൧൫. പന്നരസമവഗ്ഗോ

(൧൫൪) ൧൦. അസഞ്ഞസത്തുപികകഥാ

൭൩൫. സഞ്ഞാവേദയിതനിരോധസമാപത്തി അസഞ്ഞസത്തുപികാതി? ആമന്താ. അത്ഥി സഞ്ഞാവേദയിതനിരോധം സമാപന്നസ്സ അലോഭോ കുസലമൂലം, അദോസോ കുസലമൂലം, അമോഹോ കുസലമൂലം, സദ്ധാ വീരിയം സതി സമാധി പഞ്ഞാതി? ന ഹേവം വത്തബ്ബേ…പേ… നത്ഥി സഞ്ഞാവേദയിതനിരോധം സമാപന്നസ്സ അലോഭോ കുസലമൂലം, അദോസോ കുസലമൂലം…പേ… പഞ്ഞാതി? ആമന്താ. ഹഞ്ചി നത്ഥി സഞ്ഞാവേദയിതനിരോധം സമാപന്നസ്സ അലോഭോ കുസലമൂലം, അദോസോ കുസലമൂലം, അമോഹോ കുസലമൂലം, സദ്ധാ വീരിയം സതി സമാധി പഞ്ഞാ, നോ ച വത രേ വത്തബ്ബേ – ‘‘സഞ്ഞാവേദയിതനിരോധസമാപത്തി അസഞ്ഞസത്തുപികാ’’തി.

സഞ്ഞാവേദയിതനിരോധസമാപത്തി അസഞ്ഞസത്തുപികാതി? ആമന്താ. അത്ഥി സഞ്ഞാവേദയിതനിരോധം സമാപന്നസ്സ ഫസ്സോ വേദനാ സഞ്ഞാ ചേതനാ ചിത്തന്തി? ന ഹേവം വത്തബ്ബേ…പേ… നത്ഥി സഞ്ഞാവേദയിതനിരോധം സമാപന്നസ്സ ഫസ്സോ വേദനാ സഞ്ഞാ ചേതനാ ചിത്തന്തി? ആമന്താ. അഫസ്സകസ്സ മഗ്ഗഭാവനാ…പേ… അചിത്തകസ്സ മഗ്ഗഭാവനാതി? ന ഹേവം വത്തബ്ബേ…പേ… നനു സഫസ്സകസ്സ മഗ്ഗഭാവനാ…പേ… സചിത്തകസ്സ മഗ്ഗഭാവനാതി? ആമന്താ. ഹഞ്ചി സഫസ്സകസ്സ മഗ്ഗഭാവനാ…പേ… സചിത്തകസ്സ മഗ്ഗഭാവനാ, നോ ച വത രേ വത്തബ്ബേ – ‘‘സഞ്ഞാവേദയിതനിരോധസമാപത്തി അസഞ്ഞസത്തുപികാ’’തി.

സഞ്ഞാവേദയിതനിരോധസമാപത്തി അസഞ്ഞസത്തുപികാതി? ആമന്താ. യേ കേചി സഞ്ഞാവേദയിതനിരോധം സമാപജ്ജന്തി, സബ്ബേ തേ അസഞ്ഞസത്തുപികാതി? ന ഹേവം വത്തബ്ബേ…പേ….

൭൩൬. ന വത്തബ്ബം – ‘‘സഞ്ഞാവേദയിതനിരോധസമാപത്തി അസഞ്ഞസത്തുപികാ’’തി? ആമന്താ. നനു ഇധാപി അസഞ്ഞീ തത്രാപി അസഞ്ഞീതി? ആമന്താ. ഹഞ്ചി ഇധാപി അസഞ്ഞീ തത്രാപി അസഞ്ഞീ, തേന വത രേ വത്തബ്ബേ – ‘‘സഞ്ഞാവേദയിതനിരോധസമാപത്തി അസഞ്ഞസത്തുപികാ’’തി.

അസഞ്ഞസത്തുപികകഥാ നിട്ഠിതാ.