൧൦. ദസമവഗ്ഗോ

(൧൦൫) ൧൧. അവിഞ്ഞത്തി ദുസ്സില്യന്തികഥാ

൬൦൩. അവിഞ്ഞത്തി ദുസ്സില്യന്തി? ആമന്താ. പാണാതിപാതോതി? ന ഹേവം വത്തബ്ബേ…പേ… അദിന്നാദാനന്തി? ന ഹേവം വത്തബ്ബേ…പേ… കാമേസുമിച്ഛാചാരോതി? ന ഹേവം വത്തബ്ബേ…പേ… മുസാവാദോതി? ന ഹേവം വത്തബ്ബേ…പേ… സുരാമേരയമജ്ജപമാദട്ഠാനന്തി? ന ഹേവം വത്തബ്ബേ…പേ….

പാപകമ്മം സമാദിയിത്വാ ദാനം ദദന്തസ്സ പുഞ്ഞഞ്ച അപുഞ്ഞഞ്ച ഉഭോ വഡ്ഢന്തീതി? ന ഹേവം വത്തബ്ബേ…പേ… പുഞ്ഞഞ്ച അപുഞ്ഞഞ്ച ഉഭോ വഡ്ഢന്തീതി? ആമന്താ. ദ്വിന്നം ഫസ്സാനം…പേ… ദ്വിന്നം ചിത്താനം സമോധാനം ഹോതീതി? ന ഹേവം വത്തബ്ബേ…പേ… ദ്വിന്നം ഫസ്സാനം…പേ… ദ്വിന്നം ചിത്താനം സമോധാനം ഹോതീതി? ആമന്താ. കുസലാകുസലാ സാവജ്ജാനവജ്ജാ ഹീനപണീതാ കണ്ഹസുക്കസപ്പടിഭാഗാ ധമ്മാ സമ്മുഖീഭാവം ആഗച്ഛന്തീതി? ന ഹേവം വത്തബ്ബേ…പേ….

കുസലാകുസലാ സാവജ്ജാനവജ്ജാ ഹീനപണീതാ കണ്ഹസുക്കസപ്പടിഭാഗാ ധമ്മാ സമ്മുഖീഭാവം ആഗച്ഛന്തീതി? ആമന്താ. നനു വുത്തം ഭഗവതാ – ‘‘ചത്താരിമാനി, ഭിക്ഖവേ, സുവിദൂരവിദൂരാനി! കതമാനി ചത്താരി? നഭഞ്ച, ഭിക്ഖവേ, പഥവീ ച – ഇദം പഠമം സുവിദൂരവിദൂരം…പേ… തസ്മാ സതം ധമ്മോ അസബ്ഭി ആരകാ’’തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘കുസലാകുസലാ സാവജ്ജാനവജ്ജാ ഹീനപണീതാ കണ്ഹസുക്കസപ്പടിഭാഗാ ധമ്മാ സമ്മുഖീഭാവം ആഗച്ഛന്തീ’’തി.

൬൦൪. ന വത്തബ്ബം – ‘‘അവിഞ്ഞത്തി ദുസ്സില്യ’’ന്തി? ആമന്താ. നനു പാപകമ്മം സമാദിന്നോ ആസീതി? ആമന്താ. ഹഞ്ചി പാപകമ്മം സമാദിന്നോ ആസി, തേന വത രേ വത്തബ്ബേ – ‘‘അവിഞ്ഞത്തി ദുസ്സില്യ’’ന്തി.

അവിഞ്ഞത്തി ദുസ്സില്യന്തികഥാ നിട്ഠിതാ.

ദസമവഗ്ഗോ.

തസ്സുദ്ദാനം –

ഉപപത്തേസിയേ പഞ്ചക്ഖന്ധേ അനിരുദ്ധേ കിരിയാ പഞ്ചക്ഖന്ധാ ഉപ്പജ്ജന്തി, മഗ്ഗസമങ്ഗിസ്സ രൂപം മഗ്ഗോ, പഞ്ചവിഞ്ഞാണസമങ്ഗിസ്സ അത്ഥി മഗ്ഗഭാവനാ, പഞ്ചവിഞ്ഞാണാ കുസലാപി അകുസലാപി, പഞ്ചവിഞ്ഞാണാ സാഭോഗാ, മഗ്ഗസമങ്ഗീ ദ്വീഹി സീലേഹി സമന്നാഗതോ, സീലം അചേതസികം, സീലം ന ചിത്താനുപരിവത്തി, സമാദാനഹേതുകം സീലം വഡ്ഢതീതി, വിഞ്ഞത്തിസീലം അവിഞ്ഞത്തി ദുസ്സില്യന്തി.

ദുതിയോ പണ്ണാസകോ.

തസ്സുദ്ദാനം –

നിയാമസങ്ഗഹഗതാനിസംസതാ ച നിരോധോതി [നിയാമ സങ്ഗഹഗതാനിസംസതാ അത്ഥി പഞ്ചവോകാരഭവോ നിരോധോ മഗ്ഗസമങ്ഗിസ്സ പഞ്ചവോകാരഭവോതി (സീ. സ്യാ. ക.), നിയാമ സങ്ഗഹ ഗതാനിസംസതാ അത്ഥി പഞ്ചവോകാരഭവോ മഗ്ഗസമങ്ഗിസ്സ നോ പഞ്ചവോകാരഭവോ (പീ.)].