൫. പഞ്ചമവഗ്ഗോ

(൪൯) ൭. ചിത്താരമ്മണകഥാ

൪൩൬. ചേതോപരിയായേ ഞാണം ചിത്താരമ്മണഞ്ഞേവ ന അഞ്ഞാരമ്മണന്തി? ആമന്താ. നനു അത്ഥി കോചി ‘‘സരാഗം ചിത്തം സരാഗം ചിത്ത’’ന്തി പജാനാതീതി? ആമന്താ. ഹഞ്ചി അത്ഥി കോചി ‘‘സരാഗം ചിത്തം സരാഗം ചിത്ത’’ന്തി പജാനാതി, നോ ച വത രേ വത്തബ്ബേ – ‘‘ചേതോപരിയായേ ഞാണം ചിത്താരമ്മണഞ്ഞേവ ന അഞ്ഞാരമ്മണ’’ന്തി.

നനു അത്ഥി കോചി വീതരാഗം ചിത്തം…പേ… സദോസം ചിത്തം… വീതദോസം ചിത്തം… സമോഹം ചിത്തം… വീതമോഹം ചിത്തം… സംഖിത്തം ചിത്തം… വിക്ഖിത്തം ചിത്തം… മഹഗ്ഗതം ചിത്തം… അമഹഗ്ഗതം ചിത്തം… സഉത്തരം ചിത്തം… അനുത്തരം ചിത്തം… സമാഹിതം ചിത്തം… അസമാഹിതം ചിത്തം… വിമുത്തം ചിത്തം…പേ… അവിമുത്തം ചിത്തം ‘‘അവിമുത്തം ചിത്ത’’ന്തി പജാനാതീതി? ആമന്താ. ഹഞ്ചി അത്ഥി കോചി ‘‘അവിമുത്തം ചിത്തം അവിമുത്തം ചിത്ത’’ന്തി പജാനാതി, നോ ച വത രേ വത്തബ്ബേ – ‘‘ചേതോപരിയായേ ഞാണം ചിത്താരമ്മണഞ്ഞേവ ന അഞ്ഞാരമ്മണ’’ന്തി.

൪൩൭. ഫസ്സാരമ്മണേ ഞാണം വത്തബ്ബം – ‘‘ചേതോപരിയായേ ഞാണ’’ന്തി? ആമന്താ. ഹഞ്ചി ഫസ്സാരമ്മണേ ഞാണം വത്തബ്ബം ചേതോപരിയായേ ഞാണം, നോ ച വത രേ വത്തബ്ബേ – ‘‘ചേതോപരിയായേ ഞാണം ചിത്താരമ്മണഞ്ഞേവ ന അഞ്ഞാരമ്മണ’’ന്തി. വേദനാരമ്മണേ ഞാണം…പേ… സഞ്ഞാരമ്മണേ ഞാണം… ചേതനാരമ്മണേ ഞാണം… ചിത്താരമ്മണേ ഞാണം… സദ്ധാരമ്മണേ ഞാണം… വീരിയാരമ്മണേ ഞാണം… സതാരമ്മണേ ഞാണം… സമാധാരമ്മണേ ഞാണം… പഞ്ഞാരമ്മണേ ഞാണം… രാഗാരമ്മണേ ഞാണം … ദോസാരമ്മണേ ഞാണം… മോഹാരമ്മണേ ഞാണം…പേ… അനോത്തപ്പാരമ്മണേ ഞാണം വത്തബ്ബം – ‘‘ചേതോപരിയായേ ഞാണ’’ന്തി? ആമന്താ. ഹഞ്ചി അനോത്തപ്പാരമ്മണേ ഞാണം വത്തബ്ബം ചേതോപരിയായേ ഞാണം, നോ ച വത രേ വത്തബ്ബേ – ‘‘ചേതോപരിയായേ ഞാണം ചിത്താരമ്മണഞ്ഞേവ ന അഞ്ഞാരമ്മണ’’ന്തി.

ഫസ്സാരമ്മണേ ഞാണം ന വത്തബ്ബം – ‘‘ചേതോപരിയായേ ഞാണ’’ന്തി? ആമന്താ. ഫസ്സപരിയായേ ഞാണന്തി? ന ഹേവം വത്തബ്ബേ…പേ… വേദനാരമ്മണേ ഞാണം…പേ… സഞ്ഞാരമ്മണേ ഞാണം…പേ… അനോത്തപ്പാരമ്മണേ ഞാണം ന വത്തബ്ബം – ‘‘ചേതോപരിയായേ ഞാണ’’ന്തി? ആമന്താ. അനോത്തപ്പപരിയായേ ഞാണന്തി? ന ഹേവം വത്തബ്ബേ…പേ….

൪൩൮. ന വത്തബ്ബം – ‘‘ചേതോപരിയായേ ഞാണം ചിത്താരമ്മണഞ്ഞേവ ന അഞ്ഞാരമ്മണ’’ന്തി? ആമന്താ. നനു ചേതോപരിയായേ ഞാണന്തി? ആമന്താ. ഹഞ്ചി ചേതോപരിയായേ ഞാണം, തേന വത രേ വത്തബ്ബേ – ‘‘ചേതോപരിയായേ ഞാണം ചിത്താരമ്മണഞ്ഞേവ ന അഞ്ഞാരമ്മണ’’ന്തി.

ചിത്താരമ്മണകഥാ നിട്ഠിതാ.