൩. തതിയവഗ്ഗോ

(൨൮) ൮. ദിബ്ബസോതകഥാ

൩൭൫. മംസസോതം ധമ്മുപത്ഥദ്ധം ദിബ്ബസോതം ഹോതീതി? ആമന്താ. മംസസോതം ദിബ്ബസോതം, ദിബ്ബസോതം മംസസോതന്തി? ന ഹേവം വത്തബ്ബേ…പേ….

മംസസോതം ധമ്മുപത്ഥദ്ധം ദിബ്ബസോതം ഹോതീതി? ആമന്താ. യാദിസം മംസസോതം താദിസം ദിബ്ബസോതം, യാദിസം ദിബ്ബസോതം താദിസം മംസസോതന്തി? ന ഹേവം വത്തബ്ബേ…പേ….

മംസസോതം ധമ്മുപത്ഥദ്ധം ദിബ്ബസോതം ഹോതീതി? ആമന്താ. തഞ്ഞേവ മംസസോതം തം ദിബ്ബസോതം, തം ദിബ്ബസോതം തം മംസസോതന്തി? ന ഹേവം വത്തബ്ബേ…പേ….

മംസസോതം ധമ്മുപത്ഥദ്ധം ദിബ്ബസോതം ഹോതീതി? ആമന്താ. യാദിസോ മംസസോതസ്സ വിസയോ ആനുഭാവോ ഗോചരോ താദിസോ ദിബ്ബസ്സ സോതസ്സ വിസയോ ആനുഭാവോ ഗോചരോതി? ന ഹേവം വത്തബ്ബേ…പേ….

മംസസോതം ധമ്മുപത്ഥദ്ധം ദിബ്ബസോതം ഹോതീതി? ആമന്താ. ഉപാദിണ്ണം ഹുത്വാ അനുപാദിണ്ണം ഹോതീതി? ന ഹേവം വത്തബ്ബേ…പേ….

ഉപാദിണ്ണം ഹുത്വാ അനുപാദിണ്ണം ഹോതീതി? ആമന്താ. കാമാവചരം ഹുത്വാ രൂപാവചരം ഹോതീതി? ന ഹേവം വത്തബ്ബേ…പേ….

കാമാവചരം ഹുത്വാ രൂപാവചരം ഹോതീതി? ആമന്താ. രൂപാവചരം ഹുത്വാ അരൂപാവചരം ഹോതീതി? ന ഹേവം വത്തബ്ബേ…പേ….

രൂപാവചരം ഹുത്വാ അരൂപാവചരം ഹോതീതി? ആമന്താ. പരിയാപന്നം ഹുത്വാ അപരിയാപന്നം ഹോതീതി? ന ഹേവം വത്തബ്ബേ…പേ….

൩൭൬. മംസസോതം ധമ്മുപത്ഥദ്ധം ദിബ്ബസോതം ഹോതീതി? ആമന്താ. ദിബ്ബസോതം ധമ്മുപത്ഥദ്ധം മംസസോതം ഹോതീതി? ന ഹേവം വത്തബ്ബേ…പേ….

മംസസോതം ധമ്മുപത്ഥദ്ധം ദിബ്ബസോതം ഹോതീതി? ആമന്താ. ഏകംയേവ സോതന്തി? ന ഹേവം വത്തബ്ബേ…പേ….

ഏകംയേവ സോതന്തി? ആമന്താ. നനു ദ്വേ സോതാനി വുത്താനി ഭഗവതാ – ‘‘മംസസോതം, ദിബ്ബസോത’’ന്തി? ആമന്താ. ഹഞ്ചി ദ്വേ സോതാനി വുത്താനി ഭഗവതാ – മംസസോതം, ദിബ്ബസോതം, നോ ച വത രേ വത്തബ്ബേ – ‘‘ഏകഞ്ഞേവ സോത’’ന്തി.

ദിബ്ബസോതകഥാ നിട്ഠിതാ.