൨. ദുതിയവഗ്ഗോ

(൨൦) ൧൧. നിരോധകഥാ

൩൫൩. ദ്വേ നിരോധാതി? ആമന്താ. ദ്വേ ദുക്ഖനിരോധാതി? ന ഹേവം വത്തബ്ബേ…പേ… ദ്വേ ദുക്ഖനിരോധാതി? ആമന്താ. ദ്വേ നിരോധസച്ചാനീതി? ന ഹേവം വത്തബ്ബേ…പേ… ദ്വേ നിരോധസച്ചാനീതി? ആമന്താ. ദ്വേ ദുക്ഖസച്ചാനീതി? ന ഹേവം വത്തബ്ബേ…പേ… ദ്വേ നിരോധസച്ചാനീതി? ആമന്താ. ദ്വേ സമുദയസച്ചാനീതി? ന ഹേവം വത്തബ്ബേ…പേ… ദ്വേ നിരോധസച്ചാനീതി? ആമന്താ. ദ്വേ മഗ്ഗസച്ചാനീതി? ന ഹേവം വത്തബ്ബേ…പേ….

ദ്വേ നിരോധസച്ചാനീതി? ആമന്താ. ദ്വേ താണാനി…പേ… ദ്വേ ലേണാനി… ദ്വേ സരണാനി… ദ്വേ പരായണാനി… ദ്വേ അച്ചുതാനി… ദ്വേ അമതാനി… ദ്വേ നിബ്ബാനാനീതി? ന ഹേവം വത്തബ്ബേ…പേ….

ദ്വേ നിബ്ബാനാനീതി? ആമന്താ. അത്ഥി ദ്വിന്നം നിബ്ബാനാനം ഉച്ചനീചതാ ഹീനപണീതതാ ഉക്കംസാവകംസോ സീമാ വാ ഭേദോ വാ രാജി വാ അന്തരികാ വാതി? ന ഹേവം വത്തബ്ബേ…പേ….

ദ്വേ നിരോധാതി? ആമന്താ. നനു അപ്പടിസങ്ഖാനിരുദ്ധേ സങ്ഖാരേ പടിസങ്ഖാ നിരോധേന്തീതി? ആമന്താ. ഹഞ്ചി അപ്പടിസങ്ഖാനിരുദ്ധേ സങ്ഖാരേ പടിസങ്ഖാ നിരോധേന്തി, നോ ച വത രേ വത്തബ്ബേ – ‘‘ദ്വേ നിരോധാ’’തി.

ന വത്തബ്ബം – ‘‘ദ്വേ നിരോധാ’’തി? ആമന്താ. നനു അപ്പടിസങ്ഖാനിരുദ്ധാപി സങ്ഖാരാ അച്ചന്തഭഗ്ഗാ, പടിസങ്ഖാനിരുദ്ധാപി സങ്ഖാരാ അച്ചന്തഭഗ്ഗാതി? ആമന്താ. ഹഞ്ചി അപ്പടിസങ്ഖാനിരുദ്ധാപി സങ്ഖാരാ അച്ചന്തഭഗ്ഗാ, പടിസങ്ഖാനിരുദ്ധാപി സങ്ഖാരാ അച്ചന്തഭഗ്ഗാ, തേന വത രേ വത്തബ്ബേ – ‘‘ദ്വേ നിരോധാ’’തി.

ദ്വേ നിരോധാതി? ആമന്താ. പടിസങ്ഖാനിരുദ്ധാപി [പടിസങ്ഖാനിരുദ്ധാ (?)] സങ്ഖാരാ അരിയമഗ്ഗം ആഗമ്മ നിരുദ്ധാതി? ആമന്താ. അപ്പടിസങ്ഖാനിരുദ്ധാ സങ്ഖാരാ അരിയമഗ്ഗം ആഗമ്മ നിരുദ്ധാതി? ന ഹേവം വത്തബ്ബേ…പേ….

ദ്വേ നിരോധാതി? ആമന്താ. പടിസങ്ഖാനിരുദ്ധാ സങ്ഖാരാ ന പുന ഉപ്പജ്ജന്തീതി? ആമന്താ. അപ്പടിസങ്ഖാനിരുദ്ധാ സങ്ഖാരാ ന പുന ഉപ്പജ്ജന്തീതി? ന ഹേവം വത്തബ്ബേ…പേ… തേന ഹി ന വത്തബ്ബം – ‘‘ദ്വേ നിരോധാ’’തി.

നിരോധകഥാ നിട്ഠിതാ.

ദുതിയവഗ്ഗോ.

തസ്സുദ്ദാനം –

പരൂപഹാരോ അഞ്ഞാണം, കങ്ഖാ പരവിതാരണാ;

വചീഭേദോ ദുക്ഖാഹാരോ, ചിത്തട്ഠിതി ച കുക്കുളാ;

അനുപുബ്ബാഭിസമയോ, വോഹാരോ ച നിരോധകോതി.