(൪൨) ൧൦. സബ്ബസംയോജനപ്പഹാനകഥാ

൪൧൩. സബ്ബസംയോജനാനം പഹാനം അരഹത്തന്തി? ആമന്താ. അരഹത്തമഗ്ഗേന സബ്ബേ സംയോജനാ പഹീയന്തീതി? ന ഹേവം വത്തബ്ബേ…പേ….

അരഹത്തമഗ്ഗേന സബ്ബേ സംയോജനാ പഹീയന്തീതി? ആമന്താ. അരഹത്തമഗ്ഗേന സക്കായദിട്ഠിം വിചികിച്ഛം സീലബ്ബതപരാമാസം പജഹതീതി? ന ഹേവം വത്തബ്ബേ…പേ….

അരഹത്തമഗ്ഗേന സക്കായദിട്ഠിം വിചികിച്ഛം സീലബ്ബതപരാമാസം പജഹതീതി? ആമന്താ. നനു തിണ്ണം സംയോജനാനം പഹാനം സോതാപത്തിഫലം വുത്തം ഭഗവതാതി? ആമന്താ. ഹഞ്ചി തിണ്ണം സംയോജനാനം പഹാനം സോതാപത്തിഫലം വുത്തം ഭഗവതാ, നോ ച വത രേ വത്തബ്ബേ – ‘‘അരഹത്തമഗ്ഗേന സബ്ബേ സംയോജനാ പഹീയന്തീ’’തി.

൪൧൪. അരഹത്തമഗ്ഗേന സബ്ബേ സംയോജനാ പഹീയന്തീതി? ആമന്താ. അരഹത്തമഗ്ഗേന ഓളാരികം കാമരാഗം ഓളാരികം ബ്യാപാദം പജഹതീതി? ന ഹേവം വത്തബ്ബേ…പേ….

൪൧൫. അരഹത്തമഗ്ഗേന ഓളാരികം കാമരാഗം ഓളാരികം ബ്യാപാദം പജഹതീതി? ആമന്താ. നനു കാമരാഗബ്യാപാദാനം തനുഭാവം സകദാഗാമിഫലം വുത്തം ഭഗവതാതി? ആമന്താ. ഹഞ്ചി കാമരാഗബ്യാപാദാനം തനുഭാവം സകദാഗാമിഫലം വുത്തം ഭഗവതാ, നോ ച വത രേ വത്തബ്ബേ – ‘‘അരഹത്തമഗ്ഗേന സബ്ബേ സംയോജനാ പഹീയന്തീ’’തി.

അരഹത്തമഗ്ഗേന സബ്ബേ സംയോജനാ പഹീയന്തീതി? ആമന്താ. അരഹത്തമഗ്ഗേന അണുസഹഗതം കാമരാഗം അണുസഹഗതം ബ്യാപാദം പജഹതീതി? ന ഹേവം വത്തബ്ബേ…പേ….

൪൧൬. അരഹത്തമഗ്ഗേന അണുസഹഗതം കാമരാഗം അണുസഹഗതം ബ്യാപാദം പജഹതീതി? ആമന്താ. നനു കാമരാഗബ്യാപാദാനം അനവസേസപ്പഹാനം അനാഗാമിഫലം വുത്തം ഭഗവതാതി? ആമന്താ. ഹഞ്ചി കാമരാഗബ്യാപാദാനം അനവസേസപ്പഹാനം അനാഗാമിഫലം വുത്തം ഭഗവതാ, നോ ച വത രേ വത്തബ്ബേ – ‘‘അരഹത്തമഗ്ഗേന സബ്ബേ സംയോജനാ പഹീയന്തീ’’തി.

അരഹത്തമഗ്ഗേന സബ്ബേ സംയോജനാ പഹീയന്തീതി? ആമന്താ. നനു രൂപരാഗഅരൂപരാഗമാനഉദ്ധച്ചഅവിജ്ജായ അനവസേസപ്പഹാനം അരഹത്തം വുത്തം ഭഗവതാതി? ആമന്താ. ഹഞ്ചി രൂപരാഗഅരൂപരാഗമാനഉദ്ധച്ചഅവിജ്ജായ അനവസേസപ്പഹാനം അരഹത്തം വുത്തം ഭഗവതാ, നോ ച വത രേ വത്തബ്ബേ – ‘‘അരഹത്തമഗ്ഗേന സബ്ബേ സംയോജനാ പഹീയന്തീ’’തി.

൪൧൭. ന വത്തബ്ബം – ‘‘സബ്ബസംയോജനാനം പഹാനം അരഹത്ത’’ന്തി? ആമന്താ. നനു അരഹതോ സബ്ബേ സംയോജനാ പഹീനാതി? ആമന്താ. ഹഞ്ചി അരഹതോ സബ്ബേ സംയോജനാ പഹീനാ, തേന വത രേ വത്തബ്ബേ – ‘‘സബ്ബസംയോജനാനം പഹാനം അരഹത്ത’’ന്തി.

സബ്ബസംയോജനപ്പഹാനകഥാ നിട്ഠിതാ.

ചതുത്ഥവഗ്ഗോ.

തസ്സുദ്ദാനം –

ഗിഹിസ്സ അരഹാ, സഹ ഉപപത്തിയാ അരഹാ, അരഹതോ സബ്ബേ ധമ്മാ അനാസവാ, അരഹാ ചതൂഹി ഫലേഹി സമന്നാഗതോ, ഏവമേവം ഛഹി ഉപേക്ഖാഹി, ബോധിയാ ബുദ്ധോ, സലക്ഖണസമന്നാഗതോ, ബോധിസത്തോ ഓക്കന്തനിയാമോ ചരിതബ്രഹ്മചരിയോ, പടിപന്നകോ ഫലേന സമന്നാഗതോ, സബ്ബസംയോജനാനം പഹാനം അരഹത്തന്തി.