൬. ഛട്ഠവഗ്ഗോ

(൫൪) ൨. പടിച്ചസമുപ്പാദകഥാ

൪൪൮. പടിച്ചസമുപ്പാദോ അസങ്ഖതോതി? ആമന്താ. നിബ്ബാനം താണം ലേണം സരണം പരായനം അച്ചുതം അമതന്തി? ന ഹേവം വത്തബ്ബേ…പേ… പടിച്ചസമുപ്പാദോ അസങ്ഖതോ, നിബ്ബാനം അസങ്ഖതന്തി? ആമന്താ. ദ്വേ അസങ്ഖതാനീതി? ന ഹേവം വത്തബ്ബേ…പേ… ദ്വേ അസങ്ഖതാനീതി? ആമന്താ. ദ്വേ താണാനി ദ്വേ ലേണാനി ദ്വേ സരണാനി ദ്വേ പരായനാനി ദ്വേ അച്ചുതാനി ദ്വേ അമതാനി ദ്വേ നിബ്ബാനാനീതി? ന ഹേവം വത്തബ്ബേ…പേ… ദ്വേ നിബ്ബാനാനീതി? ആമന്താ. അത്ഥി ദ്വിന്നം നിബ്ബാനാനം ഉച്ചനീചതാ ഹീനപണീതതാ ഉക്കംസാവകംസോ സീമാ വാ ഭേദോ വാ രാജി വാ അന്തരികാ വാതി? ന ഹേവം വത്തബ്ബേ…പേ….

൪൪൯. പടിച്ചസമുപ്പാദോ അസങ്ഖതോതി? ആമന്താ. അവിജ്ജാ അസങ്ഖതാതി? ന ഹേവം വത്തബ്ബേ…പേ… അവിജ്ജാ സങ്ഖതാതി? ആമന്താ. പടിച്ചസമുപ്പാദോ സങ്ഖതോതി? ന ഹേവം വത്തബ്ബേ…പേ… പടിച്ചസമുപ്പാദോ അസങ്ഖതോതി? ആമന്താ. അവിജ്ജാപച്ചയാ സങ്ഖാരാ അസങ്ഖതാതി? ന ഹേവം വത്തബ്ബേ…പേ… അവിജ്ജാപച്ചയാ സങ്ഖാരാ സങ്ഖതാതി? ആമന്താ. പടിച്ചസമുപ്പാദോ സങ്ഖതോതി? ന ഹേവം വത്തബ്ബേ…പേ… പടിച്ചസമുപ്പാദോ അസങ്ഖതോതി? ആമന്താ. സങ്ഖാരപച്ചയാ വിഞ്ഞാണം അസങ്ഖതന്തി? ന ഹേവം വത്തബ്ബേ…പേ… സങ്ഖാരപച്ചയാ വിഞ്ഞാണം സങ്ഖതന്തി? ആമന്താ. പടിച്ചസമുപ്പാദോ സങ്ഖതോതി? ന ഹേവം വത്തബ്ബേ…പേ… പടിച്ചസമുപ്പാദോ അസങ്ഖതോതി? ആമന്താ. വിഞ്ഞാണപച്ചയാ നാമരൂപം അസങ്ഖതന്തി? ന ഹേവം വത്തബ്ബേ…പേ… വിഞ്ഞാണപച്ചയാ നാമരൂപം സങ്ഖതന്തി? ആമന്താ. പടിച്ചസമുപ്പാദോ സങ്ഖതോതി? ന ഹേവം വത്തബ്ബേ…പേ… പടിച്ചസമുപ്പാദോ അസങ്ഖതോതി? ആമന്താ. ജാതിപച്ചയാ ജരാമരണം അസങ്ഖതന്തി? ന ഹേവം വത്തബ്ബേ…പേ… ജാതിപച്ചയാ ജരാമരണം സങ്ഖതന്തി? ആമന്താ. പടിച്ചസമുപ്പാദോ സങ്ഖതോതി? ന ഹേവം വത്തബ്ബേ…പേ….

൪൫൦. ന വത്തബ്ബം – ‘‘പടിച്ചസമുപ്പാദോ അസങ്ഖതോ’’തി? ആമന്താ. നനു വുത്തം ഭഗവതാ – ‘‘ജാതിപച്ചയാ, ഭിക്ഖവേ, ജരാമരണം. ഉപ്പാദാ വാ തഥാഗതാനം അനുപ്പാദാ വാ തഥാഗതാനം ഠിതാവ സാ ധാതു ധമ്മട്ഠിതതാ ധമ്മനിയാമതാ ഇദപ്പച്ചയതാ. തം തഥാഗതോ അഭിസമ്ബുജ്ഝതി അഭിസമേതി. അഭിസമ്ബുജ്ഝിത്വാ അഭിസമേത്വാ ആചിക്ഖതി ദേസേതി പഞ്ഞാപേതി പട്ഠപേതി വിവരതി വിഭജതി ഉത്താനിം കരോതി. ‘പസ്സഥാ’തി ചാഹ – ജാതിപച്ചയാ, ഭിക്ഖവേ, ജരാമരണം. ഭവപച്ചയാ, ഭിക്ഖവേ, ജാതി…പേ… അവിജ്ജാപച്ചയാ, ഭിക്ഖവേ, സങ്ഖാരാ. ഉപ്പാദാ വാ തഥാഗതാനം അനുപ്പാദാ വാ തഥാഗതാനം ഠിതാവ സാ ധാതു…പേ… ‘പസ്സഥാ’തി ചാഹ – അവിജ്ജാപച്ചയാ, ഭിക്ഖവേ, സങ്ഖാരാ. ഇതി ഖോ, ഭിക്ഖവേ, യാ തത്ര തഥതാ അവിതഥതാ അനഞ്ഞഥതാ ഇദപ്പച്ചയതാ – അയം വുച്ചതി, ഭിക്ഖവേ, പടിച്ചസമുപ്പാദോ’’തി [സം. നി. ൨.൨൦]. അത്ഥേവ സുത്തന്തോതി? ആമന്താ. തേന ഹി പടിച്ചസമുപ്പാദോ അസങ്ഖതോതി.

൪൫൧. അവിജ്ജാപച്ചയാ സങ്ഖാരാതി യാ തത്ഥ ധമ്മട്ഠിതതാ ധമ്മനിയാമതാ അസങ്ഖതാ, നിബ്ബാനം അസങ്ഖതന്തി? ആമന്താ. ദ്വേ അസങ്ഖതാനീതി? ന ഹേവം വത്തബ്ബേ…പേ… ദ്വേ അസങ്ഖതാനീതി? ആമന്താ. ദ്വേ താണാനി…പേ… അന്തരികാ വാതി? ന ഹേവം വത്തബ്ബേ…പേ….

അവിജ്ജാപച്ചയാ സങ്ഖാരാതി യാ തത്ഥ ധമ്മട്ഠിതതാ ധമ്മനിയാമതാ അസങ്ഖതാ, സങ്ഖാരപച്ചയാ വിഞ്ഞാണന്തി യാ തത്ഥ ധമ്മട്ഠിതതാ ധമ്മനിയാമതാ അസങ്ഖതാ, നിബ്ബാനം അസങ്ഖതന്തി? ആമന്താ. തീണി അസങ്ഖതാനീതി? ന ഹേവം വത്തബ്ബേ…പേ…. തീണി അസങ്ഖതാനീതി? ആമന്താ. തീണി താണാനി…പേ… അന്തരികാ വാതി? ന ഹേവം വത്തബ്ബേ…പേ….

അവിജ്ജാപച്ചയാ സങ്ഖാരാതി യാ തത്ഥ ധമ്മട്ഠിതതാ ധമ്മനിയാമതാ അസങ്ഖതാ, സങ്ഖാരപച്ചയാ വിഞ്ഞാണന്തി യാ തത്ഥ ധമ്മട്ഠിതതാ ധമ്മനിയാമതാ അസങ്ഖതാ…പേ… ജാതിപച്ചയാ ജരാമരണന്തി യാ തത്ഥ ധമ്മട്ഠിതതാ ധമ്മനിയാമതാ അസങ്ഖതാ, നിബ്ബാനം അസങ്ഖതന്തി? ആമന്താ. ദ്വാദസ അസങ്ഖതാനീതി? ന ഹേവം വത്തബ്ബേ…പേ… ദ്വാദസ അസങ്ഖതാനീതി? ആമന്താ. ദ്വാദസ താണാനി ദ്വാദസ ലേണാനി…പേ… അന്തരികാ വാതി? ന ഹേവം വത്തബ്ബേ…പേ….

പടിച്ചസമുപ്പാദകഥാ നിട്ഠിതാ.