൧. വിഭങ്ഗവാരോ

നഹേതുപച്ചയോ

൨൪. വിപാകം ധമ്മം പടിച്ച വിപാകോ ധമ്മോ ഉപ്പജ്ജതി നഹേതുപച്ചയാ – അഹേതുകം വിപാകം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ; അഹേതുകപടിസന്ധിക്ഖണേ വിപാകം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. (൧)

വിപാകം ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നഹേതുപച്ചയാ – അഹേതുകേ വിപാകേ ഖന്ധേ പടിച്ച ചിത്തസമുട്ഠാനം രൂപം; അഹേതുകപടിസന്ധിക്ഖണേ വിപാകേ ഖന്ധേ പടിച്ച കടത്താരൂപം, ഖന്ധേ പടിച്ച വത്ഥു. (൨)

വിപാകം ധമ്മം പടിച്ച വിപാകോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകം വിപാകം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം; അഹേതുകപടിസന്ധിക്ഖണേ വിപാകം ഏകം ഖന്ധം പടിച്ച തയോ ഖന്ധാ കടത്താ ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ കടത്താ ച രൂപം. (൩)

൨൫. വിപാകധമ്മധമ്മം പടിച്ച വിപാകധമ്മധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നഹേതുപച്ചയാ – അഹേതുകം നേവവിപാകനവിപാകധമ്മധമ്മം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം, ഏകം മഹാഭൂതം പടിച്ച തയോ മഹാഭൂതാ…പേ… ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച കടത്താരൂപം ഉപാദാരൂപം. (൧)

നേവവിപാകനവിപാകധമ്മധമ്മം പടിച്ച വിപാകോ ധമ്മോ ഉപ്പജ്ജതി നഹേതുപച്ചയാ – അഹേതുകപടിസന്ധിക്ഖണേ വത്ഥും പടിച്ച വിപാകാ ഖന്ധാ. (൨)

നേവവിപാകനവിപാകധമ്മധമ്മം പടിച്ച വിപാകോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകപടിസന്ധിക്ഖണേ വത്ഥും പടിച്ച വിപാകാ ഖന്ധാ, മഹാഭൂതേ പടിച്ച കടത്താരൂപം. (൩)

൨൬. വിപാകഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച വിപാകോ ധമ്മോ ഉപ്പജ്ജതി നഹേതുപച്ചയാ – അഹേതുകപടിസന്ധിക്ഖണേ വിപാകം ഏകം ഖന്ധഞ്ച വത്ഥുഞ്ച പടിച്ച തയോ ഖന്ധാ…പേ… ദ്വേ ഖന്ധേ ച വത്ഥുഞ്ച പടിച്ച ദ്വേ ഖന്ധാ. (൧)

വിപാകഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നഹേതുപച്ചയാ – അഹേതുകേ വിപാകേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം; അഹേതുകപടിസന്ധിക്ഖണേ വിപാകേ ഖന്ധേ ച മഹാഭൂതേ ച പടിച്ച കടത്താരൂപം. (൨)

വിപാകഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച വിപാകോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകപടിസന്ധിക്ഖണേ വിപാകം ഏകം ഖന്ധഞ്ച വത്ഥുഞ്ച പടിച്ച തയോ ഖന്ധാ…പേ… ദ്വേ ഖന്ധേ ച വത്ഥുഞ്ച പടിച്ച ദ്വേ ഖന്ധാ, വിപാകേ ഖന്ധേ ച മഹാഭൂതേ ച പടിച്ച കടത്താരൂപം. (൩)

നആരമ്മണപച്ചയോ

൨൭. വിപാകം ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നആരമ്മണപച്ചയാ – വിപാകേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ വിപാകേ ഖന്ധേ പടിച്ച കടത്താരൂപം, ഖന്ധേ പടിച്ച വത്ഥു. (൧)

൨൮. വിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നആരമ്മണപച്ചയാ – വിപാകധമ്മധമ്മേ ഖന്ധേ പടിച്ച ചിത്തസമുട്ഠാനം രൂപം. (൧)

൨൯. നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നആരമ്മണപച്ചയാ – നേവവിപാകനവിപാകധമ്മധമ്മേ ഖന്ധേ പടിച്ച ചിത്തസമുട്ഠാനം രൂപം, ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച തയോ മഹാഭൂതാ… മഹാഭൂതേ പടിച്ച കടത്താരൂപം ഉപാദാരൂപം. (൧)

൩൦. വിപാകഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നആരമ്മണപച്ചയാ – വിപാകേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം; പടിസന്ധിക്ഖണേ വിപാകേ ഖന്ധേ ച മഹാഭൂതേ ച പടിച്ച കടത്താരൂപം. (൧)

൩൧. വിപാകധമ്മധമ്മഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നആരമ്മണപച്ചയാ – വിപാകധമ്മധമ്മേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

നഅധിപതിപച്ചയോ

൩൨. വിപാകം ധമ്മം പടിച്ച വിപാകോ ധമ്മോ ഉപ്പജ്ജതി നഅധിപതിപച്ചയാ. (സംഖിത്തം. യഥാ അനുലോമം സഹജാതസദിസം.)

നഅനന്തരപച്ചയാദി

൩൩. വിപാകം ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നഅനന്തരപച്ചയാ … നസമനന്തരപച്ചയാ… നഅഞ്ഞമഞ്ഞപച്ചയാ…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം; ബാഹിരം… ആഹാരസമുട്ഠാനം… ഉതുസമുട്ഠാനം, അസഞ്ഞസത്താനം മഹാഭൂതേ പടിച്ച കടത്താരൂപം ഉപാദാരൂപം (ഇദം നാനത്തം) നഅഞ്ഞമഞ്ഞപച്ചയാ… നഉപനിസ്സയപച്ചയാ… (സംഖിത്തം).

നപുരേജാതപച്ചയോ

൩൪. വിപാകം ധമ്മം പടിച്ച വിപാകോ ധമ്മോ ഉപ്പജ്ജതി നപുരേജാതപച്ചയാ – അരൂപേ വിപാകം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ; പടിസന്ധിക്ഖണേ വിപാകം ഏകം ഖന്ധം (സംഖിത്തം). (൧)

വിപാകം ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നപുരേജാതപച്ചയാ – വിപാകേ ഖന്ധേ പടിച്ച ചിത്തസമുട്ഠാനം രൂപം, പടിസന്ധിക്ഖണേ (സംഖിത്തം). (൨)

വിപാകം ധമ്മം പടിച്ച വിപാകോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നപുരേജാതപച്ചയാ – പടിസന്ധിക്ഖണേ വിപാകം ഏകം ഖന്ധം പടിച്ച തയോ ഖന്ധാ കടത്താ ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ കടത്താ ച രൂപം. (൩)

വിപാകധമ്മധമ്മം പടിച്ച വിപാകധമ്മധമ്മോ ഉപ്പജ്ജതി നപുരേജാതപച്ചയാ – അരൂപേ വിപാകധമ്മധമ്മം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൧)

വിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നപുരേജാതപച്ചയാ – വിപാകധമ്മധമ്മേ ഖന്ധേ പടിച്ച ചിത്തസമുട്ഠാനം രൂപം. (൨)

൩൫. നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നപുരേജാതപച്ചയാ – അരൂപേ നേവവിപാകനവിപാകധമ്മധമ്മം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ, നേവവിപാകനവിപാകധമ്മധമ്മേ ഖന്ധേ പടിച്ച ചിത്തസമുട്ഠാനം രൂപം, ഏകം മഹാഭൂതം പടിച്ച തയോ മഹാഭൂതാ…പേ… ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച…പേ…. (൧)

നേവവിപാകനവിപാകധമ്മധമ്മം പടിച്ച വിപാകോ ധമ്മോ ഉപ്പജ്ജതി നപുരേജാതപച്ചയാ – പടിസന്ധിക്ഖണേ വത്ഥും പടിച്ച വിപാകാ ഖന്ധാ. (൨)

നേവവിപാകനവിപാകധമ്മധമ്മം പടിച്ച വിപാകോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നപുരേജാതപച്ചയാ – പടിസന്ധിക്ഖണേ വത്ഥും പടിച്ച വിപാകാ ഖന്ധാ, മഹാഭൂതേ പടിച്ച കടത്താരൂപം. (൩)

൩൬. വിപാകഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച വിപാകോ ധമ്മോ ഉപ്പജ്ജതി നപുരേജാതപച്ചയാ – പടിസന്ധിക്ഖണേ വിപാകം ഏകം ഖന്ധഞ്ച വത്ഥുഞ്ച പടിച്ച തയോ ഖന്ധാ…പേ… ദ്വേ ഖന്ധേ ച വത്ഥുഞ്ച പടിച്ച ദ്വേ ഖന്ധാ. (൧)

വിപാകഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നപുരേജാതപച്ചയാ – വിപാകേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം; പടിസന്ധിക്ഖണേ വിപാകേ ഖന്ധേ ച മഹാഭൂതേ ച പടിച്ച കടത്താരൂപം. (൨)

വിപാകഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച വിപാകോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നപുരേജാതപച്ചയാ – പടിസന്ധിക്ഖണേ വിപാകം ഏകം ഖന്ധഞ്ച വത്ഥുഞ്ച പടിച്ച തയോ ഖന്ധാ…പേ… ദ്വേ ഖന്ധേ ച വത്ഥുഞ്ച പടിച്ച ദ്വേ ഖന്ധാ; വിപാകേ ഖന്ധേ ച മഹാഭൂതേ ച പടിച്ച കടത്താരൂപം. (൩)

൩൭. വിപാകധമ്മധമ്മഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നപുരേജാതപച്ചയാ – വിപാകധമ്മധമ്മേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം.

നപച്ഛാജാതപച്ചയാദി

൩൮. വിപാകം ധമ്മം പടിച്ച വിപാകോ ധമ്മോ ഉപ്പജ്ജതി നപച്ഛാജാതപച്ചയാ…പേ… നആസേവനപച്ചയാ (സംഖിത്തം).

നകമ്മപച്ചയോ

൩൯. വിപാകധമ്മധമ്മം പടിച്ച വിപാകധമ്മധമ്മോ ഉപ്പജ്ജതി നകമ്മപച്ചയാ – വിപാകധമ്മധമ്മേ ഖന്ധേ പടിച്ച വിപാകധമ്മധമ്മാ ചേതനാ.

നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നകമ്മപച്ചയാ – നേവവിപാകനവിപാകധമ്മധമ്മേ ഖന്ധേ പടിച്ച നേവവിപാകനവിപാകധമ്മധമ്മാ ചേതനാ; ബാഹിരം… ആഹാരസമുട്ഠാനം… ഉതുസമുട്ഠാനം ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച ഉപാദാരൂപം.

നവിപാകപച്ചയോ

൪൦. വിപാകധമ്മധമ്മം പടിച്ച വിപാകധമ്മധമ്മോ ഉപ്പജ്ജതി നവിപാകപച്ചയാ – വിപാകധമ്മധമ്മം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൧)

വിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നവിപാകപച്ചയാ – വിപാകധമ്മധമ്മേ ഖന്ധേ പടിച്ച ചിത്തസമുട്ഠാനം രൂപം. (൨)

വിപാകധമ്മധമ്മം പടിച്ച വിപാകധമ്മധമ്മോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നവിപാകപച്ചയാ – വിപാകധമ്മധമ്മം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. (൩)

൪൧. നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നവിപാകപച്ചയാ – നേവവിപാകനവിപാകധമ്മധമ്മം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച ചിത്തസമുട്ഠാനം രൂപം ഉപാദാരൂപം; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച കടത്താരൂപം ഉപാദാരൂപം. (൧)

വിപാകധമ്മധമ്മഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നവിപാകപച്ചയാ – വിപാകധമ്മധമ്മേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

നആഹാരപച്ചയോ

൪൨. നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നആഹാരപച്ചയാ – ബാഹിരം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച കടത്താരൂപം ഉപാദാരൂപം.

നഇന്ദ്രിയപച്ചയോ

൪൩. നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നഇന്ദ്രിയപച്ചയാ – ബാഹിരം… ആഹാരസമുട്ഠാനം… ഉതുസമുട്ഠാനം ഏകം മഹാഭൂതം പടിച്ച തയോ മഹാഭൂതാ…പേ… അസഞ്ഞസത്താനം മഹാഭൂതേ പടിച്ച രൂപജീവിതിന്ദ്രിയം.

നഝാനപച്ചയോ

൪൪. വിപാകം ധമ്മം പടിച്ച വിപാകോ ധമ്മോ ഉപ്പജ്ജതി നഝാനപച്ചയാ – പഞ്ചവിഞ്ഞാണസഹഗതം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ.

നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നഝാനപച്ചയാ – ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച…പേ….

നമഗ്ഗപച്ചയോ

൪൫. വിപാകം ധമ്മം പടിച്ച വിപാകോ ധമ്മോ ഉപ്പജ്ജതി നമഗ്ഗപച്ചയാ – അഹേതുകം വിപാകം ഏകം ഖന്ധം പടിച്ച… തീണി.

നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നമഗ്ഗപച്ചയാ – അഹേതുകം നേവവിപാകനവിപാകധമ്മധമ്മം ഏകം ഖന്ധം പടിച്ച… തീണി.

വിപാകഞ്ച നേവവിപാകനവിപാകധമ്മധമ്മഞ്ച ധമ്മം പടിച്ച വിപാകോ ധമ്മോ ഉപ്പജ്ജതി നമഗ്ഗപച്ചയാ – അഹേതുകപടിസന്ധിക്ഖണേ വിപാകം ഏകം ഖന്ധഞ്ച വത്ഥുഞ്ച പടിച്ച… തീണി.

നസമ്പയുത്തപച്ചയോ

൪൬. വിപാകം ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നസമ്പയുത്തപച്ചയാ… ദ്വേ.

വിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നസമ്പയുത്തപച്ചയാ… ദ്വേ.

നേവവിപാകനവിപാകധമ്മധമ്മം പടിച്ച… ഏകം.

നവിപ്പയുത്തപച്ചയോ

൪൭. വിപാകം ധമ്മം പടിച്ച വിപാകോ ധമ്മോ ഉപ്പജ്ജതി നവിപ്പയുത്തപച്ചയാ – അരൂപേ വിപാകേ ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ.

വിപാകധമ്മധമ്മം പടിച്ച വിപാകധമ്മധമ്മോ ഉപ്പജ്ജതി നവിപ്പയുത്തപച്ചയാ – അരൂപേ വിപാകധമ്മധമ്മം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ.

നേവവിപാകനവിപാകധമ്മധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നവിപ്പയുത്തപച്ചയാ – അരൂപേ നേവവിപാകനവിപാകധമ്മധമ്മം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച കടത്താരൂപം ഉപാദാരൂപം.

നോനത്ഥി-നോവിഗതപച്ചയാ

൪൮. വിപാകം ധമ്മം പടിച്ച നേവവിപാകനവിപാകധമ്മധമ്മോ ഉപ്പജ്ജതി നോനത്ഥിപച്ചയാ… നോവിഗതപച്ചയാ (സംഖിത്തം).