(൧൯) ൧൦. വോഹാരകഥാ

൩൪൭. ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. ലോകുത്തരേ സോതേ പടിഹഞ്ഞതി നോ ലോകിയേ, ലോകുത്തരേന വിഞ്ഞാണേന പടിവിജാനന്തി നോ ലോകിയേന, സാവകാ പടിവിജാനന്തി നോ പുഥുജ്ജനാതി? ന ഹേവം വത്തബ്ബേ…പേ….

നനു ബുദ്ധസ്സ ഭഗവതോ വോഹാരോ ലോകിയേ സോതേ പടിഹഞ്ഞതീതി? ആമന്താ. ഹഞ്ചി ബുദ്ധസ്സ ഭഗവതോ വോഹാരോ ലോകിയേ സോതേ പടിഹഞ്ഞതി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.

നനു ബുദ്ധസ്സ ഭഗവതോ വോഹാരം ലോകിയേന വിഞ്ഞാണേന പടിവിജാനന്തീതി? ആമന്താ. ഹഞ്ചി ബുദ്ധസ്സ ഭഗവതോ വോഹാരം ലോകിയേന വിഞ്ഞാണേന പടിവിജാനന്തി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.

നനു ബുദ്ധസ്സ ഭഗവതോ വോഹാരം പുഥുജ്ജനാ പടിവിജാനന്തീതി? ആമന്താ. ഹഞ്ചി ബുദ്ധസ്സ ഭഗവതോ വോഹാരം പുഥുജ്ജനാ പടിവിജാനന്തി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.

൩൪൮. ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. മഗ്ഗോ ഫലം നിബ്ബാനം, സോതാപത്തിമഗ്ഗോ സോതാപത്തിഫലം, സകദാഗാമിമഗ്ഗോ സകദാഗാമിഫലം, അനാഗാമിമഗ്ഗോ അനാഗാമിഫലം, അരഹത്തമഗ്ഗോ അരഹത്തഫലം, സതിപട്ഠാനം സമ്മപ്പധാനം ഇദ്ധിപാദോ ഇന്ദ്രിയം ബലം ബോജ്ഝങ്ഗോതി? ന ഹേവം വത്തബ്ബേ…പേ….

ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. അത്ഥി കേചി ബുദ്ധസ്സ ഭഗവതോ വോഹാരം സുണന്തീതി? ആമന്താ. ലോകുത്തരോ ധമ്മോ സോതവിഞ്ഞേയ്യോ, സോതസ്മിം പടിഹഞ്ഞതി, സോതസ്സ ആപാഥം ആഗച്ഛതീതി? ന ഹേവം വത്തബ്ബേ…പേ….

നനു ലോകുത്തരോ ധമ്മോ ന സോതവിഞ്ഞേയ്യോ, ന സോതസ്മിം പടിഹഞ്ഞതി, ന സോതസ്സ ആപാഥം ആഗച്ഛതീതി? ആമന്താ. ഹഞ്ചി ലോകുത്തരോ ധമ്മോ ന സോതവിഞ്ഞേയ്യോ, ന സോതസ്മിം പടിഹഞ്ഞതി, ന സോതസ്സ ആപാഥം ആഗച്ഛതി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.

൩൪൯. ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. അത്ഥി കേചി ബുദ്ധസ്സ ഭഗവതോ വോഹാരേ രജ്ജേയ്യുന്തി? ആമന്താ. ലോകുത്തരോ ധമ്മോ രാഗട്ഠാനിയോ രജനീയോ കമനീയോ മദനീയോ ബന്ധനീയോ മുച്ഛനീയോതി? ന ഹേവം വത്തബ്ബേ…പേ….

നനു ലോകുത്തരോ ധമ്മോ ന രാഗട്ഠാനിയോ ന രജനീയോ ന കമനീയോ ന മദനീയോ ന ബന്ധനീയോ ന മുച്ഛനീയോതി? ആമന്താ. ഹഞ്ചി ലോകുത്തരോ ധമ്മോ ന രാഗട്ഠാനിയോ ന രജനീയോ ന കമനീയോ ന മദനീയോ ന ബന്ധനീയോ ന മുച്ഛനീയോ, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.

ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. അത്ഥി കേചി ബുദ്ധസ്സ ഭഗവതോ വോഹാരേ ദുസ്സേയ്യുന്തി? ആമന്താ. ലോകുത്തരോ ധമ്മോ ദോസട്ഠാനിയോ കോപട്ഠാനിയോ പടിഘട്ഠാനിയോതി? ന ഹേവം വത്തബ്ബേ…പേ….

നനു ലോകുത്തരോ ധമ്മോ ന ദോസട്ഠാനിയോ ന കോപട്ഠാനിയോ ന പടിഘട്ഠാനിയോതി? ആമന്താ. ഹഞ്ചി ലോകുത്തരോ ധമ്മോ ന ദോസട്ഠാനിയോ ന കോപട്ഠാനിയോ ന പടിഘട്ഠാനിയോ, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.

ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. അത്ഥി കേചി ബുദ്ധസ്സ ഭഗവതോ വോഹാരേ മുയ്ഹേയ്യുന്തി? ആമന്താ. ലോകുത്തരോ ധമ്മോ മോഹട്ഠാനിയോ അഞ്ഞാണകരണോ അചക്ഖുകരണോ പഞ്ഞാനിരോധികോ വിഘാതപക്ഖികോ അനിബ്ബാനസംവത്തനികോതി? ന ഹേവം വത്തബ്ബേ…പേ….

നനു ലോകുത്തരോ ധമ്മോ ന മോഹട്ഠാനിയോ ന അഞ്ഞാണകരണോ ന അചക്ഖുകരണോ പഞ്ഞാവുദ്ധികോ അവിഘാതപക്ഖികോ നിബ്ബാനസംവത്തനികോതി? ആമന്താ. ഹഞ്ചി ലോകുത്തരോ ധമ്മോ ന മോഹട്ഠാനിയോ ന അഞ്ഞാണകരണോ ന അചക്ഖുകരണോ പഞ്ഞാവുദ്ധികോ അവിഘാതപക്ഖികോ നിബ്ബാനസംവത്തനികോ, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.

൩൫൦. ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. യേ കേചി ബുദ്ധസ്സ ഭഗവതോ വോഹാരം സുണന്തി, സബ്ബേ തേ മഗ്ഗം ഭാവേന്തീതി? ന ഹേവം വത്തബ്ബേ…പേ….

യേ കേചി ബുദ്ധസ്സ ഭഗവതോ വോഹാരം സുണന്തി, സബ്ബേ തേ മഗ്ഗം ഭാവേന്തീതി? ആമന്താ. ബാലപുഥുജ്ജനാ ബുദ്ധസ്സ ഭഗവതോ വോഹാരം സുണന്തി, ബാലപുഥുജ്ജനാ മഗ്ഗം ഭാവേന്തീതി? ന ഹേവം വത്തബ്ബേ…പേ… മാതുഘാതകോ മഗ്ഗം ഭാവേതി…പേ… പിതുഘാതകോ… അരഹന്തഘാതകോ… രുഹിരുപ്പാദകോ… സങ്ഘഭേദകോ ബുദ്ധസ്സ ഭഗവതോ വോഹാരം സുണാതി, സങ്ഘഭേദകോ മഗ്ഗം ഭാവേതീതി? ന ഹേവം വത്തബ്ബേ…പേ….

൩൫൧. ലബ്ഭാ സോവണ്ണമയായ ലട്ഠിയാ ധഞ്ഞപുഞ്ജോപി സുവണ്ണപുഞ്ജോപി ആചിക്ഖിതുന്തി? ആമന്താ. ഏവമേവം ഭഗവാ ലോകുത്തരേന വോഹാരേന ലോകിയമ്പി ലോകുത്തരമ്പി ധമ്മം വോഹരതീതി.

ലബ്ഭാ ഏലണ്ഡിയായ ലട്ഠിയാ ധഞ്ഞപുഞ്ജോപി സുവണ്ണപുഞ്ജോപി ആചിക്ഖിതുന്തി? ആമന്താ. ഏവമേവം ഭഗവാ ലോകിയേന വോഹാരേന ലോകിയമ്പി ലോകുത്തരമ്പി ധമ്മം വോഹരതീതി.

൩൫൨. ബുദ്ധസ്സ ഭഗവതോ വോഹാരോ ലോകിയം വോഹരന്തസ്സ ലോകിയോ ഹോതി, ലോകുത്തരം വോഹരന്തസ്സ ലോകുത്തരോ ഹോതീതി? ആമന്താ. ലോകിയം വോഹരന്തസ്സ ലോകിയേ സോതേ പടിഹഞ്ഞതി, ലോകുത്തരം വോഹരന്തസ്സ ലോകുത്തരേ സോതേ പടിഹഞ്ഞതി; ലോകിയം വോഹരന്തസ്സ ലോകിയേന വിഞ്ഞാണേന പടിവിജാനന്തി, ലോകുത്തരം വോഹരന്തസ്സ ലോകുത്തരേന വിഞ്ഞാണേന പടിവിജാനന്തി; ലോകിയം വോഹരന്തസ്സ പുഥുജ്ജനാ പടിവിജാനന്തി, ലോകുത്തരം വോഹരന്തസ്സ സാവകാ പടിവിജാനന്തീതി? ന ഹേവം വത്തബ്ബേ…പേ….

ന വത്തബ്ബം – ‘‘ബുദ്ധസ്സ ഭഗവതോ വോഹാരോ ലോകിയം വോഹരന്തസ്സ ലോകിയോ ഹോതി, ലോകുത്തരം വോഹരന്തസ്സ ലോകുത്തരോ ഹോതീതി? ആമന്താ. നനു ഭഗവാ ലോകിയമ്പി ലോകുത്തരമ്പി ധമ്മം വോഹരതീതി? ആമന്താ. ഹഞ്ചി ഭഗവാ ലോകിയമ്പി ലോകുത്തരമ്പി ധമ്മം വോഹരതി, തേന വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകിയം വോഹരന്തസ്സ ലോകിയോ ഹോതി, ലോകുത്തരം വോഹരന്തസ്സ ലോകുത്തരോ ഹോതീ’’തി.

ബുദ്ധസ്സ ഭഗവതോ വോഹാരോ ലോകിയം വോഹരന്തസ്സ ലോകിയോ ഹോതി, ലോകുത്തരം വോഹരന്തസ്സ ലോകുത്തരോ ഹോതീതി? ആമന്താ. മഗ്ഗം വോഹരന്തസ്സ മഗ്ഗോ ഹോതി, അമഗ്ഗം വോഹരന്തസ്സ അമഗ്ഗോ ഹോതി, ഫലം വോഹരന്തസ്സ ഫലം ഹോതി, അഫലം വോഹരന്തസ്സ അഫലം ഹോതി, നിബ്ബാനം വോഹരന്തസ്സ നിബ്ബാനം ഹോതി, അനിബ്ബാനം വോഹരന്തസ്സ അനിബ്ബാനം ഹോതി, സങ്ഖതം വോഹരന്തസ്സ സങ്ഖതം ഹോതി, അസങ്ഖതം വോഹരന്തസ്സ അസങ്ഖതം ഹോതി, രൂപം വോഹരന്തസ്സ രൂപം ഹോതി, അരൂപം വോഹരന്തസ്സ അരൂപം ഹോതി, വേദനം വോഹരന്തസ്സ വേദനാ ഹോതി, അവേദനം വോഹരന്തസ്സ അവേദനാ ഹോതി, സഞ്ഞം വോഹരന്തസ്സ സഞ്ഞാ ഹോതി, അസഞ്ഞം വോഹരന്തസ്സ അസഞ്ഞാ ഹോതി, സങ്ഖാരേ വോഹരന്തസ്സ സങ്ഖാരാ ഹോന്തി, അസങ്ഖാരേ വോഹരന്തസ്സ അസങ്ഖാരാ ഹോന്തി, വിഞ്ഞാണം വോഹരന്തസ്സ വിഞ്ഞാണം ഹോതി, അവിഞ്ഞാണം വോഹരന്തസ്സ അവിഞ്ഞാണം ഹോതീതി? ന ഹേവം വത്തബ്ബേ…പേ….

വോഹാരകഥാ നിട്ഠിതാ.