൧൬. സോളസമവഗ്ഗോ

(൧൫൮) ൩. സുഖാനുപ്പദാനകഥാ

൭൪൭. പരോ പരസ്സ സുഖം അനുപ്പദേതീതി? ആമന്താ. പരോ പരസ്സ ദുക്ഖം അനുപ്പദേതീതി? ന ഹേവം വത്തബ്ബേ…പേ… പരോ പരസ്സ ദുക്ഖം ന അനുപ്പദേതീതി? ആമന്താ. പരോ പരസ്സ സുഖം ന അനുപ്പദേതീതി? ന ഹേവം വത്തബ്ബേ…പേ… പരോ പരസ്സ സുഖം അനുപ്പദേതീതി? ആമന്താ. പരോ പരസ്സ അത്തനോ സുഖം അനുപ്പദേതി, അഞ്ഞേസം സുഖം അനുപ്പദേതി, തസ്സ സുഖം അനുപ്പദേതീതി? ന ഹേവം വത്തബ്ബേ…പേ… പരോ പരസ്സ നേവത്തനോ, ന അഞ്ഞേസം, ന തസ്സ സുഖം അനുപ്പദേതീതി? ആമന്താ. ഹഞ്ചി പരോ പരസ്സ നേവത്തനോ, ന അഞ്ഞേസം, ന തസ്സ സുഖം അനുപ്പദേതി, നോ ച വത രേ വത്തബ്ബേ – ‘‘പരോ പരസ്സ സുഖം അനുപ്പദേതീ’’തി.

പരോ പരസ്സ സുഖം അനുപ്പദേതീതി? ആമന്താ. അഞ്ഞോ അഞ്ഞസ്സ കാരകോ, പരങ്കതം സുഖം ദുക്ഖം അഞ്ഞോ കരോതി അഞ്ഞോ പടിസംവേദേതീതി? ന ഹേവം വത്തബ്ബേ…പേ….

൭൪൮. ന വത്തബ്ബം – ‘‘പരോ പരസ്സ സുഖം അനുപ്പദേതീ’’തി? ആമന്താ. നനു ആയസ്മാ ഉദായീ ഏതദവോച – ‘‘ബഹൂനം വത നോ ഭഗവാ ദുക്ഖധമ്മാനം അപഹത്താ, ബഹൂനം വത നോ ഭഗവാ സുഖധമ്മാനം ഉപഹത്താ, ബഹൂനം വത നോ ഭഗവാ അകുസലാനം ധമ്മാനം അപഹത്താ, ബഹൂനം വത നോ ഭഗവാ കുസലാനം ധമ്മാനം ഉപഹത്താ’’തി [മ. നി. ൨.൧൪൮ ലടുകികോപമേ]! അത്ഥേവ സുത്തന്തോതി? ആമന്താ. തേന ഹി പരോ പരസ്സ സുഖം അനുപ്പദേതീതി.

സുഖാനുപ്പദാനകഥാ നിട്ഠിതാ.