൬. ഛട്ഠവഗ്ഗോ

(൬൨) ൧൦. കായകമ്മം സനിദസ്സനന്തികഥാ

൪൬൯. കായകമ്മം സനിദസ്സനന്തി? ആമന്താ. രൂപം രൂപായതനം രൂപധാതു നീലം പീതകം ലോഹിതകം ഓദാതം ചക്ഖുവിഞ്ഞേയ്യം ചക്ഖുസ്മിം പടിഹഞ്ഞതി ചക്ഖുസ്സ ആപാഥം ആഗച്ഛതീതി? ന ഹേവം വത്തബ്ബേ…പേ….

കായകമ്മം സനിദസ്സനന്തി? ആമന്താ. ചക്ഖുഞ്ച പടിച്ച കായകമ്മഞ്ച ഉപ്പജ്ജതി ചക്ഖുവിഞ്ഞാണന്തി? ന ഹേവം വത്തബ്ബേ…പേ….

ചക്ഖുഞ്ച പടിച്ച കായകമ്മഞ്ച ഉപ്പജ്ജതി ചക്ഖുവിഞ്ഞാണന്തി? ആമന്താ. ‘‘ചക്ഖുഞ്ച പടിച്ച കായകമ്മഞ്ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോതി? നത്ഥി. ‘‘ചക്ഖുഞ്ച പടിച്ച രൂപേ ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോതി? ആമന്താ. ഹഞ്ചി ‘‘ചക്ഖുഞ്ച പടിച്ച രൂപേ ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോ, നോ ച വത രേ വത്തബ്ബേ – ‘‘ചക്ഖുഞ്ച പടിച്ച കായകമ്മഞ്ച ഉപ്പജ്ജതി ചക്ഖുവിഞ്ഞാണ’’ന്തി.

൪൭൦. ന വത്തബ്ബം – ‘‘കായകമ്മം സനിദസ്സന’’ന്തി? ആമന്താ. നനു പസ്സതി അഭിക്കമന്തം പടിക്കമന്തം ആലോകേന്തം വിലോകേന്തം സമിഞ്ജേന്തം പസാരേന്തന്തി? ആമന്താ. ഹഞ്ചി പസ്സതി അഭിക്കമന്തം പടിക്കമന്തം ആലോകേന്തം വിലോകേന്തം സമിഞ്ജേന്തം പസാരേന്തം, തേന വത രേ വത്തബ്ബേ – ‘‘കായകമ്മം സനിദസ്സന’’ന്തി.

കായകമ്മം സനിദസ്സനന്തികഥാ നിട്ഠിതാ.

ഛട്ഠവഗ്ഗോ.

തസ്സുദ്ദാനം –

നിയമോ അസങ്ഖതോ, പടിച്ചസമുപ്പാദോ അസങ്ഖതോ, ചത്താരി സച്ചാനി അസങ്ഖതാനി, ചത്താരോ ആരുപ്പാ അസങ്ഖതാ, നിരോധസമാപത്തി അസങ്ഖതാ, ആകാസോ അസങ്ഖതോ, ആകാസോ സനിദസ്സനോ, ചത്താരോ മഹാഭൂതാ, പഞ്ചിന്ദ്രിയാനി, തഥേവ കായകമ്മന്തി.