്പയുത്തപച്ചയേന പച്ചയോ. പുരേജാതം – ചക്ഖായതനം ചക്ഖുവിഞ്ഞാണസ്സ സമ്പയുത്തകാനഞ്ച ഖന്ധാനം…പേ… കായായതനം കായവിഞ്ഞാണസ്സ സമ്പയുത്തകാനഞ്ച ഖന്ധാനം…പേ… വത്ഥു ചിത്തസ്സ സമ്പയുത്തകാനഞ്ച ഖന്ധാനം വിപ്പയുത്തപച്ചയേന പച്ചയോ. (൩)

ചേതസികോ ച അചേതസികോ ച ധമ്മാ അചേതസികസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം (സംഖിത്തം).

അത്ഥിപച്ചയോ

൧൩൪. ചേതസികോ ധമ്മോ ചേതസികസ്സ ധമ്മസ്സ അത്ഥിപച്ചയേന പച്ചയോ… ഏകം (പടിച്ചവാരസദിസം).

ചേതസികോ ധമ്മോ അചേതസികസ്സ ധമ്മസ്സ അത്ഥിപച്ചയേന പച്ചയോ – സഹജാതം, പച്ഛാജാതം (സംഖിത്തം). (൨)

ചേതസികോ ധമ്മോ ചേതസികസ്സ ച അചേതസികസ്സ ച ധമ്മസ്സ അത്ഥിപച്ചയേന പച്ചയോ… ഏകം (പടിച്ചവാരസദിസം). (൩)

൧൩൫. അചേതസികോ ധമ്മോ അചേതസികസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സംഖിത്തം). (൧)

അചേതസികോ ധമ്മോ ചേതസികസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതം – ചിത്തം ചേതസികാനം ഖന്ധാനം അത്ഥിപച്ചയേന പച്ചയോ; പടിസന്ധിക്ഖണേ ചിത്തം…പേ… പടിസന്ധിക്ഖണേ വത്ഥു ചേതസികാനം ഖന്ധാനം അത്ഥിപച്ചയേന പച്ചയോ. പുരേജാതം – ചക്ഖും…പേ… വത്ഥും അനിച്ചതോ…പേ… (പുരേജാതസദിസം നിന്നാനാകരണം). (൨)

അചേതസികോ ധമ്മോ ചേതസികസ്സ ച അചേതസികസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതം – ചിത്തം സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അത്ഥിപച്ചയേന പച്ചയോ; പടിസന്ധിക്ഖണേ ചിത്തം…പേ… പടിസന്ധിക്ഖണേ വത്ഥു ചേതസികാനം ഖന്ധാനം ചിത്തസ്സ ച അത്ഥിപച്ചയേന പച്ചയോ. പുരേജാതം – ചക്ഖും…പേ… വത്ഥും അനിച്ചതോ…പേ… (പുരേജാതസദിസം നിന്നാനം). (൩)

൧൩൬. ചേതസികോ ച അചേതസികോ ച ധമ്മാ ചേതസികസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതോ – ചക്ഖുവിഞ്ഞാണസഹഗതോ ഏകോ ഖന്ധോ ച ചക്ഖായതനഞ്ച ദ്വിന്നം ഖന്ധാനം…പേ… കായവിഞ്ഞാണസഹഗതോ…പേ… ചേതസികോ ഏകോ ഖന്ധോ ച വത്ഥു ച ദ്വിന്നം ഖന്ധാനം അത്ഥിപച്ചയേന പച്ചയോ; ദ്വേ ഖന്ധാ ച…പേ…. സഹജാതോ – ചേതസികോ ഏകോ ഖന്ധോ ച ചിത്തഞ്ച ദ്വിന്നം ഖന്ധാനം അത്ഥിപച്ചയേന പച്ചയോ; ദ്വേ ഖന്ധാ ച…പേ… (പടിസന്ധിക്ഖണേ) ദ്വേപി കാതബ്ബാ. (൧)

ചേതസികോ ച അചേതസികോ ച ധമ്മാ അചേതസികസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം. സഹജാതാ – ചക്ഖുവിഞ്ഞാണസഹഗതാ ഖന്ധാ ച ചക്ഖായതനഞ്ച ചക്ഖുവിഞ്ഞാണസ്സ…പേ… കായവിഞ്ഞാണസ്സ…പേ… ചേതസികാ ഖന്ധാ ച ചിത്തഞ്ച ചിത്തസമുട്ഠാനാനം രൂപാനം അത്ഥിപച്ചയേന പച്ചയോ; ചേതസികാ ഖന്ധാ ച ചിത്തഞ്ച മഹാഭൂതാ ച ചിത്തസമുട്ഠാനാനം രൂപാനം അത്ഥിപച്ചയേന പച്ചയോ. സഹജാതാ – ചേതസികാ ഖന്ധാ ച വത്ഥു ച ചിത്തസ്സ അത്ഥിപച്ചയേന പച്ചയോ (പടിസന്ധിക്ഖണേ തീണിപി കാതബ്ബാ). പച്ഛാജാതാ – ചേതസികാ ഖന്ധാ ച ചിത്തഞ്ച പുരേജാതസ്സ ഇമസ്സ കായസ്സ അത്ഥിപച്ചയേന പച്ചയോ. പച്ഛാജാതാ – ചേതസികാ ഖന്ധാ ച ചിത്തഞ്ച കബളീകാരോ ആഹാരോ ച ഇമസ്സ കായസ്സ അത്ഥിപച്ചയേന പച്ചയോ. പച്ഛാജാതാ – ചേതസികാ ഖന്ധാ ച ചിത്തഞ്ച രൂപജീവിതിന്ദ്രിയഞ്ച കടത്താരൂപാനം അത്ഥിപച്ചയേന പച്ചയോ. (൨)

ചേതസികോ ച അചേതസികോ ച ധമ്മാ ചേതസികസ്സ ച അചേതസികസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതോ – ചക്ഖുവിഞ്ഞാണസഹഗതോ ഏകോ ഖന്ധോ ച ചക്ഖായതനഞ്ച ദ്വിന്നം ഖന്ധാനം ചക്ഖുവിഞ്ഞാണസ്സ ച അത്ഥിപച്ചയേന പച്ചയോ…പേ… കായവിഞ്ഞാണസഹഗതോ ഏകോ ഖന്ധോ ച കായായതനഞ്ച ദ്വിന്നം ഖന്ധാനം കായവിഞ്ഞാണസ്സ ച അത്ഥിപച്ചയേന പച്ചയോ; ദ്വേ ഖന്ധാ ച…പേ…. സഹജാതോ – ചേതസികോ ഏകോ ഖന്ധോ ച വത്ഥു ച ദ്വിന്നം ഖന്ധാനം ചിത്തസ്സ ച അത്ഥിപച്ചയേന പച്ചയോ; ദ്വേ ഖന്ധാ ച…പേ… (പടിസന്ധിയാ ദ്വേ കാതബ്ബാ). (൩)