(൫൩) ൧. നിയാമകഥാ

൪൪൫. നിയാമോ അസങ്ഖതോതി? ആമന്താ. നിബ്ബാനം താണം ലേണം സരണം പരായനം അച്ചുതം അമതന്തി? ന ഹേവം വത്തബ്ബേ…പേ….

നിയാമോ അസങ്ഖതോ, നിബ്ബാനം അസങ്ഖതന്തി? ആമന്താ. ദ്വേ അസങ്ഖതാനീതി? ന ഹേവം വത്തബ്ബേ…പേ….

ദ്വേ അസങ്ഖതാനീതി? ആമന്താ. ദ്വേ താണാനി ദ്വേ ലേണാനി ദ്വേ സരണാനി ദ്വേ പരായനാനി ദ്വേ അച്ചുതാനി ദ്വേ അമതാനി ദ്വേ നിബ്ബാനാനീതി? ന ഹേവം വത്തബ്ബേ…പേ….

ദ്വേ നിബ്ബാനാനീതി? ആമന്താ. അത്ഥി ദ്വിന്നം നിബ്ബാനാനം ഉച്ചനീചതാ ഹീനപണീതതാ ഉക്കംസാവകംസോ സീമാ വാ ഭേദോ വാ രാജി വാ അന്തരികാ വാതി? ന ഹേവം വത്തബ്ബേ…പേ….

നിയാമോ അസങ്ഖതോതി? ആമന്താ. അത്ഥി കേചി നിയാമം ഓക്കമന്തി പടിലഭന്തി ഉപ്പാദേന്തി സമുപ്പാദേന്തി ഉട്ഠാപേന്തി സമുട്ഠാപേന്തി നിബ്ബത്തേന്തി അഭിനിബ്ബത്തേന്തി ജനേന്തി സഞ്ജനേന്തീതി? ആമന്താ. അത്ഥി കേചി അസങ്ഖതം ഓക്കമന്തി പടിലഭന്തി ഉപ്പാദേന്തി സമുപ്പാദേന്തി ഉട്ഠാപേന്തി സമുട്ഠാപേന്തി നിബ്ബത്തേന്തി അഭിനിബ്ബത്തേന്തി ജനേന്തി സഞ്ജനേന്തീതി? ന ഹേവം വത്തബ്ബേ…പേ….

൪൪൬. നിയാമോ അസങ്ഖതോതി? ആമന്താ. മഗ്ഗോ അസങ്ഖതോതി? ന ഹേവം വത്തബ്ബേ…പേ….

മഗ്ഗോ സങ്ഖതോതി? ആമന്താ. നിയാമോ സങ്ഖതോതി? ന ഹേവം വത്തബ്ബേ…പേ….

സോതാപത്തിനിയാമോ അസങ്ഖതോതി? ആമന്താ. സോതാപത്തിമഗ്ഗോ അസങ്ഖതോതി? ന ഹേവം വത്തബ്ബേ…പേ….

സോതാപത്തിമഗ്ഗോ സങ്ഖതോതി? ആമന്താ. സോതാപത്തിനിയാമോ സങ്ഖതോതി? ന ഹേവം വത്തബ്ബേ…പേ….

സകദാഗാമിനിയാമോ…പേ… അനാഗാമിനിയാമോ…പേ… അരഹത്തനിയാമോ അസങ്ഖതോതി? ആമന്താ. അരഹത്തമഗ്ഗോ അസങ്ഖതോതി? ന ഹേവം വത്തബ്ബേ …പേ… അരഹത്തമഗ്ഗോ സങ്ഖതോതി? ആമന്താ. അരഹത്തനിയാമോ സങ്ഖതോതി? ന ഹേവം വത്തബ്ബേ…പേ….

സോതാപത്തിനിയാമോ അസങ്ഖതോ…പേ… അരഹത്തനിയാമോ അസങ്ഖതോ, നിബ്ബാനം അസങ്ഖതന്തി? ആമന്താ. പഞ്ച അസങ്ഖതാനീതി? ന ഹേവം വത്തബ്ബേ…പേ… പഞ്ച അസങ്ഖതാനീതി? ആമന്താ. പഞ്ച താണാനി…പേ… അന്തരികാ വാതി? ന ഹേവം വത്തബ്ബേ…പേ….

നിയാമോ അസങ്ഖതോതി? ആമന്താ. മിച്ഛത്തനിയാമോ അസങ്ഖതോതി? ന ഹേവം വത്തബ്ബേ…പേ… മിച്ഛത്തനിയാമോ സങ്ഖതോതി? ആമന്താ. സമ്മത്തനിയാമോ സങ്ഖതോതി? ന ഹേവം വത്തബ്ബേ…പേ….

൪൪൭. ന വത്തബ്ബം – ‘‘നിയാമോ അസങ്ഖതോ’’തി? ആമന്താ. നിയാമേ ഉപ്പജ്ജ നിരുദ്ധേ അനിയതോ ഹോതീതി? ന ഹേവം വത്തബ്ബേ…പേ…. തേന ഹി നിയാമോ അസങ്ഖതോതി. മിച്ഛത്തനിയാമേ ഉപ്പജ്ജ നിരുദ്ധേ അനിയതോ ഹോതീതി? ന ഹേവം വത്തബ്ബേ…പേ… തേന ഹി മിച്ഛത്തനിയാമോ അസങ്ഖതോതി.

നിയാമകഥാ നിട്ഠിതാ.