൧൬. സോളസമവഗ്ഗോ

(൧൫൭) ൨. പഗ്ഗഹകഥാ

൭൪൫. പരോ പരസ്സ ചിത്തം പഗ്ഗണ്ഹാതീതി? ആമന്താ. പരോ പരസ്സ ചിത്തം ‘‘മാ രജ്ജി,’’‘‘മാ ദുസ്സി,’’‘‘മാ മുയ്ഹി,’’‘‘മാ കിലിസ്സീ’’തി പഗ്ഗണ്ഹാതീതി? ന ഹേവം വത്തബ്ബേ…പേ… പരോ പരസ്സ ചിത്തം പഗ്ഗണ്ഹാതീതി? ആമന്താ. പരോ പരസ്സ അലോഭം കുസലമൂലം ജനേതി… അദോസം കുസലമൂലം ജനേതി… അമോഹം കുസലമൂലം ജനേതി… സദ്ധം ജനേതി… വീരിയം ജനേതി… സതിം ജനേതി… സമാധിം ജനേതി… പഞ്ഞം ജനേതീതി? ന ഹേവം വത്തബ്ബേ…പേ… പരോ പരസ്സ ചിത്തം പഗ്ഗണ്ഹാതീതി? ആമന്താ. പരോ പരസ്സ ഉപ്പന്നോ ഫസ്സോ ‘‘മാ നിരുജ്ഝീ’’തി പഗ്ഗണ്ഹാതീതി? ന ഹേവം വത്തബ്ബേ…പേ… പരോ പരസ്സ ഉപ്പന്നാ വേദനാ…പേ… ഉപ്പന്നാ പഞ്ഞാ ‘‘മാ നിരുജ്ഝീ’’തി പഗ്ഗണ്ഹാതീതി? ന ഹേവം വത്തബ്ബേ…പേ….

പരോ പരസ്സ ചിത്തം പഗ്ഗണ്ഹാതീതി? ആമന്താ. പരോ പരസ്സ അത്ഥായ രാഗം പജഹതി… ദോസം പജഹതി… മോഹം പജഹതി…പേ… അനോത്തപ്പം പജഹതീതി? ന ഹേവം വത്തബ്ബേ…പേ….

പരോ പരസ്സ ചിത്തം പഗ്ഗണ്ഹാതീതി? ആമന്താ. പരോ പരസ്സ അത്ഥായ മഗ്ഗം ഭാവേതി… സതിപട്ഠാനം ഭാവേതി…പേ… ബോജ്ഝങ്ഗം ഭാവേതീതി? ന ഹേവം വത്തബ്ബേ…പേ….

പരോ പരസ്സ ചിത്തം പഗ്ഗണ്ഹാതീതി? ആമന്താ. പരോ പരസ്സ അത്ഥായ ദുക്ഖം പരിജാനാതി…പേ… മഗ്ഗം ഭാവേതീതി? ന ഹേവം വത്തബ്ബേ…പേ….

പരോ പരസ്സ ചിത്തം പഗ്ഗണ്ഹാതീതി? ആമന്താ. അഞ്ഞോ അഞ്ഞസ്സ കാരകോ, പരങ്കതം സുഖം ദുക്ഖം അഞ്ഞോ കരോതി അഞ്ഞോ പടിസംവേദേതീതി? ന ഹേവം വത്തബ്ബേ…പേ….

പരോ പരസ്സ ചിത്തം പഗ്ഗണ്ഹാതീതി? ആമന്താ. നനു വുത്തം ഭഗവതാ – ‘‘അത്തനാവ കതം പാപം…പേ… നാഞ്ഞോ അഞ്ഞം വിസോധയേ’’തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘പരോ പരസ്സ ചിത്തം പഗ്ഗണ്ഹാതീ’’തി.

൭൪൬. ന വത്തബ്ബം – ‘‘പരോ പരസ്സ ചിത്തം പഗ്ഗണ്ഹാതീ’’തി? ആമന്താ. നനു അത്ഥി ബലപ്പത്താ, അത്ഥി വസീഭൂതാതി? ആമന്താ. ഹഞ്ചി അത്ഥി ബലപ്പത്താ, അത്ഥി വസീഭൂതാ, തേന വത രേ വത്തബ്ബേ – ‘‘പരോ പരസ്സ ചിത്തം പഗ്ഗണ്ഹാതീ’’തി.

പഗ്ഗഹകഥാ നിട്ഠിതാ.