൧. വിഭങ്ഗവാരോ

നഹേതുപച്ചയോ

൭൫. വിപാകം ധമ്മം പച്ചയാ വിപാകോ ധമ്മോ ഉപ്പജ്ജതി നഹേതുപച്ചയാ – അഹേതുകം വിപാകം ഏകം ഖന്ധം പച്ചയാ… തീണി.

വിപാകധമ്മധമ്മം പച്ചയാ വിപാകധമ്മധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ പച്ചയാ വിചികിച്ഛാസഹഗതോ ഉദ്ധച്ചസഹഗതോ മോഹോ.

നേവവിപാകനവിപാകധമ്മധമ്മം പച്ചയാ നേവവിപാകനവിപാകധമ്മധമ്മോ ഉപ്പജ്ജതി നഹേതുപച്ചയാ – അഹേതുകം നേവവിപാകനവിപാകധമ്മധമ്മം ഏകം ഖന്ധം പച്ചയാ…പേ…. (൧)

നേവവിപാകനവിപാകധമ്മധമ്മം പച്ചയാ വിപാകോ ധമ്മോ ഉപ്പജ്ജതി നഹേതുപച്ചയാ – ചക്ഖായതനം പച്ചയാ ചക്ഖുവിഞ്ഞാണം…പേ…. (൨)

നേവവിപാകനവിപാകധമ്മധമ്മം പച്ചയാ വിപാകധമ്മധമ്മോ ഉപ്പജ്ജതി നഹേതുപച്ചയാ – വത്ഥും പച്ചയാ വിചികിച്ഛാസഹഗതോ ഉദ്ധച്ചസഹഗതോ മോഹോ. (൩)

നേവവിപാകനവിപാകധമ്മധമ്മം പച്ചയാ വിപാകോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നഹേതുപച്ചയാ – വത്ഥും പച്ചയാ അഹേതുകാ വിപാകാ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം, അഹേതുകപടിസന്ധിക്ഖണേ…പേ… (൪)

൭൬. വിപാകഞ്ച നേവവിപാകനവിപാകധമ്മധമ്മഞ്ച ധമ്മം പച്ചയാ വിപാകോ ധമ്മോ ഉപ്പജ്ജതി…പേ… നേവവിപാകനവിപാകധമ്മധമ്മോ ഉപ്പജ്ജതി…പേ… വിപാകോ ച നേവവിപാകനവിപാകധമ്മധമ്മോ ച ധമ്മാ ഉപ്പജ്ജന്തി നഹേതുപച്ചയാ…പേ… തീണി.

വിപാകധമ്മധമ്മഞ്ച നേവവിപാകനവിപാകധമ്മധമ്മഞ്ച ധമ്മം പച്ചയാ വിപാകധമ്മധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച വത്ഥുഞ്ച പച്ചയാ വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നആരമ്മണപച്ചയോ

൭൭. വിപാകം ധമ്മം പച്ചയാ നേവവിപാകനവിപാകധമ്മധമ്മോ ഉപ്പജ്ജതി നആരമ്മണപച്ചയാ (സംഖിത്തം. സബ്ബാനി പദാനി വിത്ഥാരേതബ്ബാനി.)