(൬൪) ൨. സമ്പയുത്തകഥാ

൪൭൩. നത്ഥി കേചി ധമ്മാ കേഹിചി ധമ്മേഹി സമ്പയുത്താതി? ആമന്താ. നനു അത്ഥി കേചി ധമ്മാ കേഹിചി ധമ്മേഹി സഹഗതാ സഹജാതാ സംസട്ഠാ ഏകുപ്പാദാ ഏകനിരോധാ ഏകവത്ഥുകാ ഏകാരമ്മണാതി? ആമന്താ. ഹഞ്ചി അത്ഥി കേചി ധമ്മാ കേഹിചി ധമ്മേഹി സഹഗതാ സഹജാതാ സംസട്ഠാ ഏകുപ്പാദാ ഏകനിരോധാ ഏകവത്ഥുകാ ഏകാരമ്മണാ, നോ ച വത രേ വത്തബ്ബേ – ‘‘നത്ഥി കേചി ധമ്മാ കേഹിചി ധമ്മേഹി സമ്പയുത്താ’’തി.

വേദനാക്ഖന്ധോ സഞ്ഞാക്ഖന്ധേന സഹജാതോതി? ആമന്താ. ഹഞ്ചി വേദനാക്ഖന്ധോ സഞ്ഞാക്ഖന്ധേന സഹജാതോ, തേന വത രേ വത്തബ്ബേ – ‘‘വേദനാക്ഖന്ധോ സഞ്ഞാക്ഖന്ധേന സമ്പയുത്തോ’’തി.

വേദനാക്ഖന്ധോ സങ്ഖാരക്ഖന്ധേന… വിഞ്ഞാണക്ഖന്ധേന സഹജാതോതി? ആമന്താ. ഹഞ്ചി വേദനാക്ഖന്ധോ വിഞ്ഞാണക്ഖന്ധേന സഹജാതോ, തേന വത രേ വത്തബ്ബേ – ‘‘വേദനാക്ഖന്ധോ വിഞ്ഞാണക്ഖന്ധേന സമ്പയുത്തോ’’തി.

സഞ്ഞാക്ഖന്ധോ … സങ്ഖാരക്ഖന്ധോ… വിഞ്ഞാണക്ഖന്ധോ വേദനാഖന്ധേന… സഞ്ഞാക്ഖന്ധേന… സങ്ഖാരക്ഖന്ധേന സഹജാതോതി? ആമന്താ. ഹഞ്ചി വിഞ്ഞാണക്ഖന്ധോ സങ്ഖാരക്ഖന്ധേന സഹജാതോ, തേന വത രേ വത്തബ്ബേ – ‘‘വിഞ്ഞാണക്ഖന്ധോ സങ്ഖാരക്ഖന്ധേന സമ്പയുത്തോ’’തി.

൪൭൪. യഥാ തിലമ്ഹി തേലം അനുഗതം അനുപവിട്ഠം, ഉച്ഛുമ്ഹി രസോ അനുഗതോ അനുപവിട്ഠോ; ഏവമേവ തേ ധമ്മാ തേഹി ധമ്മേഹി അനുഗതാ അനുപവിട്ഠാതി? ന ഹേവം വത്തബ്ബേ…പേ….

സമ്പയുത്തകഥാ നിട്ഠിതാ.