൨. ദുതിയവഗ്ഗോ
(൧൦) ൧. പരൂപഹാരകഥാ
൩൦൭. അത്ഥി അരഹതോ അസുചി സുക്കവിസ്സട്ഠീതി? ആമന്താ. അത്ഥി അരഹതോ രാഗോ കാമരാഗോ കാമരാഗപരിയുട്ഠാനം കാമരാഗസംയോജനം കാമോഘോ കാമയോഗോ കാമച്ഛന്ദനീവരണന്തി? ന ഹേവം വത്തബ്ബേ…പേ….
നത്ഥി അരഹതോ രാഗോ കാമരാഗോ കാമരാഗപരിയുട്ഠാനം കാമരാഗസംയോജനം കാമോഘോ കാമയോഗോ കാമച്ഛന്ദനീവരണന്തി? ആമന്താ. ഹഞ്ചി നത്ഥി അരഹതോ രാഗോ കാമരാഗോ കാമരാഗപരിയുട്ഠാനം കാമരാഗസംയോജനം കാമോഘോ കാമയോഗോ കാമച്ഛന്ദനീവരണം, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.
അത്ഥി പുഥുജ്ജനസ്സ അസുചി സുക്കവിസ്സട്ഠി, അത്ഥി തസ്സ രാഗോ കാമരാഗോ കാമരാഗപരിയുട്ഠാനം കാമരാഗസംയോജനം കാമോഘോ കാമയോഗോ കാമച്ഛന്ദനീവരണന്തി? ആമന്താ. അത്ഥി അരഹതോ അസുചി സുക്കവിസ്സട്ഠി, അത്ഥി തസ്സ രാഗോ കാമരാഗോ കാമരാഗപരിയുട്ഠാനം…പേ… കാമച്ഛന്ദനീവരണന്തി? ന ഹേവം വത്തബ്ബേ…പേ….
അത്ഥി അരഹതോ അസുചി സുക്കവിസ്സട്ഠി, നത്ഥി തസ്സ രാഗോ കാമരാഗോ കാമരാഗപരിയുട്ഠാനം…പേ… കാമച്ഛന്ദനീവരണന്തി? ആമന്താ. അത്ഥി പുഥുജ്ജനസ്സ അസുചി സുക്കവിസ്സട്ഠി, നത്ഥി തസ്സ രാഗോ കാമരാഗോ കാമരാഗപരിയുട്ഠാനം…പേ… കാമച്ഛന്ദനീവരണന്തി? ന ഹേവം വത്തബ്ബേ…പേ….
അത്ഥി അരഹതോ അസുചി സുക്കവിസ്സട്ഠീതി? ആമന്താ. കേനട്ഠേനാതി? ഹന്ദ ഹി മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി.
മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി? ആമന്താ. അത്ഥി മാരകായികാനം ദേവതാനം അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
നത്ഥി മാരകായികാനം ദേവതാനം അസുചി സുക്കവിസ്സട്ഠീതി? ആമന്താ. ഹഞ്ചി നത്ഥി മാരകായികാനം ദേവതാനം അസുചി സുക്കവിസ്സട്ഠി, നോ ച വത രേ വത്തബ്ബേ – ‘‘മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീ’’തി.
മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി? ആമന്താ. മാരകായികാ ദേവതാ അത്തനോ അസുചിം സുക്കവിസ്സട്ഠിം ഉപസംഹരന്തി, അഞ്ഞേസം അസുചിം സുക്കവിസ്സട്ഠിം ഉപസംഹരന്തി, തസ്സ അസുചിം സുക്കവിസ്സട്ഠിം ഉപസംഹരന്തീതി? ന ഹേവം വത്തബ്ബേ…പേ….
മാരകായികാ ദേവതാ നേവ അത്തനോ ന അഞ്ഞേസം ന തസ്സ അസുചിം സുക്കവിസ്സട്ഠിം ഉപസംഹരന്തീതി? ആമന്താ. ഹഞ്ചി മാരകായികാ ദേവതാ നേവ അത്തനോ ന അഞ്ഞേസം ന തസ്സ അസുചിം സുക്കവിസ്സട്ഠിം ഉപസംഹരന്തി, നോ ച വത രേ വത്തബ്ബേ – ‘‘മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീ’’തി.
മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി? ആമന്താ. ലോമകൂപേഹി ഉപസംഹരന്തീതി? ന ഹേവം വത്തബ്ബേ…പേ….
൩൦൮. മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി? ആമന്താ. കിം കാരണാതി? ഹന്ദ ഹി വിമതിം ഗാഹയിസ്സാമാതി. അത്ഥി അരഹതോ വിമതീതി? ന ഹേവം വത്തബ്ബേ…പേ….
അത്ഥി അരഹതോ വിമതീതി? ആമന്താ. അത്ഥി അരഹതോ സത്ഥരി വിമതി, ധമ്മേ വിമതി, സങ്ഘേ വിമതി, സിക്ഖായ വിമതി, പുബ്ബന്തേ വിമതി, അപരന്തേ വിമതി, പുബ്ബന്താപരന്തേ വിമതി, ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ന ഹേവം വത്തബ്ബേ…പേ….
നത്ഥി അരഹതോ സത്ഥരി വിമതി, ധമ്മേ വിമതി, സങ്ഘേ വിമതി, സിക്ഖായ വിമതി, പുബ്ബന്തേ വിമതി, അപരന്തേ വിമതി, പുബ്ബന്താപരന്തേ വിമതി, ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ആമന്താ. ഹഞ്ചി നത്ഥി അരഹതോ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതി, നോ ച വത രേ വത്തബ്ബേ – ‘‘അത്ഥി അരഹതോ വിമതീ’’തി.
അത്ഥി പുഥുജ്ജനസ്സ വിമതി, അത്ഥി തസ്സ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ആമന്താ. അത്ഥി അരഹതോ വിമതി, അത്ഥി തസ്സ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ന ഹേവം വത്തബ്ബേ…പേ….
അത്ഥി അരഹതോ വിമതി, നത്ഥി തസ്സ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ആമന്താ. അത്ഥി പുഥുജ്ജനസ്സ വിമതി, നത്ഥി തസ്സ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ന ഹേവം വത്തബ്ബേ…പേ….
അത്ഥി അരഹതോ അസുചി സുക്കവിസ്സട്ഠീതി? ആമന്താ. അരഹതോ അസുചി സുക്കവിസ്സട്ഠി കിസ്സ നിസ്സന്ദോതി? അസിതപീതഖായിതസായിതസ്സ നിസ്സന്ദോതി. അരഹതോ അസുചി സുക്കവിസ്സട്ഠി അസിതപീതഖായിതസായിതസ്സ നിസ്സന്ദോതി? ആമന്താ. യേ കേചി അസന്തി പിവന്തി ഖാദന്തി സായന്തി, സബ്ബേസംയേവ അത്ഥി അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
യേ കേചി അസന്തി പിവന്തി ഖാദന്തി സായന്തി, സബ്ബേസംയേവ അത്ഥി അസുചി സുക്കവിസ്സട്ഠീതി? ആമന്താ. ദാരകാ അസന്തി പിവന്തി ഖാദന്തി സായന്തി, അത്ഥി ദാരകാനം അസുചി സുക്കവിസ്സട്ഠീതി? ന ഹേവം വത്തബ്ബേ.
പണ്ഡകാ അസന്തി പിവന്തി ഖാദന്തി സായന്തി, അത്ഥി പണ്ഡകാനം അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
ദേവാ അസന്തി പിവന്തി ഖാദന്തി സായന്തി, അത്ഥി ദേവതാനം അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
൩൦൯. അരഹതോ അസുചി സുക്കവിസ്സട്ഠി അസിതപീതഖായിതസായിതസ്സ നിസ്സന്ദോതി? ആമന്താ. അത്ഥി തസ്സ ആസയോതി? ന ഹേവം വത്തബ്ബേ…പേ….
അരഹതോ ഉച്ചാരപസ്സാവോ അസിതപീതഖായിതസായിതസ്സ നിസ്സന്ദോ, അത്ഥി തസ്സ ആസയോതി? ആമന്താ. അരഹതോ അസുചി സുക്കവിസ്സട്ഠി അസിതപീതഖായിതസായിതസ്സ നിസ്സന്ദോ, അത്ഥി തസ്സ ആസയോതി? ന ഹേവം വത്തബ്ബേ…പേ….
അരഹതോ അസുചി സുക്കവിസ്സട്ഠി അസിതപീതഖായിതസായിതസ്സ നിസ്സന്ദോ, നത്ഥി തസ്സ ആസയോതി? ആമന്താ. അരഹതോ ഉച്ചാരപസ്സാവോ അസിതപീതഖായിതസായിതസ്സ നിസ്സന്ദോ, നത്ഥി തസ്സ ആസയോതി? ന ഹേവം വത്തബ്ബേ…പേ….
൩൧൦. അത്ഥി അരഹതോ അസുചി സുക്കവിസ്സട്ഠീതി? ആമന്താ. അരഹാ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ [മേഥുനം ധമ്മം ഉപ്പാദേയ്യ (സീ. സ്യാ.)], പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ന ഹേവം വത്തബ്ബേ.
അത്ഥി പുഥുജ്ജനസ്സ അസുചി സുക്കവിസ്സട്ഠി, പുഥുജ്ജനോ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ, പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ആമന്താ. അത്ഥി അരഹതോ അസുചി സുക്കവിസ്സട്ഠി, അരഹാ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ, പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ന ഹേവം വത്തബ്ബേ…പേ….
അത്ഥി അരഹതോ അസുചി സുക്കവിസ്സട്ഠി, ന ച അരഹാ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ, പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ആമന്താ. അത്ഥി പുഥുജ്ജനസ്സ അസുചി സുക്കവിസ്സട്ഠി, ന ച പുഥുജ്ജനോ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ, പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ന ഹേവം വത്തബ്ബേ.
അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോതി? ആമന്താ. ഹഞ്ചി അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോ, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.
അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ ദോസോ പഹീനോ…പേ… മോഹോ പഹീനോ… മാനോ പഹീനോ… ദിട്ഠി പഹീനാ… വിചികിച്ഛാ പഹീനാ… ഥിനം പഹീനം… ഉദ്ധച്ചം പഹീനം… അഹിരികം പഹീനം…പേ… അനോത്തപ്പം പഹീനം ഉച്ഛിന്നമൂലം താലാവത്ഥുകതം അനഭാവങ്കതം ആയതിം അനുപ്പാദധമ്മന്തി? ആമന്താ. ഹഞ്ചി അരഹതോ അനോത്തപ്പം പഹീനം ഉച്ഛിന്നമൂലം താലാവത്ഥുകതം അനഭാവങ്കതം ആയതിം അനുപ്പാദധമ്മം, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.
൩൧൧. അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ രാഗപ്പഹാനായ മഗ്ഗോ ഭാവിതോതി? ആമന്താ. ഹഞ്ചി അരഹതോ രാഗപ്പഹാനായ മഗ്ഗോ ഭാവിതോ, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.
അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ രാഗപ്പഹാനായ സതിപട്ഠാനാ ഭാവിതാ…പേ… സമ്മപ്പധാനാ ഭാവിതാ… ഇദ്ധിപാദാ ഭാവിതാ… ഇന്ദ്രിയാ ഭാവിതാ… ബലാ ഭാവിതാ…പേ… ബോജ്ഝങ്ഗാ ഭാവിതാതി? ആമന്താ. ഹഞ്ചി അരഹതോ രാഗപ്പഹാനായ ബോജ്ഝങ്ഗാ ഭാവിതാ, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.
അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാതി? ആമന്താ. ഹഞ്ചി അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.
അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹാ വീതരാഗോ വീതദോസോ വീതമോഹോ കതകരണീയോ ഓഹിതഭാരോ അനുപ്പത്തസദത്ഥോ പരിക്ഖീണഭവസംയോജനോ സമ്മദഞ്ഞാവിമുത്തോ ഉക്ഖിത്തപലിഘോ സങ്കിണ്ണപരിഖോ അബ്ബൂള്ഹേസികോ നിരഗ്ഗളോ അരിയോ പന്നദ്ധജോ പന്നഭാരോ വിസഞ്ഞുത്തോ സുവിജിതവിജയോ, ദുക്ഖം തസ്സ പരിഞ്ഞാതം, സമുദയോ പഹീനോ, നിരോധോ സച്ഛികതോ, മഗ്ഗോ ഭാവിതോ, അഭിഞ്ഞേയ്യം അഭിഞ്ഞാതം, പരിഞ്ഞേയ്യം പരിഞ്ഞാതം, പഹാതബ്ബം പഹീനം, ഭാവേതബ്ബം ഭാവിതം, സച്ഛികാതബ്ബം സച്ഛികതന്തി? ആമന്താ. ഹഞ്ചി അരഹാ വീതരാഗോ വീതദോസോ വീതമോഹോ കതകരണീയോ…പേ… സച്ഛികാതബ്ബം സച്ഛികതം, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.
൩൧൨. അത്ഥി അരഹതോ അസുചി സുക്കവിസ്സട്ഠീതി? സധമ്മകുസലസ്സ അരഹതോ അത്ഥി അസുചി സുക്കവിസ്സട്ഠി, പരധമ്മകുസലസ്സ അരഹതോ നത്ഥി അസുചി സുക്കവിസ്സട്ഠീതി. സധമ്മകുസലസ്സ അരഹതോ അത്ഥി അസുചി സുക്കവിസ്സട്ഠീതി? ആമന്താ. പരധമ്മകുസലസ്സ അരഹതോ അത്ഥി അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ നത്ഥി അസുചി സുക്കവിസ്സട്ഠീതി? ആമന്താ. സധമ്മകുസലസ്സ അരഹതോ നത്ഥി അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
സധമ്മകുസലസ്സ അരഹതോ രാഗോ പഹീനോ, അത്ഥി തസ്സ അസുചി സുക്കവിസ്സട്ഠീതി? ആമന്താ. പരധമ്മകുസലസ്സ അരഹതോ രാഗോ പഹീനോ, അത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
സധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം, അത്ഥി തസ്സ അസുചി സുക്കവിസ്സട്ഠീതി? ആമന്താ. പരധമ്മകുസലസ്സ അരഹതോ അനോത്തപ്പം പഹീനം, അത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
സധമ്മകുസലസ്സ അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, അത്ഥി തസ്സ അസുചി സുക്കവിസ്സട്ഠീതി? ആമന്താ. പരധമ്മകുസലസ്സ അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, അത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
സധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ അസുചി സുക്കവിസ്സട്ഠീതി? ആമന്താ. പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ രാഗോ പഹീനോ, നത്ഥി തസ്സ അസുചി സുക്കവിസ്സട്ഠീതി? ആമന്താ. സധമ്മകുസലസ്സ അരഹതോ രാഗോ പഹീനോ, നത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം, നത്ഥി തസ്സ അസുചി സുക്കവിസ്സട്ഠീതി? ആമന്താ. സധമ്മകുസലസ്സ അരഹതോ അനോത്തപ്പം പഹീനം, നത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, നത്ഥി തസ്സ അസുചി സുക്കവിസ്സട്ഠീതി? ആമന്താ. സധമ്മകുസലസ്സ അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, നത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നത്ഥി തസ്സ അസുചി സുക്കവിസ്സട്ഠീതി? ആമന്താ. സധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….
൩൧൩. അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു വുത്തം ഭഗവതാ – ‘‘യേ തേ [യേ കേചി (സീ.)], ഭിക്ഖവേ, ഭിക്ഖൂ പുഥുജ്ജനാ സീലസമ്പന്നാ സതാ സമ്പജാനാ നിദ്ദം ഓക്കമന്തി, തേസം അസുചി ന മുച്ചതി. യേപി തേ, ഭിക്ഖവേ, ബാഹിരകാ ഇസയോ കാമേസു വീതരാഗാ, തേസമ്പി അസുചി ന മുച്ചതി. അട്ഠാനമേതം, ഭിക്ഖവേ, അനവകാസോ യം അരഹതോ അസുചി മുച്ചേയ്യാ’’തി [മഹാവ. ൩൫൩ അത്ഥതോ സമാനം; അ. നി. ൫.൨൧൦ പസ്സിതബ്ബം]. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അസുചി സുക്കവിസ്സട്ഠീ’’തി.
ന വത്തബ്ബം – ‘‘അത്ഥി അരഹതോ പരൂപഹാരോ’’തി? ആമന്താ. നനു അരഹതോ ചീവരപിണ്ഡപാതസേനാസനഗിലാനപച്ചയഭേസജ്ജപരിക്ഖാരം പരേ ഉപസംഹരേയ്യുന്തി? ആമന്താ. ഹഞ്ചി അരഹതോ ചീവരപിണ്ഡപാതസേനാസനഗിലാനപച്ചയഭേസജ്ജപരിക്ഖാരം പരേ ഉപസംഹരേയ്യും, തേന വത രേ വത്തബ്ബേ – ‘‘അത്ഥി അരഹതോ പരൂപഹാരോ’’തി.
അരഹതോ ചീവരപിണ്ഡപാതസേനാസനഗിലാനപച്ചയഭേസജ്ജപരിക്ഖാരം പരേ ഉപസംഹരേയ്യുന്തി, അത്ഥി അരഹതോ പരൂപഹാരോതി? ആമന്താ. അരഹതോ സോതാപത്തിഫലം വാ സകദാഗാമിഫലം വാ അനാഗാമിഫലം വാ അരഹത്തം വാ പരേ ഉപസംഹരേയ്യുന്തി? ന ഹേവം വത്തബ്ബേ…പേ….
പരൂപഹാരകഥാ നിട്ഠിതാ.
൨. ദുതിയവഗ്ഗോ
(൧൧) ൨. അഞ്ഞാണകഥാ
൩൧൪. അത്ഥി അരഹതോ അഞ്ഞാണന്തി? ആമന്താ. അത്ഥി അരഹതോ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ന ഹേവം വത്തബ്ബേ. നത്ഥി അരഹതോ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ആമന്താ. ഹഞ്ചി നത്ഥി അരഹതോ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണം, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.
അത്ഥി പുഥുജ്ജനസ്സ അഞ്ഞാണം, അത്ഥി തസ്സ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ആമന്താ. അത്ഥി അരഹതോ അഞ്ഞാണം, അത്ഥി തസ്സ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ന ഹേവം വത്തബ്ബേ.
അത്ഥി അരഹതോ അഞ്ഞാണം, നത്ഥി തസ്സ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ആമന്താ. അത്ഥി പുഥുജ്ജനസ്സ അഞ്ഞാണം, നത്ഥി തസ്സ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ന ഹേവം വത്തബ്ബേ.
അത്ഥി അരഹതോ അഞ്ഞാണന്തി? ആമന്താ. അരഹാ അഞ്ഞാണപകതോ പാണം ഹനേയ്യ, അദിന്നം ആദിയേയ്യ, മുസാ ഭണേയ്യ, പിസുണം ഭണേയ്യ, ഫരുസം ഭണേയ്യ, സമ്ഫം പലപേയ്യ, സന്ധിം ഛിന്ദേയ്യ, നില്ലോപം ഹരേയ്യ, ഏകാഗാരിയം കരേയ്യ, പരിപന്ഥേ തിട്ഠേയ്യ, പരദാരം ഗച്ഛേയ്യ, ഗാമഘാതം കരേയ്യ, നിഗമഘാതം കരേയ്യാതി? ന ഹേവം വത്തബ്ബേ.
അത്ഥി പുഥുജ്ജനസ്സ അഞ്ഞാണം, പുഥുജ്ജനോ അഞ്ഞാണപകതോ പാണം ഹനേയ്യ, അദിന്നം ആദിയേയ്യ, മുസാ ഭണേയ്യ…പേ… ഗാമഘാതം കരേയ്യ, നിഗമഘാതം കരേയ്യാതി? ആമന്താ. അത്ഥി അരഹതോ അഞ്ഞാണം, അരഹാ അഞ്ഞാണപകതോ പാണം ഹനേയ്യ, അദിന്നം ആദിയേയ്യ…പേ… ഗാമഘാതം കരേയ്യ, നിഗമഘാതം കരേയ്യാതി? ന ഹേവം വത്തബ്ബേ.
അത്ഥി അരഹതോ അഞ്ഞാണം, ന ച അരഹാ അഞ്ഞാണപകതോ പാണം ഹനേയ്യ, അദിന്നം ആദിയേയ്യ…പേ… ഗാമഘാതം കരേയ്യ, നിഗമഘാതം കരേയ്യാതി? ആമന്താ. അത്ഥി പുഥുജ്ജനസ്സ അഞ്ഞാണം, ന ച പുഥുജ്ജനോ അഞ്ഞാണപകതോ പാണം ഹനേയ്യ, അദിന്നം ആദിയേയ്യ…പേ… ഗാമഘാതം കരേയ്യ, നിഗമഘാതം കരേയ്യാതി? ന ഹേവം വത്തബ്ബേ.
അത്ഥി അരഹതോ അഞ്ഞാണന്തി? ആമന്താ. അത്ഥി അരഹതോ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം, സിക്ഖായ അഞ്ഞാണം, പുബ്ബന്തേ അഞ്ഞാണം, അപരന്തേ അഞ്ഞാണം, പുബ്ബന്താപരന്തേ അഞ്ഞാണം, ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ന ഹേവം വത്തബ്ബേ.
നത്ഥി അരഹതോ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം, സിക്ഖായ അഞ്ഞാണം, പുബ്ബന്തേ അഞ്ഞാണം, അപരന്തേ അഞ്ഞാണം, പുബ്ബന്താപരന്തേ അഞ്ഞാണം, ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ആമന്താ. ഹഞ്ചി നത്ഥി അരഹതോ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണം, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.
അത്ഥി പുഥുജ്ജനസ്സ അഞ്ഞാണം, അത്ഥി തസ്സ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ആമന്താ. അത്ഥി അരഹതോ അഞ്ഞാണം, അത്ഥി തസ്സ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ന ഹേവം വത്തബ്ബേ.
അത്ഥി അരഹതോ അഞ്ഞാണം, നത്ഥി തസ്സ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ആമന്താ. അത്ഥി പുഥുജ്ജനസ്സ അഞ്ഞാണം, നത്ഥി തസ്സ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ന ഹേവം വത്തബ്ബേ.
൩൧൫. അത്ഥി അരഹതോ അഞ്ഞാണന്തി? ആമന്താ. നനു അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോതി? ആമന്താ. ഹഞ്ചി അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോ, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.
അത്ഥി അരഹതോ അഞ്ഞാണന്തി? ആമന്താ. നനു അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം ഉച്ഛിന്നമൂലം താലാവത്ഥുകതം അനഭാവങ്കതം ആയതിം അനുപ്പാദധമ്മന്തി? ആമന്താ. ഹഞ്ചി അരഹതോ അനോത്തപ്പം പഹീനം ഉച്ഛിന്നമൂലം താലാവത്ഥുകതം അനഭാവങ്കതം ആയതിം അനുപ്പാദധമ്മം, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.
അത്ഥി അരഹതോ അഞ്ഞാണന്തി? ആമന്താ. നനു അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാതി? ആമന്താ. ഹഞ്ചി അരഹതോ രാഗപ്പഹാനായ ബോജ്ഝങ്ഗാ ഭാവിതാ, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.
അത്ഥി അരഹതോ അഞ്ഞാണന്തി? ആമന്താ. നനു അരഹതോ ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ …പേ… ബോജ്ഝങ്ഗാ ഭാവിതാതി? ആമന്താ. ഹഞ്ചി അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.
അത്ഥി അരഹതോ അഞ്ഞാണന്തി? ആമന്താ. നനു അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതന്തി? ആമന്താ. ഹഞ്ചി അരഹാ വീതരാഗോ…പേ… സച്ഛികാതബ്ബം സച്ഛികതം, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.
൩൧൬. അത്ഥി അരഹതോ അഞ്ഞാണന്തി? സധമ്മകുസലസ്സ അരഹതോ അത്ഥി അഞ്ഞാണം, പരധമ്മകുസലസ്സ അരഹതോ നത്ഥി അഞ്ഞാണന്തി. സധമ്മകുസലസ്സ അരഹതോ അത്ഥി അഞ്ഞാണന്തി? ആമന്താ. പരധമ്മകുസലസ്സ അരഹതോ അത്ഥി അഞ്ഞാണന്തി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ നത്ഥി അഞ്ഞാണന്തി? ആമന്താ. സധമ്മകുസലസ്സ അരഹതോ നത്ഥി അഞ്ഞാണന്തി? ന ഹേവം വത്തബ്ബേ…പേ….
സധമ്മകുസലസ്സ അരഹതോ രാഗോ പഹീനോ, അത്ഥി തസ്സ അഞ്ഞാണന്തി? ആമന്താ. പരധമ്മകുസലസ്സ അരഹതോ രാഗോ പഹീനോ, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
സധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം, അത്ഥി തസ്സ അഞ്ഞാണന്തി? ആമന്താ. പരധമ്മകുസലസ്സ അരഹതോ അനോത്തപ്പം പഹീനം, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
സധമ്മകുസലസ്സ അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, അത്ഥി തസ്സ അഞ്ഞാണന്തി? ആമന്താ. പരധമ്മകുസലസ്സ അരഹതോ രാഗപ്പഹാനായ ബോജ്ഝങ്ഗാ ഭാവിതാ, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
സധമ്മകുസലസ്സ അരഹതോ ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, അത്ഥി തസ്സ അഞ്ഞാണന്തി? ആമന്താ. പരധമ്മകുസലസ്സ അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
സധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ അഞ്ഞാണന്തി? ആമന്താ. പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ രാഗോ പഹീനോ, നത്ഥി തസ്സ അഞ്ഞാണന്തി? ആമന്താ. സധമ്മകുസലസ്സ അരഹതോ രാഗോ പഹീനോ, നത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം, നത്ഥി തസ്സ അഞ്ഞാണന്തി? ആമന്താ. സധമ്മകുസലസ്സ അരഹതോ അനോത്തപ്പം പഹീനം, നത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, നത്ഥി തസ്സ അഞ്ഞാണന്തി? ആമന്താ. സധമ്മകുസലസ്സ അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, നത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നത്ഥി തസ്സ അഞ്ഞാണന്തി? ആമന്താ. സധമ്മകുസലോ അരഹാ വീതരാഗോ വീതദോസോ വീതമോഹോ …പേ… സച്ഛികാതബ്ബം സച്ഛികതം, നത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….
൩൧൭. അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ – ‘‘ജാനതോഹം [ജാനതാഹം (സീ.), ജാനത്വാഹം (സ്യാ. പീ. ക.)], ഭിക്ഖവേ, പസ്സതോ ആസവാനം ഖയം വദാമി, നോ അജാനതോ നോ അപസ്സതോ. കിഞ്ച, ഭിക്ഖവേ, ജാനതോ കിം പസ്സതോ ആസവാനം ഖയോ ഹോതി? ‘ഇതി രൂപം, ഇതി രൂപസ്സ സമുദയോ, ഇതി രൂപസ്സ അത്ഥങ്ഗമോ, ഇതി വേദനാ…പേ… ഇതി സഞ്ഞാ… ഇതി സങ്ഖാരാ… ഇതി വിഞ്ഞാണം, ഇതി വിഞ്ഞാണസ്സ സമുദയോ, ഇതി വിഞ്ഞാണസ്സ അത്ഥങ്ഗമോ’തി – ഏവം ഖോ, ഭിക്ഖവേ, ജാനതോ ഏവം പസ്സതോ ആസവാനം ഖയോ ഹോതീ’’തി [സം. നി. ൩.൧൦൧; ഇതിവു. ൧൦൨; സം. നി. ൫.൧൦൯൫]. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.
അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ – ‘‘ജാനതോഹം, ഭിക്ഖവേ, പസ്സതോ ആസവാനം ഖയം വദാമി, നോ അജാനതോ നോ അപസ്സതോ. കിഞ്ച, ഭിക്ഖവേ, ജാനതോ കിം പസ്സതോ ആസവാനം ഖയോ ഹോതി? ‘ഇദം ദുക്ഖ’ന്തി – ഭിക്ഖവേ, ജാനതോ പസ്സതോ ആസവാനം ഖയോ ഹോതി, ‘അയം ദുക്ഖസമുദയോ’തി – ജാനതോ പസ്സതോ ആസവാനം ഖയോ ഹോതി, ‘അയം ദുക്ഖനിരോധോ’തി – ജാനതോ പസ്സതോ ആസവാനം ഖയോ ഹോതി, ‘അയം ദുക്ഖനിരോധഗാമിനീ പടിപദാ’തി – ജാനതോ പസ്സതോ ആസവാനം ഖയോ ഹോതി. ഏവം ഖോ, ഭിക്ഖവേ, ജാനതോ ഏവം പസ്സതോ ആസവാനം ഖയോ ഹോതീ’’തി [സം. നി. ൫.൧൦൯൫]. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.
അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ – ‘‘സബ്ബം, ഭിക്ഖവേ, അനഭിജാനം അപരിജാനം അവിരാജയം അപ്പജഹം അഭബ്ബോ ദുക്ഖക്ഖയായ, സബ്ബഞ്ച ഖോ, ഭിക്ഖവേ, അഭിജാനം പരിജാനം വിരാജയം പജഹം ഭബ്ബോ ദുക്ഖക്ഖയായാ’’തി [സം. നി. ൪.൨൬; ഇതിവു. ൭ ഇതിവുത്തകേപി]! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.
അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ –
‘‘സഹാവസ്സ ദസ്സനസമ്പദായ,
തയസ്സു ധമ്മാ ജഹിതാ ഭവന്തി;
സക്കായദിട്ഠീ വിചികിച്ഛിതഞ്ച,
സീലബ്ബതം വാപി യദത്ഥി കിഞ്ചി;
ചതൂഹപായേഹി ച വിപ്പമുത്തോ,
ഛച്ചാഭിഠാനാനി അഭബ്ബ കാതു’’ന്തി.
അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.
അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ – ‘‘യസ്മിം, ഭിക്ഖവേ, സമയേ അരിയസാവകസ്സ വിരജം വീതമലം ധമ്മചക്ഖും ഉദപാദി – ‘യം കിഞ്ചി സമുദയധമ്മം സബ്ബം തം നിരോധധമ്മ’ന്തി, സഹ ദസ്സനുപ്പാദാ, ഭിക്ഖവേ, അരിയസാവകസ്സ തീണി സംയോജനാനി പഹീയന്തി – സക്കായദിട്ഠി, വിചികിച്ഛാ, സീലബ്ബതപരാമാസോ’’തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.
ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി? ആമന്താ. നനു അരഹാ ഇത്ഥിപുരിസാനം നാമഗോത്തം ന ജാനേയ്യ, മഗ്ഗാമഗ്ഗം ന ജാനേയ്യ, തിണകട്ഠവനപ്പതീനം നാമം ന ജാനേയ്യാതി? ആമന്താ. ഹഞ്ചി അരഹാ ഇത്ഥിപുരിസാനം നാമഗോത്തം ന ജാനേയ്യ, മഗ്ഗാമഗ്ഗം ന ജാനേയ്യ, തിണകട്ഠവനപ്പതീനം നാമം ന ജാനേയ്യ, തേന വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.
അരഹാ ഇത്ഥിപുരിസാനം നാമഗോത്തം ന ജാനേയ്യ, മഗ്ഗാമഗ്ഗം ന ജാനേയ്യ, തിണകട്ഠവനപ്പതീനം നാമം ന ജാനേയ്യാതി, അത്ഥി അരഹതോ അഞ്ഞാണന്തി? ആമന്താ. അരഹാ സോതാപത്തിഫലം വാ സകദാഗാമിഫലം വാ അനാഗാമിഫലം വാ അരഹത്തം വാ ന ജാനേയ്യാതി? ന ഹേവം വത്തബ്ബേ…പേ….
അഞ്ഞാണകഥാ നിട്ഠിതാ.
൨. ദുതിയവഗ്ഗോ
(൧൨) ൩. കങ്ഖാകഥാ
൩൧൮. അത്ഥി അരഹതോ കങ്ഖാതി? ആമന്താ. അത്ഥി അരഹതോ വിചികിച്ഛാ വിചികിച്ഛാപരിയുട്ഠാനം വിചികിച്ഛാസംയോജനം വിചികിച്ഛാനീവരണന്തി? ന ഹേവം വത്തബ്ബേ…പേ….
നത്ഥി അരഹതോ വിചികിച്ഛാ വിചികിച്ഛാപരിയുട്ഠാനം വിചികിച്ഛാസംയോജനം വിചികിച്ഛാനീവരണന്തി? ആമന്താ. ഹഞ്ചി നത്ഥി അരഹതോ വിചികിച്ഛാ വിചികിച്ഛാപരിയുട്ഠാനം വിചികിച്ഛാസംയോജനം വിചികിച്ഛാനീവരണം, നോ ച വത രേ വത്തബ്ബേ – ‘‘അത്ഥി അരഹതോ കങ്ഖാ’’തി.
അത്ഥി പുഥുജ്ജനസ്സ കങ്ഖാ, അത്ഥി തസ്സ വിചികിച്ഛാ വിചികിച്ഛാപരിയുട്ഠാനം വിചികിച്ഛാസംയോജനം വിചികിച്ഛാനീവരണന്തി? ആമന്താ. അത്ഥി അരഹതോ കങ്ഖാ, അത്ഥി തസ്സ വിചികിച്ഛാ വിചികിച്ഛാപരിയുട്ഠാനം വിചികിച്ഛാസംയോജനം വിചികിച്ഛാനീവരണന്തി? ന ഹേവം വത്തബ്ബേ…പേ….
അത്ഥി അരഹതോ കങ്ഖാ, നത്ഥി തസ്സ വിചികിച്ഛാ വിചികിച്ഛാപരിയുട്ഠാനം വിചികിച്ഛാസംയോജനം വിചികിച്ഛാനീവരണന്തി? ആമന്താ. അത്ഥി പുഥുജ്ജനസ്സ കങ്ഖാ, നത്ഥി തസ്സ വിചികിച്ഛാ വിചികിച്ഛാപരിയുട്ഠാനം വിചികിച്ഛാസംയോജനം വിചികിച്ഛാനീവരണന്തി? ന ഹേവം വത്തബ്ബേ…പേ….
അത്ഥി അരഹതോ കങ്ഖാതി? ആമന്താ. അത്ഥി അരഹതോ സത്ഥരി കങ്ഖാ, ധമ്മേ കങ്ഖാ, സങ്ഘേ കങ്ഖാ, സിക്ഖായ കങ്ഖാ, പുബ്ബന്തേ കങ്ഖാ, അപരന്തേ കങ്ഖാ, പുബ്ബന്താപരന്തേ കങ്ഖാ, ഇദപ്പച്ചയതാപടിച്ചസമുപ്പന്നേസു ധമ്മേസു കങ്ഖാതി? ന ഹേവം വത്തബ്ബേ.
നത്ഥി അരഹതോ സത്ഥരി കങ്ഖാ, ധമ്മേ കങ്ഖാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു കങ്ഖാതി? ആമന്താ. ഹഞ്ചി നത്ഥി അരഹതോ സത്ഥരി കങ്ഖാ, ധമ്മേ കങ്ഖാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു കങ്ഖാ, നോ ച വത രേ വത്തബ്ബേ – ‘‘അത്ഥി അരഹതോ കങ്ഖാ’’തി.
അത്ഥി പുഥുജ്ജനസ്സ കങ്ഖാ, അത്ഥി തസ്സ സത്ഥരി കങ്ഖാ, ധമ്മേ കങ്ഖാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു കങ്ഖാതി? ആമന്താ. അത്ഥി അരഹതോ കങ്ഖാ, അത്ഥി തസ്സ സത്ഥരി കങ്ഖാ, ധമ്മേ കങ്ഖാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു കങ്ഖാതി? ന ഹേവം വത്തബ്ബേ.
അത്ഥി അരഹതോ കങ്ഖാ, നത്ഥി തസ്സ സത്ഥരി കങ്ഖാ, ധമ്മേ കങ്ഖാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു കങ്ഖാതി? ആമന്താ. അത്ഥി പുഥുജ്ജനസ്സ കങ്ഖാ, നത്ഥി തസ്സ സത്ഥരി കങ്ഖാ, ധമ്മേ കങ്ഖാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു കങ്ഖാതി? ന ഹേവം വത്തബ്ബേ.
൩൧൯. അത്ഥി അരഹതോ കങ്ഖാതി? ആമന്താ. നനു അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോതി? ആമന്താ. ഹഞ്ചി അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോ, നോ ച വത രേ വത്തബ്ബേ – ‘‘അത്ഥി അരഹതോ കങ്ഖാ’’തി.
അത്ഥി അരഹതോ കങ്ഖാതി? ആമന്താ. നനു അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം…പേ… രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ; നനു അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതന്തി? ആമന്താ. ഹഞ്ചി അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നോ ച വത രേ വത്തബ്ബേ – ‘‘അത്ഥി അരഹതോ കങ്ഖാ’’തി.
൩൨൦. അത്ഥി അരഹതോ കങ്ഖാതി? സധമ്മകുസലസ്സ അരഹതോ അത്ഥി കങ്ഖാ, പരധമ്മകുസലസ്സ അരഹതോ നത്ഥി കങ്ഖാതി. സധമ്മകുസലസ്സ അരഹതോ അത്ഥി കങ്ഖാതി? ആമന്താ. പരധമ്മകുസലസ്സ അരഹതോ അത്ഥി കങ്ഖാതി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ നത്ഥി കങ്ഖാതി? ആമന്താ. സധമ്മകുസലസ്സ അരഹതോ നത്ഥി കങ്ഖാതി? ന ഹേവം വത്തബ്ബേ…പേ….
സധമ്മകുസലസ്സ അരഹതോ രാഗോ പഹീനോ, അത്ഥി തസ്സ കങ്ഖാതി? ആമന്താ. പരധമ്മകുസലസ്സ അരഹതോ രാഗോ പഹീനോ, അത്ഥി തസ്സ കങ്ഖാതി? ന ഹേവം വത്തബ്ബേ…പേ….
സധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം…പേ… രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… സധമ്മകുസലോ അരഹാ വീതരാഗോ വീതദോസോ വീതമോഹോ …പേ… സച്ഛികാതബ്ബം സച്ഛികതം, അത്ഥി തസ്സ കങ്ഖാതി? ആമന്താ. പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ കങ്ഖാതി? ന ഹേവം വത്തബ്ബേ…പേ… പരധമ്മകുസലസ്സ അരഹതോ രാഗോ പഹീനോ, നത്ഥി തസ്സ കങ്ഖാതി? ആമന്താ. സധമ്മകുസലസ്സ അരഹതോ രാഗോ പഹീനോ, നത്ഥി തസ്സ കങ്ഖാതി? ന ഹേവം വത്തബ്ബേ…പേ….
പരധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം…പേ… രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നത്ഥി തസ്സ കങ്ഖാതി? ആമന്താ. സധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നത്ഥി തസ്സ കങ്ഖാതി? ന ഹേവം വത്തബ്ബേ…പേ….
൩൨൧. അത്ഥി അരഹതോ കങ്ഖാതി? ആമന്താ. നനു വുത്തം ഭഗവതാ – ‘‘ജാനതോഹം, ഭിക്ഖവേ, പസ്സതോ ആസവാനം ഖയം വദാമി, നോ അജാനതോ നോ അപസ്സതോ! കിഞ്ച, ഭിക്ഖവേ, ജാനതോ കിം പസ്സതോ ആസവാനം ഖയോ ഹോതി? ‘ഇതി രൂപം’…പേ… ‘ഇതി വിഞ്ഞാണസ്സ അത്ഥങ്ഗമോ’തി – ഏവം ഖോ, ഭിക്ഖവേ, ജാനതോ ഏവം പസ്സതോ ആസവാനം ഖയോ ഹോതീ’’തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ കങ്ഖാ’’തി.
അത്ഥി അരഹതോ കങ്ഖാതി? ആമന്താ. നനു വുത്തം ഭഗവതാ – ‘‘ജാനതോഹം, ഭിക്ഖവേ, പസ്സതോ ആസവാനം ഖയം വദാമി, നോ അജാനതോ നോ അപസ്സതോ! കിഞ്ച, ഭിക്ഖവേ, ജാനതോ കിം പസ്സതോ ആസവാനം ഖയോ ഹോതി? ‘ഇദം ദുക്ഖ’ന്തി, ഭിക്ഖവേ…പേ… ‘അയം ദുക്ഖനിരോധഗാമിനീ പടിപദാ’തി ജാനതോ പസ്സതോ ആസവാനം ഖയോ ഹോതി. ഏവം ഖോ, ഭിക്ഖവേ, ജാനതോ ഏവം പസ്സതോ ആസവാനം ഖയോ ഹോതീ’’തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ കങ്ഖാ’’തി.
അത്ഥി അരഹതോ കങ്ഖാതി? ആമന്താ. നനു വുത്തം ഭഗവതാ – ‘‘സബ്ബം, ഭിക്ഖവേ, അനഭിജാനം അപരിജാനം അവിരാജയം അപ്പജഹം അഭബ്ബോ ദുക്ഖക്ഖയായ; സബ്ബഞ്ച ഖോ, ഭിക്ഖവേ, അഭിജാനം പരിജാനം വിരാജയം പജഹം ഭബ്ബോ ദുക്ഖക്ഖയായാ’’തി! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ കങ്ഖാ’’തി.
അത്ഥി അരഹതോ കങ്ഖാതി? ആമന്താ. നനു വുത്തം ഭഗവതാ – ‘‘സഹാവസ്സ ദസ്സനസമ്പദായ …പേ… ഛച്ചാഭിഠാനാനി അഭബ്ബ കാതു’’ന്തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ കങ്ഖാ’’തി.
അത്ഥി അരഹതോ കങ്ഖാതി? ആമന്താ. നനു വുത്തം ഭഗവതാ – ‘‘യസ്മിം, ഭിക്ഖവേ, സമയേ അരിയസാവകസ്സ വിരജം വീതമലം ധമ്മചക്ഖും ഉദപാദി – ‘യം കിഞ്ചി സമുദയധമ്മം സബ്ബം തം നിരോധധമ്മ’ന്തി, സഹ ദസ്സനുപ്പാദാ, ഭിക്ഖവേ, അരിയസാവകസ്സ തീണി സംയോജനാനി പഹീയന്തി – സക്കായദിട്ഠി, വിചികിച്ഛാ, സീലബ്ബതപരാമാസോ’’തി! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ കങ്ഖാ’’തി.
അത്ഥി അരഹതോ കങ്ഖാതി? ആമന്താ. നനു വുത്തം ഭഗവതാ –
‘‘യദാ ഹവേ പാതുഭവന്തി ധമ്മാ,
ആതാപിനോ ഝായതോ ബ്രാഹ്മണസ്സ;
അഥസ്സ കങ്ഖാ വപയന്തി സബ്ബാ,
യതോ പജാനാതി സഹേതുധമ്മന്തി.
‘‘യദാ ഹവേ പാതുഭവന്തി ധമ്മാ,
ആതാപിനോ ഝായതോ ബ്രാഹ്മണസ്സ;
അഥസ്സ കങ്ഖാ വപയന്തി സബ്ബാ,
യതോ ഖയം പച്ചയാനം അവേദീതി.
‘‘യദാ ഹവേ പാതുഭവന്തി ധമ്മാ,
ആതാപിനോ ഝായതോ ബ്രാഹ്മണസ്സ;
വിധൂപയം തിട്ഠതി മാരസേനം,
സൂരിയോവ [സുരിയോവ (സീ. സ്യാ. കം. പീ.)] ഓഭാസയമന്തലിക്ഖന്തി [മഹാവ. ൩; ഉദാ. ൩].
‘‘യാ കാചി കങ്ഖാ ഇധ വാ ഹുരം വാ,
സകവേദിയാ വാ പരവേദിയാ വാ;
ഝായിനോ [യേ ഝായിനോ (ഉദാനേ)] താ പജഹന്തി സബ്ബാ,
ആതാപിനോ ബ്രഹ്മചരിയം ചരന്താതി [ഉദാ. ൪൭ ഉദാനേപി].
‘‘യേ കങ്ഖാസമതിക്കന്താ, കങ്ഖാഭൂതേസു പാണിസു;
അസംസയാ വിസംയുത്താ, തേസു ദിന്നം മഹപ്ഫലന്തി.
‘‘ഏതാദിസീ ധമ്മപകാസനേത്ഥ,
ന തത്ഥ കിം കങ്ഖതി കോചി സാവകോ;
നിത്ഥിണ്ണഓഘം [നിതിണ്ണഓഘം (സീ. ക.), നിത്തിണ്ണഓഘം (സ്യാ. കം.)] വിചികിച്ഛഛിന്നം,
ബുദ്ധം നമസ്സാമ ജിനം ജനിന്ദാ’’തി [ദീ. നി. ൨.൩൫൪].
അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ കങ്ഖാ’’തി.
ന വത്തബ്ബം – ‘‘അത്ഥി അരഹതോ കങ്ഖാ’’തി? ആമന്താ. നനു അരഹാ ഇത്ഥിപുരിസാനം നാമഗോത്തേ കങ്ഖേയ്യ, മഗ്ഗാമഗ്ഗേ കങ്ഖേയ്യ, തിണകട്ഠവനപ്പതീനം നാമേ കങ്ഖേയ്യാ’’തി? ആമന്താ. ഹഞ്ചി അരഹാ ഇത്ഥിപുരിസാനം നാമഗോത്തേ കങ്ഖേയ്യ, മഗ്ഗാമഗ്ഗേ കങ്ഖേയ്യ, തിണകട്ഠവനപ്പതീനം നാമേ കങ്ഖേയ്യ; തേന വത രേ വത്തബ്ബേ – ‘‘അത്ഥി അരഹതോ കങ്ഖാ’’തി.
അരഹാ ഇത്ഥിപുരിസാനം നാമഗോത്തേ കങ്ഖേയ്യ, മഗ്ഗാമഗ്ഗേ കങ്ഖേയ്യ, തിണകട്ഠവനപ്പതീനം നാമേ കങ്ഖേയ്യാതി, അത്ഥി അരഹതോ കങ്ഖാതി? ആമന്താ. അരഹാ സോതാപത്തിഫലേ വാ സകദാഗാമിഫലേ വാ അനാഗാമിഫലേ വാ അരഹത്തേ വാ കങ്ഖേയ്യാതി? ന ഹേവം വത്തബ്ബേ…പേ….
കങ്ഖാകഥാ നിട്ഠിതാ.
൨. ദുതിയവഗ്ഗോ
(൧൩) ൪. പരവിതാരണകഥാ
൩൨൨. അത്ഥി അരഹതോ പരവിതാരണാതി? ആമന്താ. അരഹാ പരനേയ്യോ പരപത്തിയോ പരപച്ചയോ പരപടിബദ്ധഭൂ, ന ജാനാതി ന പസ്സതി സമ്മൂള്ഹോ അസമ്പജാനോതി? ന ഹേവം വത്തബ്ബേ…പേ….
നനു അരഹാ ന പരനേയ്യോ ന പരപത്തിയോ ന പരപച്ചയോ ന പരപടിബദ്ധഭൂ ജാനാതി പസ്സതി അസമ്മൂള്ഹോ സമ്പജാനോതി? ആമന്താ. ഹഞ്ചി അരഹാ ന പരനേയ്യോ ന പരപത്തിയോ ന പരപച്ചയോ ന പരപടിബദ്ധഭൂ, ജാനാതി പസ്സതി അസമ്മൂള്ഹോ സമ്പജാനോ, നോ ച വത രേ വത്തബ്ബേ – ‘‘അത്ഥി അരഹതോ പരവിതാരണാ’’തി.
അത്ഥി പുഥുജ്ജനസ്സ പരവിതാരണാ, സോ ച പരനേയ്യോ പരപത്തിയോ പരപച്ചയോ പരപടിബദ്ധഭൂ, ന ജാനാതി ന പസ്സതി സമ്മൂള്ഹോ അസമ്പജാനോതി? ആമന്താ. അത്ഥി അരഹതോ പരവിതാരണാ, സോ ച പരനേയ്യോ പരപത്തിയോ പരപച്ചയോ പരപടിബദ്ധഭൂ, ന ജാനാതി ന പസ്സതി സമ്മൂള്ഹോ അസമ്പജാനോതി? ന ഹേവം വത്തബ്ബേ…പേ….
അത്ഥി അരഹതോ പരവിതാരണാ, സോ ച ന പരനേയ്യോ ന പരപത്തിയോ ന പരപച്ചയോ ന പരപടിബദ്ധഭൂ, ജാനാതി പസ്സതി അസമ്മൂള്ഹോ സമ്പജാനോതി? ആമന്താ. അത്ഥി പുഥുജ്ജനസ്സ പരവിതാരണാ, സോ ച ന പരനേയ്യോ ന പരപത്തിയോ ന പരപച്ചയോ ന പരപടിബദ്ധഭൂ, ജാനാതി പസ്സതി അസമ്മൂള്ഹോ സമ്പജാനോതി? ന ഹേവം വത്തബ്ബേ…പേ….
അത്ഥി അരഹതോ പരവിതാരണാതി? ആമന്താ. അത്ഥി അരഹതോ സത്ഥരി പരവിതാരണാ, ധമ്മേ പരവിതാരണാ, സങ്ഘേ പരവിതാരണാ, സിക്ഖായ പരവിതാരണാ, പുബ്ബന്തേ പരവിതാരണാ, അപരന്തേ പരവിതാരണാ, പുബ്ബന്താപരന്തേ പരവിതാരണാ, ഇദപ്പച്ചയതാപടിച്ചസമുപ്പന്നേസു ധമ്മേസു പരവിതാരണാതി? ന ഹേവം വത്തബ്ബേ…പേ….
നത്ഥി അരഹതോ സത്ഥരി പരവിതാരണാ, ധമ്മേ പരവിതാരണാ…പേ… ഇദപച്ചയതാപടിച്ചസമുപ്പന്നേസു ധമ്മേസു പരവിതാരണാതി? ആമന്താ. ഹഞ്ചി നത്ഥി അരഹതോ സത്ഥരി പരവിതാരണാ, ധമ്മേ പരവിതാരണാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു പരവിതാരണാ, നോ ച വത രേ വത്തബ്ബേ – ‘‘അത്ഥി അരഹതോ പരവിതാരണാ’’തി.
അത്ഥി പുഥുജ്ജനസ്സ പരവിതാരണാ, അത്ഥി തസ്സ സത്ഥരി പരവിതാരണാ, ധമ്മേ പരവിതാരണാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു പരവിതാരണാതി? ആമന്താ. അത്ഥി അരഹതോ പരവിതാരണാ, അത്ഥി തസ്സ സത്ഥരി പരവിതാരണാ, ധമ്മേ പരവിതാരണാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു പരവിതാരണാതി? ന ഹേവം വത്തബ്ബേ…പേ….
അത്ഥി അരഹതോ പരവിതാരണാ, നത്ഥി തസ്സ സത്ഥരി പരവിതാരണാ, ധമ്മേ പരവിതാരണാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു പരവിതാരണാതി? ആമന്താ. അത്ഥി പുഥുജ്ജനസ്സ പരവിതാരണാ, നത്ഥി തസ്സ സത്ഥരി പരവിതാരണാ, ധമ്മേ പരവിതാരണാ…പേ… ഇദപ്പച്ചയതാപടിച്ചസമുപ്പന്നേസു ധമ്മേസു പരവിതാരണാതി? ന ഹേവം വത്തബ്ബേ…പേ….
൩൨൩. അത്ഥി അരഹതോ പരവിതാരണാതി? ആമന്താ. നനു അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോതി? ആമന്താ. ഹഞ്ചി അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോ, നോ ച വത രേ വത്തബ്ബേ – ‘‘അത്ഥി അരഹതോ പരവിതാരണാ’’തി.